இதுகுறித்து முதல்வர் விஜய் பேசியதாவது, "பல்லாயிரக்கணக்கான ஆண்டுகளுக்கு மேலான இலக்கண, இலக்கிய வளங்களுடன் இன்றளவும் உயிர்ப்புடன் பேசப்பட்டு வரும் உலகின் தொன்மையான மொழி என்றால், அது தமிழ் மட்டுமே. உலகம் முழுவதும் சுமார் 9 கோடி மக்களாலும், இந்தியாவில் சுமார் 8 கோடி மக்களாலும் பேசப்படும் தமிழ் மொழியைத் தாய்மொழியாகக் கொண்டிருப்பது நமக்கெல்லாம் கிடைத்த பெருமை.

தமிழை நாம் வெறும் மொழியாக மட்டும் கருதுவது இல்லை. அது நமது உணர்வோடும், உயிரோடும் ஒன்றிணைந்த அடையாளமாகக் கருதுகிறோம். 'தமிழ்' என்று வந்துவிட்டால் நமக்குள் ஒரு வேகம் பிறக்கிறது.

"இருந்தமிழே உன்னால் இருந்தேன் இமையோர்

விருந்து அமிழ்தம் என்றாலும் வேண்டேன்"

என்ற பாடலின் மூலம், தான் தமிழ் மொழியாலேயே வாழ்ந்து வருவதாகவும், சாகாவரம் கிடைக்கும் மருந்தாகிய அமுதத்தைக் காட்டிலும் தமிழ் மொழி மேலானது என்றும் கவிஞர் கூறுகிறார். இதை நினைத்துப் பார்க்கும்போது தமிழர்களாகிய நம்மிடையே போற்றத்தக்க ஈடற்ற உணர்ச்சியும் உருவாகிறது. சாதி, மதம், கட்சி வேறுபாடுகள் அனைத்தும் மறந்து 'தமிழன்' என்ற உணர்வு மட்டுமே மேலோங்கி இருக்கிறது.

அத்தகைய சிறப்புமிக்க தமிழ் நமது அலுவலக பயன்பாட்டிற்கு மட்டுமின்றி ஆட்சி, கல்வி, தொழில்நுட்பம், அறிவியல், மாவட்ட நீதிமன்றங்களிலும் பயன்படுத்தப்பட்டு வருகிறது. ஒன்றிய அரசு தமிழுக்கு 'கிளாசிக்கல் லாங்குவேஜ்' (செம்மொழி) என்ற சிறப்பைத் தந்து பெருமை சேர்த்துள்ளது.

தமிழை வளர்ப்பதும், பாதுகாப்பதும் நமது கடமை. அதுமட்டுமல்லாமல் வருங்கால தலைமுறைக்கும் தமிழை அதன் வளத்தையும், பெருமையையும் அழியாமல் கொண்டு சேர்ப்பது நமது பொறுப்பாகும்.

மாண்புமிகு பேரவைத் தலைவர் அவர்களே, தமிழ்நாடு ஆட்சிமொழிச் சட்டம் 1956 பிரிவு 2-ஆனது, "The official language of the State of Tamil Nadu shall be Tamil" என்று தெளிவாக அறிவிக்கிறது.

மேற்சொன்ன சட்டத்தின் பிரிவு 4-ஆனது, குறிப்பிட்ட ஆட்சிப் பணிகளுக்குத் தமிழைப் பயன்படுத்த அரசு அறிவிக்கை மூலம் உத்தரவிடலாம் என்று அதிகாரம் வழங்கியிருக்கிறது. அதிலும் முக்கியமாக, மேற்படி சட்டத்திற்கு 1976-ஆம் ஆண்டு செய்யப்பட்ட திருத்தங்களின் மூலம், உயர் நீதிமன்றத்தின் கீழ் செயல்படும் உரிமையியல் மற்றும் குற்றவியல் நீதிமன்றங்கள், தீர்ப்பாயங்கள், வாடகை நீதிமன்றங்கள் மற்றும் வருவாய் நீதிமன்றங்கள் ஆகியவைகளின் அனைத்து வழக்குகளிலும் சாட்சியங்களைப் பதிவு செய்வதற்கும், தீர்ப்புகளை... மற்றும் உத்தரவுகளைத் தமிழிலேயே எழுதத் தேர்ந்தெடுக்கும் சட்ட அங்கீகாரம் வழங்கப்பட்டுள்ளது.

