ஏற்கனவே ஆடியோ வடிவில் ரசிகர்களிடையே பெரும் வரவேற்பைப் பெற்ற இந்தப் பாடல், தற்போது பிரம்மாண்டமான காட்சிகளுடன் வெளியாகி மேலும் கவனம் ஈர்த்துள்ளது.

இந்த மியூசிக் வீடியோ மூலம் 'டாக்ஸிக்' திரைப்படத்தின் மர்மமான உலகை ரசிகர்கள் முதன்முறையாக காட்சியாக காணும் வாய்ப்பு கிடைத்துள்ளது. திரைப்படத்தின் அதிகாரப்பூர்வ இசை கூட்டாளியான Zee Music வெளியிட்டுள்ள இந்த வீடியோ சமூக வலைதளங்களில் வேகமாக வைரலாகி வருகிறது.

ராக்கிங் ஸ்டார் யாஷ் மற்றும் கியாரா அத்வானி முதல் முறையாக இணைந்து நடித்துள்ள இந்த பாடல், இருவருக்கும் இடையேயான காதல் மற்றும் கெமிஸ்ட்ரியை உணர்வுபூர்வமாக வெளிப்படுத்துகிறது. கண்கவர் ஒளிப்பதிவு, பிரம்மாண்ட காட்சியமைப்பு, கிட்டார் இசை மற்றும் ஆர்கெஸ்ட்ரா பின்னணி ஆகியவை பாடலுக்கு தனித்துவமான அனுபவத்தை வழங்குகின்றன.

மியூசிக் வீடியோ வெளியீட்டுக்கு முன்பு, சமூக வலைதளங்களில் நடைபெற்ற சுவாரஸ்யமான பதிவுகளும் ரசிகர்களின் எதிர்பார்ப்பை அதிகரித்தன. "திருடப்பட்ட சில தருணங்களில் மட்டுமே வாழும் தடைசெய்யப்பட்ட காதலை என்னவென்று அழைப்பீர்கள்?" என்ற கேள்விக்கு கியாரா அத்வானி "தபாஹி" என்று பதிலளித்திருந்தது ரசிகர்களிடையே பேசுபொருளானது.

இசையமைப்பாளர் விஷால் மிஸ்ரா இசையமைத்து பாடியுள்ள இந்தப் பாடல், இந்தி, தமிழ், தெலுங்கு, கன்னடம் மற்றும் மலையாளம் ஆகிய மொழிகளில் வெளியாகியுள்ளது. தமிழ் பதிப்பிற்கான பாடல் வரிகளை விக்னேஷ் சிவன் எழுதியுள்ளார். மற்ற மொழிகளில் யோகராஜ் பட், ராமஜோகைய்யா சாஸ்திரி மற்றும் ரஃபீக் அகமது ஆகியோர் வரிகளை எழுதியுள்ளனர்.

பாடல் குறித்து விஷால் மிஸ்ரா கூறுகையில், "'தபாஹி' என்பது வழக்கமான காதல் பாடல் அல்ல. எல்லைகளைக் கடக்கும் தீவிரமான காதலின் உணர்வை இசையாக வெளிப்படுத்த முயன்றிருக்கிறோம். யாஷின் திரை ஆளுமைக்கு ஏற்ற தீவிரத்தை ஒவ்வொரு ஸ்வரத்திலும் பதிவு செய்ய விரும்பினேன்" என்றார்.

யாஷ் மற்றும் இயக்குநர் கீது மோகன்தாஸ் இணைந்து கதை எழுதியுள்ள இப்படத்தை கீது மோகன்தாஸ் இயக்கியுள்ளார். யாஷ், நயன்தாரா, கியாரா அத்வானி, தாரா சுதாரியா, ருக்மிணி வசந்த், ஹுமா குரேஷி உள்ளிட்டோர் நடித்துள்ள 'டாக்ஸிக்' திரைப்படம், ஆகஸ்ட் 26, 2026 அன்று உலகம் முழுவதும் திரையரங்குகளில் வெளியாக உள்ளது.