இதனால் நோய்த்தொற்றுகள், ஆஸ்துமா, ஒவ்வாமை, துர்நாற்றம், பொருட்கள் சேதம் போன்ற அபாயங்கள் உருவாகும். இதைத் தடுக்க சுத்தம், நீர் கசிவு கட்டுப்பாடு, உணவை மூடி வைப்பது போன்ற அடிப்படை முறைகள் அவசியம் என கூறப்படுகிறது.

எந்த இடத்திலும் கரப்பான் பூச்சியைக் கண்டு விட்டால் அலறித் துடிப்பவர்கள் உண்டு. அதிலும் சமையலறையில் குறிப்பாக நாள், கிழமைகளில் பார்த்துவிட்டால் அவ்வளவுதான். அதை அடிக்கவும் மனம் வராமல் விடவும் மனம் வராமல் துடிப்போம்.

இப்படி சமையலறையில் இருக்கும் கரப்பான் பூச்சிகளை இரசாயனப் பொருட்கள் இல்லாமல் இயற்கையான முறையிலேயே விரட்டுவதற்கான எளிய வழிகள் மற்றும் வீட்டில் கரப்பான் பூச்சிகள் திடீரென அதிகமாகப் பெருகுவதற்குக் சாதகமான முக்கியக் காரணங்கள், அவை பெருகுவதால் ஏற்படும் விளைவுகளைப் பற்றி இப்பகுதியில் விரிவாக காண்போம்.

கரப்பான் பூச்சி அதிகமாகப் பெருகுவதற்கான காரணங்கள்:

உணவுக் கழிவுகள் மற்றும் திறந்தநிலை உணவுகள்:

​இரவில் சமையலறை மேடையில் சிந்திய உணவுத் துகள்கள், திறந்த நிலையில் வைக்கப்படும் உணவுகள் மற்றும் மூடப்படாத குப்பைத் தொட்டிகள் போன்றவை பூச்சிகளை எளிதில் ஈர்க்கின்றன. அவற்றைப் பிடித்து உண்பதற்காக கரப்பான் பூச்சிகள் படையெடுக்கின்றன.

​ஈரப்பதம் மற்றும் நீர் கசிவு:

​பாத்திரம் கழுவும் சிங்க் (Sink) அடியில் உள்ள நீர் கசிவு, கசியும் குழாய்கள் மற்றும் எப்போதும் ஈரப்பதமாக இருக்கும் பகுதிகள் கரப்பான் பூச்சிகள் தங்கி இனப்பெருக்கம் செய்ய ஏதுவான சூழலைத் தருகின்றன. ஆதலால் அந்தப் பகுதிகளை எப்பொழுதும் ஈரப்பதம் இல்லாமல் பார்த்துக் கொள்ள வேண்டியது அவசியம்.

இருட்டான மற்றும் பாதுகாப்பான மறைவிடங்கள்:

​பழைய காகிதப் பெட்டிகள் (Cardboard boxes), நாளிதழ்கள் அடுக்கி வைக்கப்பட்ட இடங்கள், மர அலமாரிகளின் இடுக்குகள் மற்றும் கேஸ் அடுப்பின் அடியில் உள்ள இடைவெளிகள் பூச்சிகள் முட்டையிடச் சிறந்த இடங்களாகும். இந்த பேப்பர்களை அவ்வப்பொழுது அப்புறப்படுத்தி விட வேண்டும். ஸ்டவ்வை எப்பொழுதும் சுத்தமாக துடைத்து வைக்க வேண்டும்.

இரவு நேரப் பாத்திரங்கள்:

​இரவில் கழுவாமல் சிங்க்கில் ஊறப்போடப்படும் எச்சில் பாத்திரங்கள் பூச்சிகளுக்குப் விருந்தாக அமைகின்றன. ஆதலால் எக்காரணத்தைக் கொண்டும் இரவில் சிங்க்கில் அழுக்குப் பாத்திரங்களைப் போடாமல் அவற்றை கழுவி வைத்து விட வேண்டும். அப்பொழுது கரப்பான் பூச்சி வருவதற்கு வாய்ப்பு இருக்காது.

