மெஸ்ஸியின் கேரள வருகைக்காக மேற்கொள்ளப்பட்ட ஏற்பாடுகளில் அரசு கருவூலத்திற்கு ரூ.22 கோடிக்கு மேல் பெரும் நிதி இழப்பு ஏற்பட்டுள்ளதாக விளையாட்டுத் துறை நடத்திய விசாரணையில் அதிகாரப்பூர்வமாகத் தெரியவந்துள்ளது.

போட்டி ரத்து

கொச்சி ஜவாஹர்லால் நேரு சர்வதேச மைதானத்தில் அர்ஜென்டினா மற்றும் ஆஸ்திரேலியா ஆகிய இரு முன்னணி சர்வதேச அணிகள் மோதும் நட்புரீதியான கால்பந்து போட்டியை பிரமாண்டமாக நடத்தத் திட்டமிடப்பட்டிருந்தது. இருப்பினும், சர்வதேச கால்பந்து கூட்டமைப்பான ஃபிஃபா (FIFA) அமைப்பின் ஒப்புதலைப் பெறுவதில் ஏற்பட்ட தேவையற்ற தாமதம் மற்றும் ஸ்பான்சர்களின் நிதிச் சிக்கல்கள் காரணமாக இப்போட்டி ஒத்திவைக்கப்பட்டு இறுதியில் முற்றிலும் ரத்தானது என்பது குறிப்பிடத்தக்கது.

ஜிஎஸ்டி விசாரணை

இவ்விவகாரத்தில் எழுந்த ஜிஎஸ்டி வரி முறைகேடுகள் குறித்து விரிவாக விசாரிக்க வணிக வரிகள் மற்றும் ஜிஎஸ்டி துறை சார்பில் சிறப்பு விசாரணைக் குழு (SIT) அமைக்கப்பட்டுள்ளது. அர்ஜென்டினா கால்பந்து சங்கம் (AFA) உடன் ஒப்பந்தம் செய்ய தனியார் நிறுவனத்திற்கு எந்த விதிமுறைகளின் கீழ் அனுமதி வழங்கப்பட்டது என்பது குறித்தும், அந்நிறுவனத்தின் நிதித்திறன், சந்தை மதிப்பு மற்றும் நிதி ஆதாரம் ஆகியவை சரியாக ஆராயப்பட்டதா என்பது குறித்தும் கேள்விகள் எழுப்பப்பட்டு தீவிர விசாரணை நடத்தப்பட்டு வருகிறது.

முந்தைய இடதுசாரி ஜனநாயக முன்னணி (LDF) ஆட்சிக் காலத்தில் இதற்கான நோட்டீஸ் அனுப்பப்பட்ட நிலையில், அதன்பின்னர் அந்த நோட்டீஸ் மீதான நடவடிக்கைகள் ஏன் நிறுத்தி வைக்கப்பட்டன என்பது குறித்தும் இந்த சிறப்பு விசாரணைக் குழு விரிவாக ஆய்வு செய்யும் எனத் தெரிவிக்கப்பட்டுள்ளது. இதன் மூலம் அரசுக்கு ஏற்பட்ட நிதி இழப்பிற்கு காரணமானவர்கள் மீது கடுமையான சட்ட ரீதியான நடவடிக்கை பாயும் என எதிர்பார்க்கப்படுகிறது.

அரசு நடவடிக்கை

விளையாட்டுத் துறை செயலாளர் சமர்ப்பித்துள்ள விரிவான விசாரணை அறிக்கை மற்றும் பரிந்துரைகளின் அடிப்படையில் தவறு செய்தவர்கள் மீது தகுந்த சட்ட ரீதியான நடவடிக்கைகள் விரைவில் மேற்கொள்ளப்படும் எனத் தெரிவிக்கப்பட்டுள்ளது. இந்தியாவில் மெஸ்ஸி மேற்கொண்ட 'GOAT India Tour' சுற்றுப்பயணத்தின் போது கொல்கத்தா, ஹைதராபாத், மும்பை மற்றும் புதுடெல்லி ஆகிய முக்கிய நகரங்களுக்குச் சென்று ரசிகர்களை நேரில் சந்தித்து உற்சாகப்படுத்திய நிலையில், கேரள வருகை ரத்தானது அம்மாநில கால்பந்து ரசிகர்களிடையே பெரும் ஏமாற்றத்தை ஏற்படுத்தியது என்பது குறிப்பிடத்தக்கது.