எனவே, தமிழ்நாட்டின் மாவட்ட நீதிமன்றங்களில் தமிழில் ஏற்கனவே சட்டரீதியான நீதிமன்ற மொழியாக உள்ள நிலையில், அந்த நீதித்துறை அமைப்பின் மாநிலத்தின் உச்சநிலையில் உள்ள மெட்ராஸ் உயர் நீதிமன்றத்திலும் தமிழை முதன்மை மொழியாக அங்கீகரிக்க வேண்டியது காலத்தின் கட்டாயம்.

மாண்புமிகு பேரவைத் தலைவர் அவர்களே, இந்திய அரசியலமைப்புச் சட்டம் ஆர்ட்டிக்கிள் 348(1)-ன் படி, தற்போது இந்திய உச்ச நீதிமன்றம் மற்றும் அனைத்து உயர் நீதிமன்றங்களிலும் நடவடிக்கைகள் அனைத்தும் ஆங்கிலத்தில் பயன்படுத்தப்பட்டு வருகிறது. அதே ஆர்ட்டிக்கிள் 348 உட்பிரிவு 2-ஆனது, ஒரு மாநில ஆளுநர் குடியரசுத் தலைவரின் முன் ஒப்புதலுடன், அந்த மாநிலத்தின் ஆட்சிமொழியை அம்மாநில உயர் நீதிமன்றத்தின் நடவடிக்கைகளில் (proceedings) பயன்படுத்துவதற்கு அதிகாரம் வழங்கிட முடியும் என்று தெரிவிக்கிறது.

மேலும் ஆட்சிமொழிகள் சட்டம் 1963 பிரிவு 7-ன் படி, மாநிலத்தின் ஆளுநர் குடியரசுத் தலைவரின் முன் ஒப்புதலுடன் அம்மாநிலத்தின் ஆட்சிமொழியை ஆங்கிலத்துடன் கூடுதலாக உயர் நீதிமன்றத் தீர்ப்புகள், தீர்ப்பாணைகள் மற்றும் உத்தரவுகள் ஆகியவற்றிற்குப் பயன்படுத்துவதற்கு அதிகாரம் வழங்க வழிவகை செய்கிறது. அந்த மொழியில் வழங்கப்படும் தீர்ப்புடன் ஆங்கில மொழிபெயர்ப்பும் இணைக்கப்பட வேண்டும் என்று மேற்சொன்ன சட்டம் சொல்கிறது. எனவே, நாம் மெட்ராஸ் உயர் நீதிமன்றத்தில் தமிழ் மொழியை முதன்மை மொழியாகவும், ஆங்கிலத்திற்குச் சமமான நடைமுறை வாய்ப்பு வழங்கப்பட வேண்டும் என்றும் கருதுகிறோம்.

மாண்புமிகு பேரவைத் தலைவர் அவர்களே, இந்தக் கோரிக்கையை முன்னிறுத்தி 2006-ஆம் ஆண்டு டிசம்பர் 6-ஆம் தேதி, தமிழ்நாடு சட்டமன்றம் மெட்ராஸ் உயர் நீதிமன்றத்தில் தமிழைப் பயன்படுத்த வேண்டும் என்று ஒருமனதாகத் தீர்மானம் நிறைவேற்றியது. அந்தத் தீர்மானம் அரசியலமைப்புச் சட்ட நடைமுறையின் அடிப்படையில் ஒன்றிய அரசின் பரிசீலனைக்கு அனுப்பப்பட்டது. அன்றைய சட்டமன்ற விவாதங்களிலும் தமிழ் பயன்பாடு ஆங்கிலத்தை அகற்றும் நடவடிக்கை அல்ல; மாறாக, ஆங்கிலத்துடன் கூடுதலாகத் தமிழைப் பயன்படுத்தும் நடவடிக்கை என்ற கருத்தை வலியுறுத்தினோம்.

ஆனால், பின்னர் 2012-ஆம் ஆண்டு இந்திய உச்ச நீதிமன்ற முழு அமர்வு இந்த முன்மொழிவை ஏற்கவில்லை. அதன் காரணமாக ஒன்றிய அரசு மேல் நடவடிக்கை எடுக்கவில்லை என்றும் 2018-ஆம் ஆண்டு ஒன்றிய சட்ட அமைச்சகத்தால் தெரிவிக்கப்பட்டது.

