2018-ல் வெளியான ‘சர்க்கார்’ திரைப்படத்தில், ஒரே ஒரு வாக்கின் வலிமை என்ன என்பதையும், அந்த ஒரு வாக்கு ஒரு நாட்டின் தலையெழுத்தையே எப்படி மாற்றும் என்பதையும் விஜய் மிக ஆவேசமாகப் பேசியிருப்பார்.

“ஒரு ஓட்டுதானேன்னு அசால்ட்டா விட்றாதீங்க, அந்த ஒரு ஓட்டுதான் உங்களை ஆளப்போறது யாருன்னு முடிவு பண்ணும்” என்ற அந்தத் திரைவசனம், 2026 தமிழகச் சட்டமன்றத் தேர்தலில் நிஜமாகவே ஒரு வரலாற்றுச் சம்பவமாக மாறியிருக்கிறது. திரைப்படத்தில் விஜய் பேசிய அதே ‘ஒரே ஒரு வாக்கு’ தத்துவத்தை, இன்று திருப்பத்தூர் தொகுதியில் தமிழக வெற்றிக் கழகத்தின் வேட்பாளர் சீனிவாச சேதுபதி நிஜமாக்கி காட்டியுள்ளார்.

திருப்பத்தூர் தொகுதியில் நடைபெற்ற வாக்கு எண்ணிக்கையின்போது நிலவிய விறுவிறுப்பு, ஒரு திரில்லர் திரைப்படத்தையே மிஞ்சும் வகையில் இருந்தது. திமுகவின் மூத்த தலைவரும், அனுபவம் வாய்ந்த அமைச்சருமான பெரிய கருப்பனை எதிர்த்து போட்டியிட்ட தவெக-வின் இளம் வேட்பாளர் சீனிவாச சேதுபதி, இறுதிவரை மிக கடுமையான போராட்டத்தை வெளிப்படுத்தினார். வாக்கு எண்ணிக்கை முடிவில், சீனிவாச சேதுபதி வெறும் ‘ஒரே ஒரு வாக்கு’ வித்தியாசத்தில் வெற்றி பெற்றதாக அறிவிக்கப்பட்டபோது, தமிழகமே அந்த தீர்ப்பை கண்டு வியப்பில் ஆழ்ந்தது.

ஒரு அமைச்சரை, அதுவும் பலமுறை வெற்றி பெற்ற ஒரு மூத்த அரசியல்வாதியை, அரசியலுக்கு புதியவரான ஒரு இளைஞர் வெறும் ஒற்றை வாக்கு வித்தியாசத்தில் வீழ்த்தியது என்பது சாதாரணமான விஷயம் அல்ல. இது சர்க்கார் படத்தில் விஜய் சொன்ன “ஒவ்வொரு ஓட்டும் ஒரு ஆயுதம்” என்ற கருத்தை வாக்காளர்கள் எவ்வளவு ஆழமாகப் புரிந்து கொண்டுள்ளனர் என்பதற்குச் சான்றாகும். அந்த ஒரே ஒரு வாக்கைப் பதிவு செய்த வாக்காளர், அன்று அந்த ஒரு நிமிட நேரத்தை ஒதுக்கித் தனது கடமையைச் செய்யாமல் இருந்திருந்தால், இன்று திருப்பத்தூரின் முடிவே மாறியிருக்கும்.

இந்த வெற்றி, தமிழக வெற்றிக் கழகத்தின் தொண்டர்களுக்கு ஒரு மிகப்பெரிய உற்சாகத்தை தந்துள்ளதோடு, இனி வரும் காலங்களில் ஒவ்வொரு வாக்காளரையும் எவ்வளவு கவனமாகக் கையாள வேண்டும் என்ற பாடத்தையும் கற்றுத் தந்துள்ளது. 108 தொகுதிகளில் தவெக வெற்றி பெற்றுள்ள நிலையில், இந்தத் திருப்பத்தூர் வெற்றிதான் ஒட்டுமொத்த அரசியல் களத்திலும் மிக அதிகமாக விவாதிக்கப்படும் வெற்றியாக மாறியுள்ளது. திராவிடப் பேரியக்கங்களின் அசுர பலத்தையும், பண பலத்தையும் தாண்டி அந்த ‘ஒரே ஒரு வாக்கு’ நீதியை நிலைநாட்டியுள்ளது.