இன்னும் ஒருநாளே இருக்கும் நிலையில் காங்கிரஸ் தலைவர் ராகுல் காந்தி இன்று காங்கிரஸ் மற்றும் தி.மு.க கூட்டணி வேட்பாளர்களை ஆதரித்து பிரச்சாரம் மேற்கொண்டார்.

அப்போது பேசிய ராகுல் காந்தி, "புதுச்சேரிக்கு வருவது எனக்கு எப்போதும் மகிழ்ச்சி அளிக்கும் ஒரு விஷயம். இப்பகுதியின் இயற்கை அழகு ஈடுஇணையற்றது என்பது மட்டுமல்லாமல், புதுச்சேரி மக்களின் அன்பு, பாசம் மற்றும் பண்பு ஆகியவற்றையும் நான் ஆழமாக மதிக்கிறேன்.

ஆனால், சமீபகாலமாக நான் இங்கு வரும்போது ஒருவித சோகத்தை உணர்கிறேன். இந்த மாநிலம் அதன் சொந்த மக்களால் ஆளப்படவில்லை என்று நான் உணர்கிறேன். புதுச்சேரி அரசு என்பது மக்களின் விருப்பத்தின் வெளிப்பாடாக இல்லாமல், டெல்லியால் திணிக்கப்பட்ட ஒன்றாக இருப்பது தெளிவாகத் தெரிகிறது.

இங்கு நீண்டகாலமாக முழு மாநில அந்தஸ்து கோரிக்கை இருந்து வருகிறது. பா.ஜ.க இதனை வாக்குறுதியாக அளித்தும், இன்னும் நிறைவேற்றாமல் இருக்கிறது. புதுச்சேரிக்கு முழு மாநில அந்தஸ்து வழங்குவதில் காங்கிரஸ் உறுதியுடன் இருக்கிறது.

பா.ஜ.க இந்த மாநிலத்தை 'ரிமோட் கண்ட்ரோல்' மூலம் இயக்குகிறது; மக்களின் விருப்பத்தை மீறுவதற்கான ஒரு கருவியாகத் துணைநிலை ஆளுநர் செயல்படுகிறார்.

புதுச்சேரி அதானிக்குச் சொந்தமாக வேண்டும் என்று பா.ஜ.க விரும்புகிறது. காரைக்கால் துறைமுகம் ஏற்கனவே அவருக்கு விற்கப்பட்டுவிட்டது. அவர் 'அதானி எலக்ட்ரிசிட்டி புதுச்சேரி லிமிடெட்' (AEPL) என்ற நிறுவனத்தைத் தொடங்கியுள்ளார், இது உங்கள் மின்சாரமும் விரைவில் அவரிடம் ஒப்படைக்கப்படலாம் என்பதைக் காட்டுகிறது.

புதுச்சேரி போலி மருந்துகளின் மையமாக மாறியுள்ளது; பெரிய அளவில் போலி மருந்து உற்பத்தி நடந்தாலும் எந்த நடவடிக்கையும் எடுக்கப்படவில்லை. இந்த மருந்துகள் நாடு முழுவதும் அனுப்பப்படுகின்றன. இது வெறும் ஊழல் மட்டுமல்ல - கொலையுடன் கூடிய ஊழல். எனவே புதுச்சேரி மக்கள் பா.ஜ.க கூட்டணியை தோற்கடிக்க வேண்டும்" என தெரிவித்துள்ளார்.