மாண்புமிகு பேரவைத் தலைவர் அவர்களே, ஒரு கோரிக்கை ஒரு கட்டத்தில் நிராகரிக்கப்பட்டது என்பதால், அது என்றென்றும் முடிவுற்றுவிட்டது என்று பொருள் கொள்ள முடியாது. காலம் மாறியிருக்கிறது; தொழில்நுட்பம் மாறியிருக்கிறது; நீதித்துறையில் கணினிமயமாக்கல் வசதிகள் அதிகரித்துள்ளன. தமிழில் சட்டக் கல்வி, சட்ட நூல்கள், சட்ட அகராதிகள், தீர்ப்புகளின் மொழிபெயர்ப்புகள் ஆகியவை பெருமளவில் வளர்ந்துள்ளன.

எனவே, 2006-ஆம் ஆண்டிருந்த சூழ்நிலையின் அடிப்படையைக் கொண்டு, இன்றைய சூழ்நிலையை மதிப்பிடாமல், தற்போதைய வளர்ந்து வரும் ஆர்டிஃபிஷியல் இன்டெலிஜென்ஸ் (செயற்கை நுண்ணறிவு) தொழில்நுட்பம் மற்றும் நிர்வாகத் திறன்களைக் கருத்தில் கொண்டு, இந்த விவகாரத்தை மறுபரிசீலனை செய்ய வேண்டும் என்று ஒன்றிய அரசை வலியுறுத்துகிறோம்.

ஒரு சாதாரண குடிமகன்/குடிமகள் தனது வாழ்க்கை, நிலம், குடும்பம், சொத்து, வேலை, உரிமை ஆகியவை தொடர்புடைய வழக்கு நீதிமன்றத்தில் நடக்கும்போது, என்ன நடக்கிறது என்பதைத் தனது தாய்மொழியில் புரிந்துகொள்ள முடிந்தால், நீதி பெறுவதும் வழங்குவதும் வலுப்பெறும். நீதி பரிபாலனத்தில் மக்களே தங்கள் தாய்மொழியில் பங்கேற்பதால் நீதியின் கரங்கள் வலுப்பெறும். எனவே, நீதியின் மொழி மக்களுக்குப் புரியும் மொழியாக இருப்பது ஜனநாயகத்தின் அடிப்படை நோக்கமாகும்.

தமிழ்நாட்டின் மாவட்ட நீதிமன்றங்களில் தமிழ் பயன்படுத்தப்படுகிற நிலையில், அதனை மெட்ராஸ் உயர் நீதிமன்றத்திலும் விரிவுபடுத்துவது ஒரு இயல்பான அடுத்த கட்டமாகும். எனவே, தமிழ் மொழியை மெட்ராஸ் உயர் நீதிமன்றத்தின் முதன்மையான மொழியாக அங்கீகரிக்க வேண்டும். தமிழில் மனுக்கள், ஆவணங்கள் மற்றும் வாதங்களைச் சமர்ப்பிப்பதற்கு உரிய நடைமுறைகளை உருவாக்க வேண்டும். தீர்ப்புகள், தீர்ப்பாணைகள் மற்றும் உத்தரவுகள் அதிகாரப்பூர்வமாகத் தமிழில் வழங்கும் அமைப்பை உருவாக்க வேண்டும். நீதிபதிகள், வழக்கறிஞர்கள் மற்றும் நீதிமன்றப் பணியாளர்களுக்கான சட்டத் தமிழ் மற்றும் மொழிபெயர்ப்புப் பயிற்சியை ஏற்படுத்த வேண்டும்.

அரசியலமைப்புச் சட்டம் ஆர்ட்டிக்கிள் 348 பிரிவு 2 மற்றும் அபிஷியல் லாங்குவேஜஸ் ஆக்ட் 1963 பிரிவு 7 ஆகியவற்றின் கீழ் மாநில ஆளுநர் அவர்களால் அனுப்பப்படும் முன்மொழிவுகளின் மீது தேவையான அனைத்துச் சட்ட நடவடிக்கைகளையும் ஒன்றிய அரசு மேற்கொள்ள வேண்டும் என்று இந்தப்பேரவையின் மூலமாக வலியுறுத்த விரும்புகிறது நமது அரசு.

