தனது வளர்ச்சிக்காகத் தனுஷ் செய்த உதவிகளை நினைவுகூர்ந்து விக்னேஷ் சிவன் வருத்தம் தெரிவித்துள்ளார்.

நெட்பிளிக்ஸ் தளத்தில் வெளியான நயன்தாராவின் திருமண ஆவணப்படத்தில், தனுஷ் தயாரிப்பில் விக்னேஷ் சிவன் இயக்கிய 'நானும் ரவுடிதான்' திரைப்படத்தின் சில நொடிக் காட்சிகளைப் பயன்படுத்தியது தொடர்பாகச் சிக்கல் எழுந்தது. இதற்குத் தனுஷ் தரப்பில் ரூ. 10 கோடி நஷ்டஈடு கேட்டு நோட்டீஸ் அனுப்பப்பட்டதைத் தொடர்ந்து, இரு தரப்புக்கும் இடையே சமூக வலைதளங்களில் மோதல் வெடித்தது.\

நீண்ட மௌனத்திற்குப் பிறகு இந்த விவகாரம் குறித்துப் பேசியுள்ள விக்னேஷ் சிவன், "தனுஷ் உடனான நட்பு முறிந்ததை எனது வாழ்க்கையின் மிகப்பெரிய இழப்பாகக் கருதுகிறேன். எங்களின் இந்த நிலைக்குக் காரணமாக இருந்தவர் அவர். ஏதோ ஒரு இடத்தில் நான் தவறு செய்திருக்கலாம் என்று இப்போது தோன்றுகிறது" எனத் தெரிவித்துள்ளார்.

"நான் இன்று இந்த உயரத்திற்கு வரக் காரணமாக இருந்தவர்களில் தனுஷ் முக்கியமானவர். அதை என்னால் எப்போதும் மறக்க முடியாது. இந்தச் சூழல் எனக்கு மிகுந்த மன உளைச்சலைத் தருகிறது" என உருக்கமாகக் கூறியுள்ளார்.

விக்னேஷ் சிவனின் இந்தத் திடீர் மனமாற்றம் மற்றும் சமரசப் பேச்சு, தனுஷ் தரப்பைச் சமாதானப்படுத்துமா என்ற எதிர்பார்ப்பை ஏற்படுத்தியுள்ளது. 'நானும் ரவுடிதான்' படத்தின் போது உருவான இவர்களது நட்பு, அதே படத்தின் காட்சியால் முறிந்தது திரையுலகினரிடையே சோகத்தை ஏற்படுத்தியிருந்தது. தற்போது விக்னேஷ் சிவனின் இந்த உருக்கமான பேச்சுக்குத் தனுஷ் தரப்பிலிருந்து என்ன பதில் வரும் என்பதை ரசிகர்கள் ஆவலுடன் எதிர்பார்த்துக் காத்துள்ளனர்.