பேரா. நா. மணி

17வது தமிழ்நாடு சட்டமன்றத் தேர்தல், வரலாறு காணாத வாக்குப்பதிவுடன் நிறைவடைந்துள்ளது. தேர்தலுக்கு பல்வேறு அச்சு மற்றும் இணைய ஊடகங்கள் கருத்துக்கணிப்புகளை வெளியிட்டன.

அதற்கு மேலாக, அரசியல் ஆர்வலர்கள், ஆய்வாளர்கள் மற்றும் பொதுமக்கள் தங்கள் தனிப்பட்ட மதிப்பீடுகள், கணக்கீடுகள், அனுமானங்களை தொடர்ந்து பதிவு செய்து வருகின்றனர்.

அவ்வகையில், தர்க்க ரீதியான ஒரு கணக்கீட்டின் அடிப்படையில், கடந்த தேர்தலை விட திமுக கூட்டணி அதிக இடங்களைப் பெற்று வெற்றி பெறும் வாய்ப்பு உள்ளது என்பதும் ஓர் மதிப்பீடு.

இந்த மதிப்பீட்டை முன்வைக்க காரணங்கள்:

அடிப்படை வாக்கு வங்கிகளின் ஒருங்கிணைவு:

திமுக கூட்டணியில் இடம்பெற்றுள்ள கட்சிகள்-திமுக, காங்கிரஸ், இடதுசாரிகள், விடுதலை சிறுத்தைகள், மதிமுக போன்றவை-ஒவ்வொன்றும் தங்களுக்கென ஒரு நிலையான குறைந்தபட்ச வாக்கு வங்கியை கொண்டுள்ளன. இந்த அடிப்படை வாக்குகள் சிதறாமல் கூட்டணிக்குள் ஒருங்கிணைந்து செல்லும் போது, அது கணிசமான தேர்தல் பலனாக மாறும். மற்ற கூட்டணிகளுடன் ஒப்பிடும்போது, இத்தகைய உறுதியான வாக்கு அடித்தளம் திமுக கூட்டணிக்கே அதிகமாக உள்ளது.

அரசின் நலத்திட்டங்கள் மற்றும் நேரடி பயனாளர்கள்

கடந்த ஐந்து ஆண்டுகளில் திமுக அரசு செயல்படுத்திய பல திட்டங்கள் நேரடியாக மக்களின் வாழ்வைத் தொட்டுத் தூக்கியுள்ளன. குறிப்பாக, பெண்களை மையமாகக் கொண்ட திட்டங்கள் இதில் குறிப்பிடத்தக்கவை.

உதாரணமாக, விடியல் பயணம் ஏழை மற்றும் நடுத்தர பெண்களுக்கு மிகப்பெரிய நிவாரணமாக அமைந்தது. வேலை, குடும்ப அவசரம், மருத்துவ தேவைகள்-எதற்காகவும் பணமின்றி பயணம் செய்ய முடியும் என்ற நம்பிக்கையை இது உருவாக்கியுள்ளது.

அதேபோல், "புதுமைப்பெண்" போன்ற கல்வி மற்றும் சமூக முன்னேற்றத் திட்டங்களும் அடிமட்ட மக்களின் வாழ்க்கையில் நேரடி தாக்கத்தை ஏற்படுத்தியுள்ளன.

இந்தத் திட்டங்களின் பயனாளர்களில் குறைந்தபட்சம் 40% பேர் கூட வாக்களித்தால், அது தேர்தல் முடிவில் முக்கிய தாக்கத்தை ஏற்படுத்தும்.

சிறுபான்மை மக்களின் கேடயம்

தமிழ்நாட்டில் சிறுபான்மை சமூகங்கள் தங்களுக்கு பாதுகாப்பான அரசியல் அரணாக திமுக கூட்டணியைப் பார்க்கும் நிலை நீண்ட காலமாக உள்ளது.

இந்த நம்பிக்கை காரணமாக, அவர்களின் வாக்குகள் சிதறாமல் ஒரே திசையில் குவியும் வாய்ப்பு அதிகம். தேர்தல் கணிதத்தில், சிதறாத வாக்குகள் மிகப்பெரிய பலமாக மாறுகின்றன. எனவே, சிறுபான்மை வாக்குகள் பெரும்பாலும் திமுக கூட்டணிக்கே செல்லும் என்ற கணிப்பு, அதன் வெற்றிக்கு முக்கிய ஆதாரமாக அமையும்.