இது எந்த மொழிக்கும் எதிரான கோரிக்கை இல்லை. இந்தியாவின் பன்மைத்தன்மையை மதிக்கும் கோரிக்கை. இது ஆங்கிலத்தை அகற்றும் கோரிக்கை அல்ல; இது தமிழுக்குரிய அரசியலமைப்புச் சட்ட வாய்ப்பை வழங்க வேண்டும் என்ற கோரிக்கை. இது ஒரு மொழியின் பெருமைக்கான கோரிக்கை மட்டுமல்ல, இது ஒரு குடிமகன்/குடிமகள் தனது மொழியில் நீதியைப் புரிந்துகொள்ளவும், அணுகவும், அனுபவிக்கவும் உரிமை பெற வேண்டும் என்ற ஜனநாயகக் கோரிக்கையாகும்.

மாண்புமிகு பேரவைத் தலைவர் அவர்களே, தமிழ்நாடு சட்டமன்றம் ஒருமனதாக இந்த வரலாற்றுச் சிறப்புமிக்க தீர்மானத்தை நிறைவேற்றி, மெட்ராஸ் நீதிமன்றத்தில் தமிழ் முதன்மை மொழியாகப் பயன்படுவதற்குத் தேவையான நடவடிக்கைகளை ஒன்றிய அரசும், மாண்புமிகு குடியரசுத் தலைவரும் விரைந்து மேற்கொள்ள வேண்டும் என்பதற்கான தீர்மானத்தை இந்தப் பேரவையில் நான் முன்மொழிகிறேன்.

இதனை மாண்புமிகு உறுப்பினர்கள் அனைவரும் ஒருமனதாக நிறைவேற்றித் தர வேண்டுகிறேன்.

இதுகுறித்த உரையில், "தமிழ்நாட்டின் நகரங்களில் குடிநீர், பாதாள சாக்கடை, திடக்கழிவு மேலாண்மை, சாலைகள், பூங்காக்கள் மற்றும் பள்ளி வசதிகளை மேம்படுத்தும் வகையில், நகராட்சி நிர்வாகம் மற்றும் குடிநீர் வழங்கல் துறை சார்பில் பல்வேறு திட்டங்கள் நடைமுறைப்படுத்தப்பட்டு வருகின்றன.

வேகமாக அதிகரித்து வரும் நகரமயமாக்கல் மற்றும் மக்கள் தொகைப் பெருக்கத்தால், குடிநீர், கழிவுநீர் மற்றும் திடக்கழிவு மேலாண்மை, போக்குவரத்து, பசுமை மற்றும் அடிப்படைக் கட்டமைப்பு தொடர்பான தேவைகள் தொடர்ந்து அதிகரித்து வருகின்றன.

எதிர்காலத் தேவைகளைக் கருத்தில் கொண்டு, சுகாதாரமான, பாதுகாப்பான, பசுமையான, மக்கள் வாழ்வதற்கு ஏற்ற நகரங்களாக மாற்றுவது இன்றைய அவசியமாகும். இதனை முன்னிட்டு பல்வேறு திட்டங்களை அறிமுகப்படுத்துவது அரசின் முக்கிய கடமை" எனப் பேசினார்.

தொடர்ந்து, பல்வேறு தேவைகளை நிறைவேற்றும் திட்டங்களை அறிவிக்கத் தொடங்கினார்.

குடிநீர்

• வடசென்னை, ஆவடி, பொன்னேரி மற்றும் மீஞ்சூர் பகுதிகளில் குடிநீர் தேவையைப் பூர்த்தி செய்யும் வகையில், மீஞ்சூரில் நாள் ஒன்றுக்கு 400 மில்லியன் லிட்டர் கடல் நீரை குடிநீராக்கும் திட்டம் ரூ.4,800 கோடி மதிப்பீட்டில் அமைக்கப்படும்.

• ஆவடி மாநகராட்சியில் அனைத்து வீடுகளுக்கும் 24 மணிநேரமும் குடிநீர் வழங்கும் வகையில் ₹500 கோடி மதிப்பீட்டில் புதிய திட்டம் உருவாக்கப்படும்.

