'ஊறுகாய் இருந்தால்தான் சோறே இறங்கும்' என்று சொல்பவர்கள் நம்மில் பலர் உண்டு. குறிப்பாக, உப்பு, மிளகாய்த்தூள், எண்ணெய் ஆகியவற்றைச் சேர்த்துத் தயாரிக்கப்படுகின்றன ஊறுகாய் வகைகள்.

இவை பார்ப்பதற்கு கண்ணைப் பறிப்பதோடு, நாவூற வைக்கும் சுவையிலும் இருப்பதால் உணவுப் பிரியர்களின் விருப்பப்பட்டியலில் ஊறுகாய்க்கும் பிரதான இடம் உண்டு.

வழக்கமான ஊறுகாய் வகை காரசாரமாக இருக்க… அதில் கொஞ்சம் இனிப்பையும் சேர்த்து இந்த ஸ்வீட் மாங்காய் ஊறுகாயைச் செய்து பாருங்கள். குழந்தைகளும் விரும்பி சாப்பிடுவார்கள்.

என்ன தேவை

மாங்காய்த் துருவல் - 2 கப்
சர்க்கரை - ஒன்றரை கப்
மஞ்சள்தூள் - அரை டீஸ்பூன்
சீரகத்தூள் - அரை டீஸ்பூன்
பட்டைத்தூள், லவங்கத்தூள் - தலா கால் டீஸ்பூன்
மிளகாய்த்தூள், உப்பு - தலா ஒரு டீஸ்பூன்

எப்படி செய்வது

மாங்காய்த் துருவலுடன் உப்பு, மஞ்சள்தூள் சேர்த்து இரண்டு மணி நேரம் மூடி வைக்கவும். (மாங்காயில் சிறிதளவு தண்ணீர் விட்டிருக்கும்).

அதனுடன் சர்க்கரை, மிளகாய்த்தூள், சீரகத்தூள், பட்டைத்தூள், லவங்கத்தூள் சேர்த்து நன்றாகக் கிளறி மெல்லிய துணியால் மூடி வெயிலில் வைக்கவும் (ஏழு நாள்கள் வெயிலில் வைக்கவும்).

காலையும் மாலையும் ஊறுகாயை நன்றாகக் கிளறிவிடவும். சர்க்கரைப்பாகு இரண்டு கம்பிப் பதம் வந்தவுடன் வெயிலில் வைப்பதை நிறுத்திவிடவும்.