குறிப்பாக, பிரதான எதிர்க்கட்சியான அதிமுக இந்த தேர்தலில் தோல்வியை தழுவினால், அந்த கட்சியின் ஒட்டுமொத்த கட்டமைப்பும் சிதைந்து போகும் அபாயம் இருப்பதாக எச்சரிக்கப்படுகிறது. ஏற்கனவே பல பிளவுகளை சந்தித்திருக்கும் அதிமுக, பல தோல்விகளை சந்தித்துள்ள அதிமுக, இந்த முறையும் அதிகாரத்தை இழக்கும் பட்சத்தில், தொண்டர்கள் மற்றும் கீழ்மட்ட தலைவர்கள் சிதறி போக வாய்ப்புள்ளது. இது அந்த கட்சியின் அஸ்திவாரத்திற்கே ஒரு சவாலாக அமையலாம்.

மறுபுறம், ஆளுங்கட்சியான திமுக தோல்வியை சந்தித்தால், அது கட்சிக்குள் ஒரு புதிய அதிகார போட்டியை உருவாக்கும் என்று கணிக்கப்படுகிறது. உதயநிதி ஸ்டாலினின் தலைமைக்கு கொடுக்கப்படும் முக்கியத்துவத்திற்கு மத்தியில், தேர்தல் தோல்வி ஏற்பட்டால் கனிமொழியின் கை ஓங்குவதற்கான வாய்ப்புகள் அதிகம். கட்சியின் மூத்த நிர்வாகிகள் மற்றும் அதிருப்தியில் இருப்பவர்கள் கனிமொழியை நோக்கி நகர தொடங்கினால், அது திமுகவின் வாரிசு அரசியலில் ஒரு புதிய திருப்பத்தை ஏற்படுத்தும். ஆட்சி அதிகாரம் இல்லாத நிலையில், கட்சியை தக்கவைத்துக்கொள்ளும் போராட்டத்தில் கனிமொழியின் பங்கு மிக முக்கியமானதாக மாறும்.

அனைவரது கவனத்தையும் ஈர்த்திருக்கும் நடிகர் விஜய்யின் ‘தமிழக வெற்றிக் கழகம்’ குறித்து பல்வேறு விவாதங்கள் எழுகின்றன. விஜய் இந்த தேர்தலில் பூஜ்ஜியத்தில் இருந்து தொடங்கினாலும், அவர் பெறும் வாக்கு சதவீதமே அவரது அரசியல் ஆயுளை தீர்மானிக்கும்.

ஒருவேளை விஜய் 15 முதல் 20 சதவீத வாக்குகளை பெற்று தோல்வியடைந்தாலும், அது ஒரு கௌரவமான தொடக்கமாக கருதப்படும். அந்த வாக்கு வங்கி அவர் அரசியலில் நீடிப்பதற்கும், அடுத்த ஐந்து ஆண்டுகள் மக்கள் பணியாற்றி தன்னை தயார்படுத்தி கொள்வதற்கும் ஒரு வலுவான அடித்தளமாக அமையும். நிச்சயம் 2031ல் ஆட்சியை பிடித்துவிடலாம் என்ற நம்பிக்கை அவருக்கும் அவரது கட்சியினருக்கும் கிடைக்கும்.

ஆனால், எதிர்பார்ப்புகளுக்கு மாறாக அவர் 10 சதவீதத்திற்கும் குறைவான வாக்குகளை பெற்றால், அது அவரது அரசியல் கனவுகளுக்கு முற்றுப்புள்ளி வைக்கலாம். அத்தகைய சூழலில், அவர் மீண்டும் முழுநேரமாக திரைத்துறைக்கே சென்றுவிடும் வாய்ப்பு அதிகம் இருப்பதாக விமர்சகர்கள் கூறுகின்றனர்.

2026 தேர்தல் என்பது வெறும் வெற்றி தோல்விக்கான களம் மட்டுமல்ல, அது தமிழகத்தின் பாரம்பரிய மற்றும் புதிய அரசியல் சக்திகளின் வாழ்வா சாவா போராட்டமாகும்.