​அண்டை வீடுகள் மற்றும் சாக்கடைகள்:

​வீட்டிற்கு வெளியே உள்ள சாக்கடை குழாய்கள், வடிகால்கள் (Drains) மற்றும் சுவர்களில் உள்ள சிறிய பிளவுகள் வழியாக அண்டை வீடுகளிலிருந்தும் பூச்சிகள் உள்ளே நுழைகின்றன. இந்த பிளவுகளில் இயற்கையான பூச்சி தெளிப்பான்களை தெளித்து வைத்தால் கரப்பான்களை பரவ விடாமல் தடுக்கலாம். இவையெல்லாம் முதற்படியாக செய்ய வேண்டிய பாதுகாப்பு முறைகள்.

​கரப்பான் பூச்சிகள் பெருகுவதால் ஏற்படும் விளைவுகள்:

நோய்த்தொற்றுகள் பரவுதல்: கரப்பான் பூச்சிகள் கழிவுநீர் மற்றும் அழுக்குப் பகுதிகளில் ஊர்ந்து வந்து நாம் உண்ணும் உணவின் மீது ஊர்வதால் சால்மோனெல்லா (Salmonella), இ.கோலை (E. coli) போன்ற ஆபத்தான பாக்டீரியாக்களைப் பரப்புகின்றன.இதனால் வாந்தி, வயிற்றுப்போக்கு, உணவு நஞ்சால் செரியாமை (Food Poisoning) மற்றும் டைபாய்டு போன்ற நோய்கள் ஏற்படுகின்றன.

​ஆஸ்துமா மற்றும் ஒவ்வாமை:

​கரப்பான் பூச்சிகளின் உதிரும் தோல், எச்சம் மற்றும் உமிழ்நீர் காற்றில் கலக்கும்போது, குறிப்பாகக் குழந்தைகளுக்கு ஆஸ்துமா, தும்மல், தோல் அரிப்பு மற்றும் ஒவ்வாமை (Allergies) போன்ற சுவாசப் பிரச்சினைகளை உண்டாக்கும்.

​உணவுப் பொருட்கள் பாழாதல்:

​அலமாரிகளில் உள்ள சமையல் பொருட்கள் மற்றும் சமைத்த உணவுகள் மீது பூச்சிகள் ஊர்வதால் உணவுகள் விஷத்தன்மையடைந்து வீணாகின்றன.

​துர்நாற்றம் மற்றும் அசுத்தம்:

​இவை அதிகமாகப் பெருகும்போது ஒருவிதமான அருவருப்பான துர்நாற்றத்தை (Musty odor) வெளிப்படுத்துகின்றன. மேலும், அலமாரிகள் மற்றும் சுவர்களில் கருப்பு நிறத்தில் எச்சங்களை விட்டுச் செல்லும்.

பொருட்கள் சேதமடைதல்:

​உணவைத் தவிர, புத்தகங்கள், காகிதங்கள், துணிகள் மற்றும் தோல் பொருட்களையும் கடித்துச் சேதப்படுத்தும் திறன் கொண்டவை.

​சுருக்கமாக சொல்லப் போனால் கரப்பான் பூச்சிகள் வெறும் அருவருப்பான பூச்சி மட்டுமல்ல, அவை வீட்டின் சுகாதாரத்திற்கு மிகப்பெரிய அச்சுறுத்தலாகும். நீர் கசிவை அடைத்து, உணவைப் பாதுகாப்பாக மூடி வைப்பதே இவை பெருகுவதைத் தடுக்கும் முதல் படியாகும்.

இப்படி முதல் படி சுத்தம் கரப்பான் பூச்சிகளை விரட்ட கை கொடுக்கவில்லையா அடுத்து செய்ய வேண்டிய வழிமுறைகள் இருக்கிறதே:

கரப்பான் பூச்சிகளை இரசாயனப் பொருட்கள் இல்லாமல் இயற்கையான முறையில் விரட்டுவதற்கான வழிகள்:

1. கிராம்பு (Clove):

​பயன்படுத்தும் முறை: கரப்பான் பூச்சிகள் அதிகம் நடமாடும் அலமாரிகளின் மூலைகள், சிங்க் அடியில் 5-10 கிராம்புகளைப் போட்டு வைக்கலாம் அல்லது கிராம்பு எண்ணெயைத் தெளிக்கலாம்.கிராம்பின் காரமான வலுவான வாசனை கரப்பான் பூச்சிகளுக்குக் அஜிர்ணத்தையும் ஒவ்வாமையையும் ஏற்படுத்தி அவற்றை உடனடியாக விரட்டும்.

​2. பிரியாணி இலை:

​காய்ந்த பிரியாணி இலைகளைக் கையால் நொறுக்கி, சமையலறை மூலைகள், கேஸ் அடுப்பின் அடியில் தூவி விட வேண்டும். பிரியாணி இலையில் உள்ள நறுமணம் கரப்பான் பூச்சிகளுக்குப் பிடிப்பதில்லை. இதனால் அதன் பெருக்கத்தை குறைக்கலாம்.

3. சமையல் சோடா மற்றும் சர்க்கரை:

சம அளவு சமையல் சோடா (Baking Soda) மற்றும் பொடித்த சர்க்கரையைக் கலந்து, கரப்பான் பூச்சிகள் வரும் வழிகளில் தூவ வேண்டும்.சர்க்கரையின் இனிப்புக்கு ஈர்க்கப்பட்டு சாப்பிடும் கரப்பான் பூச்சிகளின் வயிற்றில் சமையல் சோடா வினையாற்றி, அவற்றை முழுமையாக அழிக்கும்.

4. வேப்ப எண்ணெய் அல்லது வேப்பம்பவுடர்:

​1 லிட்டர் தண்ணீரில் 2 தேக்கரண்டி வேப்ப எண்ணெய் கலந்து சமையலறை மேடை மற்றும் மூலைகளில் தெளிக்கலாம். வேம்பில் உள்ள கசப்புத் தன்மையும் 'அசாடிராக்டின்' (Azadirachtin) என்ற கிருமிநாசினியும் கரப்பான் பூச்சிகளின் இனப்பெருக்கத்தைக் கட்டுப்படுத்தி அவற்றை விரட்டும்.

​5. மிளகு, பூண்டு மற்றும் வெங்காயக் கரைசல்:

1 தேக்கரண்டி மிளகுத்தூள், 1 பல் பூண்டு, பாதி வெங்காயம் ஆகியவற்றை அரைத்து 1 லிட்டர் நீரில் கலந்து கொதிக்க வைத்து, ஆறவைத்து ஸ்ப்ரே பாட்டிலில் ஊற்றிப் பூச்சிகள் மீது தெளிக்கலாம்.

இதன் நெடி பூச்சிகளை அருகே வரவிடாமல் தடுக்கும். மேலும் இவற்றை பாத்ரூம் கழிவறை பகுதிகளிலும் இரவில் தெளித்து வைத்தால் கரப்பான் பூச்சி நடமாட்டம் இருக்காது.

சுகாதாரப் பராமரிப்பு (முக்கியமானவை):

​ஈரப்பதத்தைத் தவிர்க்கவும்: இரவில் பாத்திரங்களைக் கழுவிச் சிங்க்கை காய்ந்த துணியால் துடைத்து வைக்க வேண்டும்.

​உணவுக் கழிவுகள்: சமையலறை குப்பைத் தொட்டியை எப்போதும் மூடி வைக்க வேண்டும்; உணவுச் சிந்தல்களை உடனுக்குடன் துடைக்க வேண்டும். குறிப்பாக குழந்தைகளுக்கு உணவு ஊட்டுபவர்கள் அந்த இடத்தை சுத்தமாக துடைத்து விட வேண்டும். சிறு பொருள் ஆனாலும் பாத்திரத்தில் வைத்து சாப்பிட வேண்டும். அப்பொழுது உணவுப் பொருள் சிந்துவதை தவிர்க்கலாம். இதனால் கரப்பான் பூச்சி பெருகுவதை தவிர்க்க முடியும்.

இதை வீட்டில் இருப்பவர்கள் அனைவரும் பின்பற்றினால் கரப்பான் பூச்சியை அண்ட விடாமல் விரட்டி அடிக்க முடியும்.

நச்சுத் தன்மையற்ற இயற்கை முறைகளைப் பின்பற்றுவதன் மூலம், உங்கள் சமையலறையை கரப்பான் பூச்சிகளின் ஆபத்து மற்றும் பக்க விளைவுகள் இல்லாத ஆரோக்கியமான இடமாக மாற்றலாம்.

Reference