மதம் பார்த்து மாவட்ட செயலாளர் இல்லை.. தவெக பாணியில் தான் இனி அரசியல் செய்ய முடியும்.. 50 ஆண்டு திராவிட கட்சிகலுக்கு பாடம் எடுத்த 2 ஆண்டு தவெக கட்சி..

தமிழ்நாடு உள்பட இந்திய அரசியலில் தேர்தல் நேரத்தில் வேட்பாளர் தேர்வு என்றாலே தொகுதியில் எந்த சமூகத்தினர் அதிகமாக இருக்கிறார்கள், அந்த சமூகத்தைச் சேர்ந்தவரை நிறுத்தினால் வெற்றி வாய்ப்பு எப்படி இருக்கும் என்பதுதான் பல ஆண்டுகளாக முக்கியமான கணக்காக இருந்து வருகிறது. மாவட்டச் செயலாளர் முதல் வேட்பாளர் வரை சமூக அடிப்படையிலான கணக்குகள் பார்க்கப்படுவது வழக்கமாக இருந்ததாக அரசியல் விமர்சனங்கள் கூறுகின்றன. ஆனால் இந்த நடைமுறைக்கே இப்போது ஒரு புதிய கேள்வியை எழுப்பியிருக்கிறது விஜய்யின் அரசியல் வரவு என்ற பேச்சு பரபரப்பை ஏற்படுத்தியுள்ளது.

குறிப்பாக, சாதி, மதம், இனம், மொழி போன்ற அடையாளங்களை முன்னிலைப்படுத்தாமல் ஒரு சாதாரண நபரையே மக்கள் தேர்ந்தெடுக்க வைக்க முடியும் என்பதை விஜய்யின் கட்சி நிரூபித்திருப்பதாக அவரது ஆதரவாளர்கள் கூறுகின்றனர். மிகப்பெரிய பண பலமோ, பாரம்பரிய அரசியல் பின்புலமோ இல்லாமல் ஒரு வேட்பாளர் மக்கள் மத்தியில் நம்பிக்கையை உருவாக்கி வெற்றி பெற முடியும் என்ற எண்ணம் புதிய அரசியல் விவாதத்தை உருவாக்கியுள்ளது. "வேட்பாளரின் சமூகத்தை விட அவருடைய திறமை மற்றும் தொகுதிக்கான பணிதான் முக்கியமா?" என்ற கேள்வியும் இப்போது முன்வைக்கப்படுகிறது.

இந்த சூழ்நிலையில் திமுக, அதிமுக போன்ற நீண்டகால அரசியல் கட்சிகளும் தங்களுடைய வேட்பாளர் தேர்வு முறையை மறுபரிசீலனை செய்ய வேண்டிய கட்டாயம் உருவாகியுள்ளதாக அரசியல் வட்டாரங்களில் பேசப்படுகிறது. ஒரு தொகுதியில் எந்த சமூகத்தினர் அதிகம் என்பதை மட்டும் பார்க்காமல், அந்த தொகுதியில் மக்களுக்கு நன்கு அறிமுகமானவர் யார், மக்களுடன் தொடர்ந்து தொடர்பில் இருப்பவர் யார், தொகுதியின் பிரச்சினைகளை புரிந்து கொண்டவர் யார் என்பதை அடிப்படையாக வைத்து வேட்பாளரை தேர்வு செய்ய வேண்டும் என்ற அணுகுமுறை குறித்து விவாதம் நடப்பதாக கூறப்படுகிறது.

அதேபோல, மாவட்டச் செயலாளர்கள், ஒன்றியச் செயலாளர்கள் போன்ற கட்சி பொறுப்புகளிலும் சமூக அடிப்படையிலான கணக்குகளை குறைத்து, கட்சிக்காக களத்தில் உண்மையாக உழைப்பவர்களுக்கு முக்கியத்துவம் கொடுக்க வேண்டும் என்ற கருத்தும் வலுப்பெறுவதாக சொல்லப்படுகிறது. ஒரு குறிப்பிட்ட சமூகத்தின் வாக்குகளை பெறுவதற்காக அந்த சமூகத்தைச் சேர்ந்த ஒருவரை நியமிப்பதை விட, அனைத்து தரப்பு மக்களிடமும் ஏற்றுக்கொள்ளக்கூடிய தலைமைத்துவம் கொண்டவர்களை முன்னிலைப்படுத்துவது கட்சிகளுக்கு நீண்ட காலத்தில் பலன் தரலாம் என்ற பார்வையும் உருவாகியுள்ளது.

இதில் அரசியல் ரீதியாக கவனிக்க வேண்டிய விஷயம் என்னவென்றால், பாரம்பரிய கட்சிகளின் பல ஆண்டுகால தேர்தல் கணக்குகளுக்கு எதிராக ஒரு புதிய கட்சி வேறு விதமான அரசியல் அணுகுமுறையை முன்வைத்தால், பழைய கட்சிகளும் தங்களை மாற்றிக்கொள்ள வேண்டிய சூழல் உருவாகலாம். "சாதி கணக்கு இல்லாமல் தேர்தலில் வெல்ல முடியுமா?" என்ற கேள்விக்கு ஒரு புதிய அரசியல் முயற்சி வெவ்வேறு விதமான பதிலை கொடுக்க முயற்சிக்கிறது என்பதே இந்த விவாதத்தின் முக்கிய அம்சமாக பார்க்கப்படுகிறது.

இறுதியில், இந்த மாற்றம் உண்மையான அரசியல் நடைமுறையாக மாறுமா அல்லது தேர்தல் நேரத்தில் மட்டும் பேசப்படும் விஷயமாக முடிந்துவிடுமா என்பதுதான் முக்கியம். தொகுதிக்கு பொருத்தமான வேட்பாளர், மக்களுடன் நெருக்கம், நேர்மையான செயல்பாடு, வளர்ச்சிக்கான தெளிவான பார்வை ஆகியவை சாதி, மத கணக்குகளை விட முக்கியமாகும் நிலை உருவானால், அது தமிழக அரசியலில் பெரிய மாற்றமாக இருக்கும். வயது, அனுபவம், கட்சியின் வரலாறு ஆகியவற்றை தாண்டி புதிய அரசியல் சக்தி எழுப்பிய கேள்விகள், பழைய கட்சிகளையும் தங்களது அணுகுமுறையை மாற்றிப் பார்க்க வைத்திருக்கிறது என்பதே இந்த விவாதத்தின் பாசிட்டிவான பக்கம்.