அனுமதியின்றி இந்த வழியாக செல்லும் எண்ணெய் டாங்கர்கள் அழிக்கப்படும் என்று ஈரான் பகிரங்க எச்சரிக்கை விடுத்துள்ளது. தற்போது நடைமுறையில் உள்ள இரண்டு வார கால போர்நிறுத்தத்தின் போது, இந்த நீர்வழியின் மீதான தனது முழுமையான கட்டுப்பாட்டை நிலைநிறுத்த ஈரான் இந்த அதிரடி நடவடிக்கையை எடுத்துள்ளது.

ஈரான் ஆட்சியாளர்களால் அனைத்து எண்ணெய் கப்பல்களுக்கும் இன்று வானொலி செய்தி மூலம் விடுக்கப்பட்ட எச்சரிக்கையில், “அனுமதியின்றி எந்தவொரு கப்பலும் கடக்க முயன்றால், அவை அழிக்கப்படும்” என்று நேரடியாக கூறப்பட்டுள்ளது. பொதுவாக உலகின் 20 சதவீத எண்ணெய் மற்றும் எரிவாயு போக்குவரத்து நடைபெறும் இந்த முக்கிய பாதையை பயன்படுத்த, கப்பல் நிறுவனங்கள் பெரும் தொகையை கட்டணமாக செலுத்த வேண்டும் என்று ஈரான் கோருகிறது.

ஒவ்வொரு கப்பலும் அதன் சரக்கு விவரங்களை முதலில் அதிகாரிகளுக்கு மின்னஞ்சல் செய்ய வேண்டும். அதை தொடர்ந்து, ஈரானின் உச்ச தேசிய பாதுகாப்பு கவுன்சில் டிஜிட்டல் கரன்சி மூலம் செலுத்த வேண்டிய கட்டண விவரங்களை அறிவிக்கும். ஒரு பேரல் எண்ணெய்க்கு 1 டாலர் வீதம் இந்த கட்டணம் வசூலிக்கப்படும் என்று ஈரானின் ஏற்றுமதியாளர் சங்க செய்தி தொடர்பாளர் ஹமித் ஹொசைனி தெரிவித்துள்ளார். இருப்பினும், காலியாக செல்லும் டாங்கர்களுக்கு இந்த கட்டணத்திலிருந்து விலக்கு அளிக்கப்படும் என்றும் அவர் குறிப்பிட்டுள்ளார்.

இந்த இரண்டு வார கால போர்நிறுத்தத்தை ஆயுத கடத்தலுக்கு பயன்படுத்தாமல் இருப்பதை உறுதி செய்யவே தாங்கள் இந்த கண்காணிப்பு நடைமுறையை கொண்டுவந்துள்ளதாக ஈரான் நியாயப்படுத்துகிறது. “அனைத்து பொருட்களும் கடந்து செல்ல அனுமதிக்கப்படும், ஆனால் ஒவ்வொரு கப்பலுக்கும் இந்த நடைமுறைகள் முடிவடைய காலதாமதம் ஆகும்; ஈரான் எதற்கும் அவசரப்படவில்லை” என்று ஹொசைனி கூறியுள்ளார்.

ஈரானின் இந்த நடவடிக்கை வாஷிங்டன் மற்றும் தெஹ்ரான் இடையே பெரும் மோதல் போக்கை உருவாக்கியுள்ளது. அமெரிக்க அதிபர் டொனால்ட் ட்ரம்ப், கடல்சார் போக்குவரத்து தடையின்றி நடைபெற வேண்டும் என்று வலியுறுத்தியுள்ளார். ஈரானின் கடற்கரைக்கு மிக அருகில் உள்ள வடக்கு வழித்தடத்தை பயன்படுத்த கப்பல்கள் கட்டாயப்படுத்தப்படுவதால், மேற்கத்திய நாடுகள் அல்லது வளைகுடா நாடுகளுடன் தொடர்புடைய கப்பல்கள் இந்த ஆபத்தான பயணத்தை மேற்கொள்ள துணியுமா என்ற கேள்வி எழுந்துள்ளது.

சர்வதேச கச்சா எண்ணெய் சந்தையில் இந்த விவகாரம் பெரும் தாக்கத்தை ஏற்படுத்தும் என்று எதிர்பார்க்கப்படுகிறது. ஏற்கனவே நிலவி வரும் புவிசார் அரசியல் நெருக்கடிகளுக்கு மத்தியில், ஹார்முஸ் ஜலசந்தியில் ஈரானின் இந்த ‘டிஜிட்டல் டோல்’ வசூல் மற்றும் அழித்தொழிப்பு எச்சரிக்கை, உலகளாவிய எரிசக்தி பாதுகாப்பிற்கு விடுக்கப்பட்ட சவாலாகவே பார்க்கப்படுகிறது. சர்வதேச நாடுகள் இந்த விவகாரத்தில் தலையிடாவிட்டால், எரிபொருள் விலை விண்ணைத் தொடும் அபாயம் உள்ளதாகப் பொருளாதார வல்லுநர்கள் எச்சரிக்கின்றனர்.