மதச்சார்பின்மைக்கான வாக்குகளை ஒருமுகப்படுத்தும் கூட்டணி:

தமிழ்நாடு, வரலாற்று ரீதியாக மதச்சார்பற்ற மற்றும் சமூகநீதி சார்ந்த அரசியல் மரபைக் கொண்ட மாநிலமாகும். இந்த சூழலில், மத அடிப்படையிலான அரசியலை முன்னிறுத்தும் பாரதிய ஜனதா கட்சியின் முயற்சிகள் பல இடங்களில் எதிர்ப்பை சந்தித்துள்ளன. மத உணர்வுகளை தூண்டி வாக்குகளைப் பெறும் முயற்சிகள் பல இடங்களில் தோல்வியடைந்துள்ளன என்பது அரசியல் அவதானிப்பு.

சமூகநீதி, சாதி எதிர்ப்பு, மதச்சார்பின்மை போன்ற அடிப்படை நிலைப்பாடுகளில் உறுதியாக இருக்கும் தமிழ் சமூகத்தில், இத்தகைய அரசியல் அணுகுமுறைக்கு வரம்புகள் உள்ளன. இதனால், வகுப்புவாதத்தை எதிர்ப்பவர்கள் திமுக கூட்டணிக்கே வாக்களிப்பார்கள்.

அதிமுக வாக்கு சிதறலின் சாத்தியம்

அதிமுக, நடிகர் எம்.ஜி.ஆர் உருவாக்கிய கட்சி என்பதால், அதன் வாக்கு அடித்தளத்தில் ஒரு தனித்துவமான உணர்ச்சி சார்ந்த அரசியல் கலாச்சாரம் உள்ளது.

நடிகர் கவர்ச்சி, தனிப்பட்ட ஈர்ப்பு போன்றவை வாக்குகளாக மாறும் மனோபாவம் அக்கட்சியில் கூடுதலாக இருக்கும். காலப்போக்கில் இத்தகைய ஈர்ப்புகள் பல்வேறு திசைகளில் பரவி இருந்தாலும், அதிமுக வாக்குகளையே தமிழக வெற்றிக் கழகம் அதிகமாக சிதறடிக்க வாய்ப்பு உள்ளது. இந்த வாக்கு சிதறல், ஒப்பீட்டளவில் திமுக கூட்டணிக்கு சாதகமாக அமையலாம்.

யாருடைய வாக்குகள் எப்படிப் பிரியும்?

இந்த சட்டமன்றத் தேர்தலில் யாருடைய வாக்குகள் சிதறுகின்றன, யாருடைய வாக்குகள் ஒருங்கிணைகின்றன? என்ற கேள்விக்கான விடைகளில் தேர்தல் வெற்றி, தோல்வி அடங்கியிருக்கிறது. இந்த கோணத்தில் பார்க்கும்போது, தமிழக வெற்றிக் கழகம் (TVK) போன்ற புதிய அரசியல் சக்திகளின் வருகை, அதிமுக வாக்கு வங்கியில் சிதறலை உருவாக்கும் முக்கிய காரணியாக பார்க்கப்படுகிறது. இது நேரடியாக திமுக கூட்டணிக்கு எவ்வாறு சாதகமாக மாறுகிறது என்பதை கீழ்க்கண்ட அம்சங்கள் விளக்குகின்றன.

அதிமுகவின் வாக்கு வங்கி ஒரே மாதிரியான அரசியல் சிந்தனையில் கட்டுப்பட்டது அல்ல; அதில் தலைவரின் மீதான ஈர்ப்பு, திமுக எதிர்ப்பு மனோபாவம், பிராந்திய மற்றும் உள்ளூர் ஆதிக்கங்கள் என்பன கலந்து காணப்படுகின்றன.

இத்தகைய வாக்கு வங்கியில், புதிய மாற்று சக்தி தோன்றும் போது, குறிப்பாக கவர்ச்சிகரமான தன்மையை மையமாகக் கொண்ட கட்சிகள் முதலில் கவரும் பகுதி அதிமுக வாக்காளர்களாக இருக்க வாய்ப்பு அதிகம். தவெக போன்ற அமைப்புகள், "புதிய மாற்றம்" என்ற மனநிலையை தூண்டுவதன் மூலம், அதிமுகவிலிருந்து வாக்குகளை இழுத்துக்கொள்ளும். இந்த சிதறல், நேரடியாக திமுகக்கு வாக்கு சேர்க்காமல் இருந்தாலும், எதிரணியின் வலிமையை குறைக்கிறது.

திமுக கூட்டணியில், தேமுதிக தவிர அனைத்து கட்சிகளிடையேயும் ஒரு சில விடயங்களிலேனும் கருத்தியல் ரீதியாக ஓர் ஒற்றுமை இருக்கிறது.

அவற்றுக்கு இடையே வாக்கு பரிமாற்றம் அதிகமாக உள்ளது.

ஆனால், அதிமுக-பாஜக கூட்டணியில் இந்த ஒருங்கிணைவு பல இடங்களில் பலவீனமாகவே உள்ளது. இந்நிலையில்: