பழங்கள் மற்றும் காய்கறிகள் நம் உடலுக்குத் தேவையான வைட்டமின்கள், தாதுக்கள், நார்ச்சத்து மற்றும் ஆன்டிஆக்சிடென்ட்கள் போன்ற ஊட்டச்சத்துக்களை நிறைவாகக் கொண்டுள்ளன.

ஒவ்வொரு நிறத்திலும் உள்ள பழங்கள் மற்றும் காய்கறிகள் தனித்துவமான ஊட்டச்சத்துக்களைக் கொண்டிருப்பதால், நமது அன்றாட உணவில் பல வண்ணக் கலவையான பழங்கள், காய்கறிகளைச் சேர்ப்பது மிகவும் அவசியம்.

• சிவப்பு நிறப் பழங்கள் மற்றும் காய்கறிகள் லைக்கோபின் எனும் ஆன்டிஆக்சிடன்ட் சத்து நிறைந்தது. இது இரத்த அழுத்தத்தைக் கட்டுப்படுத்தவும், கெட்ட கொழுப்பைக் குறைக்கவும் உதவுகிறது. மேலும், சூரிய கதிர்வீச்சால் சருமத்திற்கு ஏற்படும் பாதிப்புகளைக் குறைப்பதோடு, புற்றுநோய் அபாயத்தையும் குறைக்க உதவுகிறது. உதாரணமாக, தக்காளி மற்றும் தர்பூசணி லைக்கோபின் சத்தின் சிறந்த ஆதாரங்கள்.

• நீலம், ஊதா நிறப் பழங்கள் மற்றும் காய்கறிகளில் அந்தோசயனின் எனும் ஆன்டிஆக்சிடன்ட் நிறைந்துள்ளது. இது இதய ஆரோக்கியத்தை மேம்படுத்துவதோடு, நினைவாற்றலை அதிகரிக்கவும் உதவுகிறது. திராட்சை மற்றும் நாவல் பழம் போன்ற பழங்கள் இந்த சத்துக்களைக் கொண்டுள்ளன. இவை உடலில் உள்ள தேவையற்ற வீக்கத்தைக் குறைக்கவும் உதவுகின்றன.

• பச்சை நிறப் பழங்கள் மற்றும் காய்கறிகளில் குளோரோஃபில் எனும் சத்து நிறைந்துள்ளது. இது உடலின் திசுக்களைப் புதுப்பிக்கவும், பாக்டீரியாக்களின் வளர்ச்சியைத் தடுக்கவும் உதவுகிறது. மேலும், இவை நோய் எதிர்ப்பு சக்தியை அதிகரிக்கவும், எலும்புகளை வலுப்படுத்தவும் உதவுகின்றன. கீரை வகைகள் மற்றும் பச்சை மிளகாய் போன்றவை குளோரோஃபில் சத்தின் சிறந்த ஆதாரங்கள்.

• மஞ்சள், ஆரஞ்சு நிறப் பழங்கள் மற்றும் காய்கறிகளில் கரோட்டின் எனும் சத்து நிறைந்துள்ளது. இது கண்களின் ஆரோக்கியத்திற்கு மிகவும் நல்லது. மேலும், இவை நோய் எதிர்ப்பு சக்தியை அதிகரிக்கவும், இதய ஆரோக்கியத்தைப் பாதுகாக்கவும் உதவுகின்றன. ஆரஞ்சு, மாம்பழம் மற்றும் கேரட் போன்றவை இந்த சத்துக்களைக் கொண்டுள்ளன.

இவ்வாறு, ஒவ்வொரு நிறப் பழம் மற்றும் காய்கறியும் ஒவ்வொரு விதமான ஆரோக்கிய நன்மைகளை வழங்குகிறது. எனவே, நமது உணவில் பல வண்ணக் கலவையான பழங்கள் மற்றும் காய்கறிகளைச் சேர்ப்பதன் மூலம், உடலுக்குத் தேவையான அனைத்து ஊட்டச்சத்துக்களையும் பெறலாம். இது ஆரோக்கியமான வாழ்க்கை முறைக்கு வழிவகுக்கும்.