IPL : 2024 ஐபிஎல் தொடரில், ஹர்திக் பாண்டியா தலைமையிலான மும்பை இந்தியன்ஸ் அணி முதல் 2 போட்டிகளில் தொடர் தோல்விகளை சந்தித்தது.

இதை தொடர்ந்து, ராஜஸ்தான் ராயல்ஸ் அணிக்கு எதிராக முதல் வெற்றியை நோக்கி நேற்று (ஏப்ரல் 1) களமிறங்கியது.

இந்த தொடரில், தனது சொந்த மைதானமான வான்கடே மைதானத்தில் மும்பை இந்தியன்ஸ் களமிறங்கும் முதல் போட்டி என்பதால், அந்த அணியின் மீது ரசிகர்களுக்கு நம்பிக்கை மிகுதியாகவே இருந்தது.

இப்போட்டியில் மும்பைக்கு எதிராக முதலில் டாஸ் வென்ற ராஜஸ்தான் ராயல்ஸ் அணியின் கேப்டன் சஞ்சு சாம்சன் பந்துவீச்சை தேர்வு செய்தார்.

அதன்படி முதலில் பேட்டிங் செய்த மும்பை அணி 20 ஓவர்கள் முடிவில் 9 விக்கெட் இழப்பிறகு 125 ரன்களுக்கு சுருண்டது.

டிரெண்ட் போல்ட் பந்துவீச்சில் ரோகித் சர்மா, நமன் தீர் மற்றும் பிரெவிஸ் ஆகியோர் டக் அவுட் ஆனதுடன், 4 ஓவரில் 4 முன்னணி விக்கெட்டுகளை இழந்தது மும்பை அணிக்கு பெரும் பின்னடைவாக அமைந்தது. அந்த அணியில் அதிகபட்சமாக கேப்டன் ஹர்திக் பாண்டியா(34) மற்றும் திலக் வர்மா(32) ஆகியோர் மட்டுமே 30 ரன்களை கடந்தனர்.

தொடர்ந்து விளையாடிய ராஜஸ்தான் அணியில் ஜெய்ஸ்வால் (10), பட்லர் (13), சாம்சன் (12) ஆகியோர் சொற்ப ரன்களில் ஆட்டமிழந்தனர் எனினும் கடைசிவரை ஆட்டமிழக்காமல் அதிரடியாக ஆடி அரைசதம் அடித்த ரியான் பராக் (54*) அணியை வெற்றிக்கு அழைத்து சென்றார்.