2026 தமிழக சட்டமன்றத் தேர்தல் முடிவுகள் தமிழக வெற்றிக் கழகத்திற்கு ஆதரவாக விஸ்வரூபம் எடுத்துள்ள நிலையில், தோல்வியைத் தழுவிய தரப்பினரும் சில அரசியல் விமர்சகர்களும் மீண்டும் மின்னணு வாக்குப்பதிவு இயந்திரங்கள் மீது தங்களது சந்தேகக் கணைகளைத் தொடுக்கத் தொடங்கியுள்ளனர்.

குறிப்பாக, மூத்த பத்திரிகையாளர் அய்யநாதன் போன்றவர்கள், இந்த வெற்றி என்பது உண்மையிலேயே மக்கள் வழங்கிய தீர்ப்பு தானா என்ற பெருத்த சந்தேகம் எழுவதாகக் குறிப்பிட்டுள்ளனர். தேர்தல் முடிவுகள் வெளியாகும் போதெல்லாம் தோல்விக்கான காரணத்தை ஆராய்வதை விட்டுவிட்டு, இயந்திரங்கள் மீது பழி போடும் இந்த பழைய பாணி விமர்சனம் மீண்டும் ஒரு விவாதப் பொருளாக மாறியுள்ளது.

தமிழக அரசியலில் அரை நூற்றாண்டுகாலமாக ஆதிக்கம் செலுத்தி வந்த திராவிடப் பேரியக்கங்களை ஒரே தேர்தலில் ஒரு புதிய கட்சி வீழ்த்தியிருப்பதைச் செரிமானம் செய்ய முடியாமல், இத்தகைய புகார்கள் கிளப்பப்படுவதாக அரசியல் நோக்கர்கள் கருதுகின்றனர். “இன்னுமாடா திருந்த மாட்டேங்கிறீங்க” என்று சமூக வலைதளங்களில் இளைஞர்கள் கொதிப்பதற்குக் காரணமும் இதுதான். மக்களின் மனமாற்றத்தைப் புரிந்து கொள்ளத் தவறியவர்கள், தொழில்நுட்பத்தின் மீது பழி சுமத்தி தங்களது அரசியல் தோல்வியை மறைக்கப் பார்ப்பதாகப் பரவலான விமர்சனங்கள் எழுந்துள்ளன.

கடந்த காலங்களில் பல தேர்தல்களில் இதேபோன்ற ஈவிஎம் புகார்கள் எழுப்பப்பட்ட போதும், அவை நீதிமன்றங்களாலும் தேர்தல் ஆணையத்தாலும் தகுந்த ஆதாரங்களுடன் முறியடிக்கப்பட்டுள்ளன. விஜய்யின் அரசியல் வருகை என்பது இளைஞர்கள் மற்றும் முதல்முறை வாக்காளர்கள் மத்தியில் ஏற்படுத்திய மிகப்பெரிய தாக்கத்தையே வாக்கு எண்ணிக்கையில் பிரதிபலிக்கிறது. கள நிலவரத்தைத் துல்லியமாகக் கணிக்கத் தவறிய விமர்சகர்கள், இப்போது மக்களின் தீர்ப்பைக் கொச்சைப்படுத்தும் விதமாக ஈவிஎம் முறைகேடு என்று பேசுவது ஜனநாயகத்தின் மீதான அவமதிப்பாகவே பார்க்கப்படுகிறது.

விஜய்யின் தவெக சுமார் 108-க்கும் மேற்பட்ட தொகுதிகளில் முன்னிலை வகிப்பதும், கொளத்தூர் போன்ற முக்கியத் தொகுதிகளிலேயே முதல்வர் பின்னடைவைச் சந்திப்பதும் ஒரு சமூக மாற்றத்தின் வெளிப்பாடே தவிர, அது ஒரு இயந்திரத்தின் கோளாறு அல்ல. “மக்களின் நாடித் துடிப்பை அறியாதவர்களுக்கு ஈவிஎம் ஒரு சாக்குப்போக்கு” எனத் தவெக தொண்டர்கள் பதிலடி கொடுத்து வருகின்றனர். தோல்வியிலிருந்து பாடம் கற்கத் தவறி, இன்னும் பழமைவாதப் புகார்களிலேயே உழன்று கொண்டிருக்கும் இத்தகைய விமர்சகர்களைக் காலாவதியானவர்கள் என்றே இளைய தலைமுறை கருதுகிறது.