தமிழக சட்டமன்றத் தேர்தல் முடிவுகள் வெளியாகிப் புதிய ஆட்சி அமைப்பதற்கான பணிகள் நடைபெற்று வரும் நிலையில், முதலமைச்சர் மு.க.ஸ்டாலின் தலைமையிலான 16-வது சட்டமன்றத்தைக் கலைக்க ஆளுநர் ஆர்.என்.ரவி இன்று அதிகாரப்பூர்வமாக உத்தரவிட்டுள்ளார்.

தமிழகத் தலைமைத் தேர்தல் அதிகாரி வெற்றி பெற்ற 234 உறுப்பினர்களின் பட்டியலை ஆளுநரிடம் வழங்கியதைத் தொடர்ந்து, அரசியலமைப்புச் சட்ட நடைமுறைகளின்படி இந்த நடவடிக்கை எடுக்கப்பட்டுள்ளது. இதன் மூலம் கடந்த 5 ஆண்டுகளாகச் செயல்பட்டு வந்த தற்போதைய சட்டமன்றத்தின் ஆயுட்காலம் முறைப்படி முடிவுக்கு வந்துள்ளது.

புதிய சட்டமன்றம் அமைப்பதற்கும், புதிய அமைச்சரவை பதவியேற்பதற்கும் ஏதுவாகப் பழைய சட்டமன்றத்தைக் கலைப்பது அவசியமான ஒன்று என்பதால் ஆளுநர் இந்த ஆணைப் பிறப்பித்துள்ளார். தமிழக வெற்றிக் கழகம் தலைமையிலான புதிய அரசு அமைய உள்ள சூழலில், இந்தச் சட்டமன்றக் கலைப்பு ஒரு மிக முக்கிய சட்டப்பூர்வ நகர்வாகப் பார்க்கப்படுகிறது. ஆளுநரின் இந்த அறிவிப்பைத் தொடர்ந்து, புதிய சட்டமன்ற உறுப்பினர்கள் பதவியேற்பதற்கான அடுத்தகட்ட ஆயத்தப் பணிகளைச் சட்டமன்றச் செயலகம் தற்போது தீவிரப்படுத்தியுள்ளது.

வரும் மே 7-ம் தேதி தமிழகத்தின் புதிய முதலமைச்சராகத் தவெக தலைவர் விஜய் பதவியேற்க உள்ள நிலையில், அதற்கு முன்பாகப் புதிய சட்டமன்றக் கூட்டத்தொடருக்கான அறிவிப்புகளும் விரைவில் வெளியாகும் என எதிர்பார்க்கப்படுகிறது. 17-வது தமிழக சட்டமன்றத்தின் முதல் கூட்டத்தொடரில் அனைத்துப் புதிய உறுப்பினர்களும் முறைப்படி பதவியேற்றுக் கொள்வார்கள். தமிழக அரசியலில் ஒரு சகாப்தம் முடிந்து, புதியதொரு அரசியல் பயணம் தொடங்குவதற்கான முதற்படியாக ஆளுநரின் இந்தச் சட்டமன்றக் கலைப்பு உத்தரவு அமைந்துள்ளது.