• மதுரை மாநகராட்சி, கோயம்புத்தூர் மாநகராட்சி மற்றும் 20 பேரூராட்சிகளில் குடிநீர் வசதிகளை மேம்படுத்தும் வகையில் 1000 கோடி ரூபாய் மதிப்பீட்டில் பழைய கூட்டு குடிநீர் திட்டங்களை சீரமைக்க, முதற்கட்டமாக 300 கோடி ரூபாய் ஒதுக்கப்படும்.

• சென்னை கீழ்ப்பாக்கம் குடிநீர் சுத்திகரிப்பு நிலையத்தின் திறனை அதிகரிக்க, ரூ.410 கோடி மதிப்பீட்டில் திட்டம் செயல்படுத்தப்படும்.

நவீன பாதாள சாக்கடை மற்றும் கழிவுநீர் மேலாண்மை

• மதுரை மாநகராட்சியில் உள்ள 40 ஆண்டுகள் பழமையான பாதாள சாக்கடை அமைப்பை சீரமைக்க 2400 கோடி ரூபாய் மதிப்பீட்டில் நடப்பு ஆண்டில் பணிகள் மேற்கொள்ளப்படும்.

• நாகர்கோவில் மாநகராட்சியில் விடுபட்ட பகுதிகள் மற்றும் குன்றத்தூர், நந்திவரம், கூடுவாஞ்சேரி நகராட்சிகளிலும் ரூ.960 கோடி மதிப்பீட்டில் பாதாள சாக்கடை அமைக்கப்படும்.

• சென்னை பெரம்பூர், கொளத்தூர், வில்லிவாக்கம், எழும்பூர் உள்ளிட்ட பகுதிகளில் குடிநீர் மற்றும் கழிவுநீர் அமைப்புகளை மேம்படுத்த ரூ.236 கோடி மதிப்பீட்டில் திட்டங்கள் செயல்படுத்தப்படும்.

அறிவியல் பூர்வமான திடக் கழிவு மேலாண்மை மற்றும் மின் உற்பத்தி

• திருநெல்வேலி மாநகராட்சியில் 256 கோடி மதிப்பீட்டில் 9 மெகா வாட் திறன் உற்பத்தி செய்யும் வகையிலும் சேலம் மாநகராட்சியில் 291 கோடி மதிப்பீட்டில் 10 மெகா வாட் திறன் உற்பத்தி செய்யும் வகையிலும் திடக்கழிவிலிருந்து எரிசக்தி உற்பத்தி செய்யும் திட்டங்கள் செயல்படுத்தப்படும். இந்த திட்டங்கள் மொத்தம் ரூ.547 கோடி மதிப்பீட்டில் செயல்படுத்தப்படும்.

மேம்படுத்தப்பட்ட நகர்புற சாலைகள் மற்றும் போக்குவரத்து கட்டமைப்பு

• குடிநீர் மற்றும் பாதாள சாக்கடை பணிகளுக்காக தோண்டப்பட்ட சேதமடைந்த சாலைகளை சிரமைக்கவும், புதிய சாலைகள் அமைக்கப்பவும், சென்னை உட்பட அனைத்து நகர்புற உள்ளாட்சிகளிலும் 1850 கோடி மதிப்பீட்டில் பணிகள் மேற்கொள்ளப்படும்.

• வெற்றித் தமிழகம் தொலைநோக்குத் திட்டத்தின் கீழ், சென்னை மாநகராட்சியில் 45 சதுர கிலோமீட்டர் பரப்பளவில் 35 கிலோமீட்டர் நீளத்திற்கு மக்கள் பயன்பாட்டிற்கு ஏற்ற நவீன சாலைகள் மற்றும் நடைபாதைகள் (People Friendly Modern Streets), பள்ளிகளைச் சுற்றி 15 கிலோமீட்டர் தூரத்திற்கு குழந்தைகளின் பாதுகாப்பை உறுதி செய்யும் சாலை வசதிகள் (Safe Access to Schools) மற்றும் 105 சாலை சந்திப்புகளை மேம்படுத்தும் பணிகள் ரூ.110 கோடி ரூபாய் மதிப்பீட்டில் மேற்கொள்ளப்படும்.

