மேற்கு வங்க சட்டமன்றத் தேர்தல் முடிவுகள் வெளியாகி 2 நாட்களே ஆன நிலையில், சந்தேஷ்காளி பகுதியில் நேற்று இரவு பெரும் வன்முறை வெடித்தது.

நள்ளிரவில் ரோந்துப் பணியில் ஈடுபட்டிருந்த காவல்துறையினர் மற்றும் மத்தியப் பாதுகாப்புப் படையினர் மீது மர்ம கும்பல் ஒன்று திடீரென துப்பாக்கிச் சூடு நடத்தியது. இந்தத் தாக்குதலில் 2 சிஆர்பிஎப் வீரர்கள் மற்றும் 3 காவல்துறையினர் என மொத்தம் 5 பேர் படுகாயமடைந்த சம்பவம் பெரும் அதிர்ச்சியை ஏற்படுத்தியுள்ளது.

பாதிக்கப்பட்டவர்களில் நஜாத் காவல் நிலைய அதிகாரி பாரத் புர்காயித் மற்றும் ஒரு பெண் காவலரும் அடங்குவர் எனத் தகவல்கள் தெரிவிக்கின்றன. இடிபாடுகளுக்கு இடையே காயமடைந்தவர்கள் உடனடியாக மீட்கப்பட்டு, முதலுதவிக்குப் பிறகு கொல்கத்தாவில் உள்ள அரசு மருத்துவமனைகளுக்கு மேல் சிகிச்சைக்காக அனுப்பி வைக்கப்பட்டனர். தேர்தல் முடிவுகளுக்குப் பிறகு அரசியல் ரீதியாக ஏற்கனவே பதற்றம் நிலவி வந்த நிலையில், இந்தத் துப்பாக்கிச் சூடு சம்பவம் நிலைமையை இன்னும் மோசமாக்கியுள்ளது.