தமிழ்நாட்டு அரசியல் களம் தற்போது ஒரு மிகப்பெரிய தலைமுறை மாற்றத்தை சந்தித்து கொண்டிருக்கிறது. குறிப்பாக, Gen Z என்று அழைக்கப்படும் புதிய தலைமுறை இளைஞர்களை கவர்வதற்காக அரசியல் கட்சிகளுக்கு இடையே கடுமையான போட்டி நிலவி வருகிறது.

இந்த சூழலில், தமிழக வெற்றி கழகத்தின் அரசியல் எழுச்சியையும், அதன் பின்னணியில் இருக்கும் இளைஞர்களின் பங்களிப்பையும் பார்த்துவிட்டு, திமுகவும் அண்ணா அறிவாலயத்தில் ‘ஜென் ஸி’ இளைஞர்கள் கூட்டத்தை கூட்டி ஒரு புதிய நாடகத்தை அரங்கேற்ற முயல்வதாக விமர்சனங்கள் எழுந்துள்ளன. இதைப் பார்க்கும்போது “புலியைப் பார்த்துப் பூனை சூடு போட்டுக் கொண்ட கதை” தான் நினைவுக்கு வருகிறது என்று சமூக வலைத்தளங்களில் நெட்டிசன்கள் கிண்டலடித்து வருகின்றனர். தவெக என்ற புதிய அரசியல் சக்தியோடு தங்களை ஒப்பிட்டு கொள்ளும் நோக்கில் திமுக செய்யும் இத்தகைய முயற்சிகள், வெறும் காப்பி அடித்தலாகவே பார்க்கப்பட்டு அரசியல் அரங்கில் பெரும் கேலிக்குள்ளாகி வருகின்றன.

தமிழக வெற்றி கழகத்தை பொறுத்தவரை, அதன் தலைவர் விஜய் அவர்களின் பின்னால் அணிவகுத்து நிற்கும் ‘ஜென் ஸி’ இளைஞர் பட்டாளம் என்பது எவ்வித பண கவர்ச்சியோ அல்லது அரசியல் தந்திரங்களோ இன்றி, தார்மீக அடிப்படையில் தானாகவே உருவான ஒரு பெரும் அலையாகும். ஆனால், திமுக போன்ற பாரம்பரிய கட்சிகளில் சமூக வலைத்தளங்களில் ஒரு சாதகமான பதிவையோ அல்லது போஸ்ட்டையோ போடுவதற்கு ஐடி விங் ஊழியர்களுக்கு இருநூறு ரூபாய் போன்ற பண பலன்களை கொடுத்தாக வேண்டிய கட்டாயம் நிலவுகிறது. காசு கொடுத்தால் மட்டுமே வேலை செய்யும் ஒரு கட்டமைப்பை வைத்து கொண்டு, எவ்வித பண எதிர்பார்ப்புமின்றி லட்சக்கணக்கில் போஸ்ட்களை குவித்து வரும் தவெக-வின் இளைஞர் சக்தியை தங்களால் காப்பி அடித்துவிட முடியும் என்று திமுக நினைப்பது ஒரு மிகப்பெரிய அறியாமையாகும். அரசியல் நகர்வுகளில் கூட சொந்தமாக யோசிக்காமல், அடுத்தவர்கள் செய்வதையே அப்படியே நகலெடுக்கும் திமுகவின் இந்த பாணி அவர்களின் பலவீனத்தையே காட்டுகிறது.

உண்மையில், இந்த Gen Z என்று அழைக்கப்படும் இன்றைய இளைய தலைமுறையினர் ஒரு இருமுனை கத்தி போன்றவர்கள் என்பதை அரசியல் கட்சிகள் முதலில் ஆழமாக புரிந்து கொள்ள வேண்டும். அவர்கள் முந்தைய தலைமுறையினரை போல ஏனோ தானோ என்று அரசியலை கடந்து போகிறவர்கள் அல்ல; தங்களின் உரிமைகள் மற்றும் சமூகத்தின் எதிர்காலம் குறித்து மிகவும் விழிப்புணர்வுடன் இருப்பவர்கள். தங்களுக்கு பிடித்தமான ஒரு தலைவரை, அவரது நேர்மைக்காகவும் கொள்கைக்காகவும் எந்த அளவிற்கு தலையில் தூக்கி வைத்து கொண்டாடுகிறார்களோ, அதே அளவிற்கு அந்த தலைவர் ஏதேனும் தவறு செய்தால் அதை அப்போதே தட்டிக்கேட்கவும் அவர்கள் ஒருபோதும் தயங்குவதில்லை. இவர்களிடம் வெற்று முழக்கங்களையோ அல்லது பழைய காலத்து அரசியல் தந்திரங்களோ காட்டி ஏமாற்றிவிட முடியாது என்பதுதான் சமகால நிதர்சனம்.

இன்றைய இளைஞர்கள் யாருக்கும் கண்மூடித்தனமாக அடிபணியும் அடிமை மனப்பக்குவம் கொண்டவர்கள் அல்ல; அவர்கள் சுதந்திரமான சிந்தனையும், தார்மீக கோபமும் கொண்டவர்கள். அப்படிப்பட்ட சுயமரியாதை மிக்க ‘ஜென் ஸி’ கிட்ஸ்களை தங்களின் அரசியல் லாபத்திற்காக வளைக்க முயல்வதோ அல்லது தங்களுக்கு பின்னால் வரும் கொத்தடிமைகளாக மாற்ற முயற்சிப்பதோ ஒரு மிகப்பெரிய அரசியல் தற்கொலைக்கு சமமாகும். இந்த தலைமுறையினரை தங்களின் அதிகார பலத்தாலோ அல்லது பண பலத்தாலோ கட்டுப்படுத்திவிடலாம் என்று திமுக கணக்குப்போட்டால், அது அவர்களின் எதிர்காலத்திற்கே ஆபத்தாக முடியும். இளைஞர்களின் சுதந்திரத்தில் தலையிட்டு, அவர்களைத் தங்களின் கட்டுப்பாட்டிற்குள் கொண்டுவர நினைக்கும் எந்தவொரு முயற்சியும் தற்போதைய அரசியல் சூழலில் பலிக்காது.