• பிற மாநகராட்சிகளிலும் இதே போன்ற நவீன சாலைகள் மற்றும் நடைபாதைகள், பள்ளிகளைச் சுற்றியுள்ள பாதுகாப்பான சாலை வசதிகள், சாலை சந்திப்பு மேம்பாட்டுப் பணிகள் ரூ.165 கோடி ரூபாய் மதிப்பீட்டில் மேற்கொள்ளப்படும்.

• இப்பணிகள் அனைத்தும் ரூ.275 கோடி ரூபாய் மதிப்பீட்டில் ஒருங்கிணைந்த நகர்ப்புற மேம்பாட்டுத் திட்டமாக செயல்படுத்தப்படும்.

நகர்ப்புற பசுமையாக்கல் மற்றும் பொழுதுபோக்கு பூங்காக்கள்

• சுற்றுச்சூழலை பாதுகாக்க மற்றும் நகரங்களின் பசுமை பரப்பை அதிகரிக்கவும், பொதுமக்களுக்கான பொழுதுபோக்கு வசதிகளை மேம்படுத்தவும் பல்வேறு பசுமை திட்டங்கள் செயல்படுத்தப்படும்.

• மக்கள் இயக்கமாக ஒரு கோடி மரக்கன்றுகள் நடப்பட்டு பராமரிக்கப்படும்.

• திருச்சி, திருப்பூர் மற்றும் புதுக்கோட்டை மாவட்டங்களில் பெரிய பூங்காக்கள் ரூ.130 கோடி ரூபாய் செலவிலும், மாநில முழுவதும் 250 புதிய பூங்காக்கள் ரூ.175 கோடி ரூபாய் செலவிலும், ஆக மொத்தம் ரூ.305 கோடி ரூபாய் செலவில் அமைக்கப்படும்.

பள்ளிகளில் உள்கட்டமைப்பு வசதிகளை மேம்படுத்துதல்

• நகர்ப்புற உள்ளாட்சிகளில் பள்ளிகளில் தரமான கல்வி மற்றும் பாதுகாப்பான சூழலை வழங்கும் வகையில் புதிய வகுப்பறைகள் கட்டுதல் மற்றும் நவீன வசதிகளை ஏற்படுத்துதல் உள்ளிட்ட பல்வேறு உள்கட்டமைப்புப் பணிகள் மொத்தம் ரூ.335 கோடி செலவில் மேற்கொள்ளப்படும்.

பாரம்பரிய நகரங்கள் மற்றும் சுற்றுலாத் தலங்களின் சீரமைப்பு

• சிதம்பரம் நகராட்சியில் நடைபெறும் உலகப் புகழ்பெற்ற அருள்மிகு தில்லை நடராஜர் திருத்தேர் விழாவை சிறப்பாக நடத்தவும், பக்தர்களுக்கு எந்தவித இடையூறின்றி தரிசனம் செய்யவும், கோவிலைச் சுற்றியுள்ள நான்கு ரத வீதிகளில் உள்ள பாதாள சாக்கடை வசதிகளை மேம்படுத்தி வான்வழி செல்லும் மின்சார கம்பிகளை தரைக்கடியில் கொண்டு சென்று வீதிகளை நவீன முறையில் சீரமைக்க ₹36 கோடி மதிப்பீட்டில் பணிகள் மேற்கொள்ளப்படும்.

• கடலூரில் தேவி கோட்டம் முதல் வெள்ளி கடற்கரை வரை ₹8 கோடி மதிப்பீட்டில் பாரம்பரிய நடைபாதை (Heritage Walk) அமைக்கப்படும்.

• கன்னியாகுமரி கடற்கரை பகுதிகளை அகலப்படுத்தி, சுற்றுலாப் பயணிகளுக்கான வசதிகளை மேம்படுத்த ₹50 கோடி செலவிடப்படும்.

சமச்சீர் வளர்ச்சி மற்றும் அடிப்படை வசதிகள் மேம்பாடு

• சென்னை மாநகராட்சியில் உட்கட்டமைப்பு வசதிகள் குறைவாக உள்ள பகுதிகளில் சாலைகள், மழைநீர் வடிகால்கள், தெருவிளக்குகள், நடைபாதைகள், திடக்கழிவு மேலாண்மை வசதிகள், விளையாட்டு மைதானங்கள் மற்றும் சமுதாய நலக்கூடங்கள் உள்ளிட்ட அடிப்படை வசதிகளை மேம்படுத்த ₹100 கோடி செலவிடப்படும்.