பாலிவுட்டில் 'சூப்பர் 30', 'கன்பத்' உள்ளிட்ட படங்களை இயக்கியவர் விகாஸ் பால். இவரது இயக்கத்தில் கடந்த மார்ச் 8 ஆம் தேதி 'சைத்தான்' திரைப்படம் வெளியானது.

இந்த படத்தில் அஜய் தேவ்கன், ஜோதிகா, மாதவன் ஆகியோர் முக்கிய கதாபாத்திரங்களில் நடித்துள்ளனர். குஜராத்தி மொழியில் வெளியான 'வாஷ்' என்ற படத்தின் ரீமேக்காக தான் 'சைத்தான்' வெளியாகி இருக்கிறது.

கிட்டத்தட்ட 23 ஆண்டுகளுக்கு பின் 'சைத்தான்' படம் மூலமாக ஜோதிகா இந்தி சினிமாவில் ரீ-என்ட்ரி கொடுத்திருந்ததால், இந்த படத்தின் மீதான எதிர்பார்ப்பு அதிகரித்தது. இதன் காரணமாக இந்த படம் வெளியான முதல் நாளிலேயே 14.75 கோடி ரூபாய்க்கு மேல் வசூல் செய்தது.

அதனைத் தொடர்ந்து இரண்டாவது நாள் 18.75 கோடி ரூபாய் வசூல் செய்தது. மேலும் மூன்றாவது நாளில் 20.5 கோடி ரூபாய்க்கு மேல் வசூலை குவித்தது.

இந்நிலையில் 'சைத்தான்' படம் வெளியான ஏழு நாட்களில் உலக அளவில் 100 கோடி ரூபாய்க்கு மேல் வசூல் செய்துள்ளதாக தகவல் வெளியாகி இருக்கிறது.

இந்த ஆண்டில் இந்தி திரையுலகில் 100 கோடி ரூபாய்க்கு மேல் வசூல் செய்த 3-வது திரைப்படம் மற்றும் உலக அளவில் 100 கோடி ரூபாய்க்கு மேல் வசூல் செய்த 7-வது இந்திய திரைப்படம் என்ற பெருமையை 'சைத்தான்' படம் பெற்றுள்ளது.