பேரிடர் மீட்பு பணிக்கு ஆலோசனை வழங்க தமிழ்நாட்டை சேர்ந்த முன்னாள் ஐஏஎஸ் வி.கே.பாண்டியன் வெனிசுலா சென்றுள்ளார்.
வெனிசுலா நிலநடுக்க மீட்பு பணி
தென் அமெரிக்க நாடான வெனிசுலாவில் கடந்த ஜூன் 24 ஆம் திகதி இரட்டை நிலநடுக்கம் ஏற்பட்டது.
இந்த நிலநடுக்கத்தில், லட்சக்கணக்கான மக்கள் வீடுகளை இழந்துள்ள நிலையில், உயிரிழந்தோரின் எண்ணிக்கை 3,500 ஐ கடந்து விட்டது.
பேரிடரால் பாதிக்கப்பட்டுள்ள வெனிசுலாவிற்கு மீட்பு பணி, மருத்துவ மற்றும் அவசரகால உதவிகளை இந்தியா உள்ளிட்ட பல்வேறு நாடுகள் செய்து வருகின்றன.
'Operation Amistad' என்ற பெயரில் இந்திய ராணுவத்தின் கள மருத்துவமனை அங்கு தீவிர சிகிச்சை மற்றும் மருத்துவ உதவிகளை வழங்கி வருகிறது. 30 டன் நிவாரணப் பொருட்கள், 6 டன் மருந்துகள் மற்றும் மருத்துவ உபகரணங்கள் வழங்கப்பட்டுள்ளது.
வெனிசுலாவில் வி.கே.பாண்டியன்
தமிழ்நாட்டை சேர்ந்த ஒடிசா கேடர் முன்னாள் ஐஏஎஸ் அதிகாரி வி.கே.பாண்டியன் வெனிசுலாவிற்கு சென்று ஜனாதிபதி டெல்சி ரோட்ரிக்ஸைச் சந்தித்தோடு, மீட்பு பணி தொடர்பான ஆலோசனைகளை வழங்கியுள்ளார்.
மேலும், அங்கு பல்வேறு பகுதிகளுக்கு பயணம் செய்து பாதிக்கப்பட்டவர்களையும், நிவாரணம் மற்றும் மறுவாழ்வுப் பணிகளில் ஈடுபட்டுள்ள மீட்புப் பணியாளர்களையும் சந்தித்தார்.
ஒடிசா முன்னாள் முதல்வர் நவீன் பட்நாயக்கின் நம்பிக்கைக்குரியவராக திகழ்ந்த வி.கே.பாண்டியன், சுமார் 12 ஆண்டுகள் முதலமைச்சர் நவீன் பட்நாயக்கின் தனிச் செயலாளராக பணியாற்றினார்.
அக்டோபர் 2023 இல், ஐஏஎஸ் பதவியில் இருந்து விருப்ப ஓய்வு பெற்ற பாண்டியன், நவீன் பட்நாயக் முன்னிலையில் பிஜு ஜனதா தளத்தில் சேர்ந்தார்.
ஒடிசாவில் பிரச்சாரம் மேற்கொண்ட மோடி, அமித்ஷா உள்ளிட்டோர் வி.கே.பாண்டியனை குறிவைத்து பிரச்சாரம் மேற்கொண்டனர்.
2024 ஒடிசா சட்டமன்றத் தேர்தலில் பிஜு ஜனதா தளம் சந்தித்த பின்னடைவைத் தொடர்ந்து, அவர் அரசியலில் இருந்து விலகுவதாக அறிவித்தார்.
தமிழ்நாட்டின் மதுரை மாவட்டத்தில் பிறந்த இவர், மாற்றுத்திறனாளிகள் (PWDs) மறுவாழ்வுக்காக இந்திய குடியரசுத் தலைவரிடமிருந்து தேசிய விருது, எய்ட்ஸ் நோயாளிகளுக்காகப் பணியாற்றியதற்கான தேசிய விருது, நாட்டின் சிறந்த மாவட்டத்திற்கான NREGS தேசிய விருது என பல்வேறு விருதுகளை வென்றுள்ளார்.