2026-ஆம் ஆண்டு தமிழக சட்டமன்ற தேர்தல் மற்றும் அதன் பின்னணியில் நிலவும் அரசியல் சூழல், தமிழக வரலாற்றிலேயே ஒரு மிகப்பெரிய மாற்றத்திற்கான அறிகுறியாக பார்க்கப்படுகிறது.

வாக்குப்பதிவு மற்றும் தேர்தலுக்கு பிந்தைய கருத்துக்கணிப்புகள் என அனைத்து தளங்களிலும் ஒருவித குழப்பமான சூழல் நிலவினாலும், இது திராவிட கழகங்களுக்கு ஒருவித ‘அதிர்ச்சி வைத்தியமாக’ அமையும் என்பதில் சந்தேகமில்லை.

நீண்டகாலமாக தமிழகத்தை ஆண்டு வரும் இரு பெரும் கழகங்களும், இந்த தேர்தலில் பணத்தை வாரி இறைத்திருப்பது அவர்கள் மக்கள் மீது வைத்திருக்கும் நம்பிக்கையை விட, புதிய சக்திகளின் எழுச்சியால் ஏற்பட்டிருக்கும் பயத்தையே காட்டுகிறது. தேர்தல் ஆணையம் அதிகாரப்பூர்வமாக பிடித்த பணத்தை தாண்டி, களத்தில் ஆயிரக்கணக்கான கோடிகள் புழங்கியிருப்பது, தமிழகம் ஒரு கொள்ளையடிக்கும் இடமாக மாறிவிட்டதோ என்ற ஆழமான கேள்வியை வாக்காளர்கள் மத்தியில் எழுப்பியுள்ளது.

கருத்துக்கணிப்புகளை பொறுத்தவரை, அவை பல நேரங்களில் உண்மையான கள நிலவரத்தை பிரதிபலிக்கத் தவறிவிடுகின்றன என்பது கடந்த கால வரலாறுகள் காட்டும் பாடமாகும். குறிப்பாக, தமிழக வெற்றி கழகத் தலைவர் விஜய் இந்த தேர்தலில் பெரும் தாக்கத்தை ஏற்படுத்துவார் என்பதை பல நிறுவனங்கள் தொடக்கத்தில் கணிக்க தவறின. ஆனால், களத்தில் இளைஞர்கள் மற்றும் முதல் தலைமுறை வாக்காளர்களின் ஆதரவு விஜய்க்கு 90 சதவீதத்திற்கும் மேல் இருப்பதை மறுக்க முடியாது.

படித்த இளைஞர்கள் முதல் ஐடி ஊழியர்கள் வரை பலரும், பாரம்பரிய கழகங்களின் ஊழல் அரசியலுக்கு ஒரு முற்றுப்புள்ளி வைக்க வேண்டும் என்ற நோக்கத்தில் விஜய் பக்கம் சாய்ந்துள்ளனர். விஜய் பெரும் இடங்களின் எண்ணிக்கை 10-ஆக இருந்தாலும் சரி அல்லது 80-ஆக இருந்தாலும் சரி, அது கழகங்களின் முகத்தில் வாக்காளர்கள் பூசிய கரியாகவே கருதப்படும்.

இந்த தேர்தலின் மற்றொரு முக்கிய அம்சம் என்னவென்றால், எந்த கட்சிக்கும் தனிப் பெரும்பான்மை கிடைக்காத ‘தொங்கு சட்டசபை’ உருவாவதற்கான சாத்தியக்கூறுகள் அதிகம் தென்படுகின்றன. இது போன்ற ஒரு சூழலில், கூட்டணி கட்சிகள் தங்களது நிபந்தனைகளை தீவிரப்படுத்தத் தொடங்கியுள்ளன. குறிப்பாக, காங்கிரஸ் கட்சி 2006-ஆம் ஆண்டை போல ஏமாறாமல், அமைச்சரவையில் பங்கு வேண்டும் என்பதில் உறுதியாக இருக்கிறது.

ராகுல் காந்தியின் எண்ண ஓட்டத்தை பிரதிபலிக்கும் வகையில், காங்கிரஸ் மேலிடம் இந்த முறை ஆட்சியில் பங்கு கேட்பது திமுகவுக்கு பெரும் தலைவலியை ஏற்படுத்தியுள்ளது. இதேபோல திருமாவளவன் போன்ற தலைவர்களும் தேர்தலுக்கு பிறகு அரசியல் சூழல் மாறும் என்று கூறுவது, அதிகார பகிர்வுக்கான ஒரு முன்னோட்டமாகவே பார்க்கப்படுகிறது.