காய்கறிகள் நமது உணவில் முக்கிய இடம் பிடிக்கும் பொக்கிஷங்கள் எனலாம். இவற்றில் நிறைந்திருக்கும் வைட்டமின்கள், தாதுப் பொருட்கள் மற்றும் நாச்சத்துக்கள் நம் உடலுக்குத் தேவையான ஊட்டச்சத்துக்களை வழங்குகின்றன.
காய்கறிகளில் உள்ள வைட்டமின்கள் நம் உடலின் நோய் எதிர்ப்பு சக்தியை அதிகரிக்கின்றன. தாதுப் பொருட்கள் எலும்புகள் மற்றும் பற்கள் வலுவாக இருக்க உதவுகின்றன. நார்ச்சத்து செரிமானத்தை எளிதாக்கி நீண்ட நேரம் பசி எடுக்காமல் இருக்க உதவுகிறது. மேலும், காய்கறிகளில் உள்ள ஆன்ட்டிஆக்ஸிடென்ட்கள் புற்றுநோய் போன்ற நாள்பட்ட நோய்களிலிருந்து நம்மைப் பாதுகாக்கின்றன.
காய்கறிகளில் சத்துக்கள் எப்படி அழிந்து போகின்றன?
காய்கறிகளை நீண்ட நேரம் சமைக்கும்போது அவற்றில் உள்ள நீர் ஆவியாகி அதனுடன் சத்துக்களும் வெளியேறிவிடும். இவற்றை அதிக வெப்பத்தில் சமைக்கும்போது வைட்டமின்கள் சிதைந்து போகின்றன.
காய்கறிகளை நீண்ட நேரம் தண்ணீரில் ஊற வைப்பதால் நீரில் கரையக்கூடிய வைட்டமின்கள் தண்ணீரில் கரைந்து வெளியேறும். உலோக பாத்திரங்களில் காய்கறிகளை சமைக்கும்போது வைட்டமின்கள் உலோகத்துடன் வினைபுரிந்து அழிந்து போகின்றன.
காய்கறிகளின் சத்துக்களை பாதுகாக்க என்ன செய்யலாம்?
காய்கறிகளை அதிகமாக சமைக்காமல் அவை மென்மையாகும் வரை சமைத்தல் மட்டுமே போதும். மிதமான வெப்பத்தில் அவற்றை சமைப்பதன் மூலம், விடமின்கள் சிதைவதைத் தடுக்கலாம்.
நீராவியில் காய்கறிகளை வேக வைக்கும்போது அவற்றில் இருக்கும் சத்துக்கள் வெளியேறும் வாய்ப்பு குறைவு. காய்கறிகளை சிறிதாக நறுக்கி சமைக்கும்போது அதன் சத்துக்கள் வெளியேறும் வாய்ப்புகள் அதிகம். எனவே, அவற்றை பெரிய துண்டுகளாக நறுக்கி சமைப்பது நல்லது.
காய்கறிகளை எப்போதும் குளிர்ந்த நீரில் கழுவுவதன் மூலம் நீரில் கரையக்கூடிய வைட்டமின்கள் வெளியேறும் அளவு குறையும். கண்ணாடி அல்லது செராமிக் பாத்திரங்களில் காய்கறிகளை சமைத்தால், அதில் உள்ள வைட்டமின்கள் உலோகத்துடன் வினைபுரிந்து அழிந்து போகும் வாய்ப்புகள் இல்லை.
காய்கறிகளை நீண்ட நேரம் வெட்டி வைத்து சமைக்கும்போது அதில் உள்ள வைட்டமின் சி ஆக்சிஜனுடன் வினைபுரிந்து அழிந்து போகும். எனவே, அவற்றை உடனடியாக வெட்டி சமைத்து விடுவது நல்லது.
காய்கறிகளில் உள்ள சத்துக்களை முழுமையாகப் பெறுவது நம் உடல் ஆரோக்கியத்திற்கு மிகவும் முக்கியமானது. மேற்கண்ட குறிப்புகளைப் பின்பற்றுவதன் மூலம், நாம் சமைக்கும் காய்கறிகளில் உள்ள பெரும்பாலான சத்துக்களை அப்படியே பாதுகாக்கலாம். ஆரோக்கியமான வாழ்க்கைக்கு நமது உணவில் காய்கறிகளுக்கு முக்கிய இடம் கொடுத்து, அவற்றை சரியான முறையில் சமைத்து சாப்பிடுவது அவசியம்.