- ஸ்ரீராம் சர்மா

சில நாட்களுக்கு முன்னர் திமுகவின் இளைஞர் அணி செயலாளரும் - தமிழ்நாட்டு அரசாங்கத்தின் இளைஞர் நலன் மற்றும் விளையாட்டு மேம்பாட்டுத்துறை அமைச்சருமான மாண்புமிகு உதயநிதி ஸ்டாலின் அவர்களது குறிஞ்சி இல்லத்தில் முதலமைச்சர் நீங்கலாக திமுகவின் ஒட்டு மொத்த மூத்த அமைச்சர்களும் கூடியிருந்தனர்.

அது, சேலம் மாநாட்டுக்காக அயராது உழைத்தவர்களுக்கான பாராட்டு விழா என அறிவிக்கப்பட்டிருந்தாலும் கூட, எதிலும் ஆழம் காண விரும்பும் அரசியல் ஆய்வாளர்கள் பலரும் அந்த நிகழ்வை வேறு விதமாக எடை போட்டபடி அலசிக் கொண்டிருக்கிறார்கள் .

ஆகட்டுமே! அவர்கள் போட்ட அந்த கணக்கும் ஒருவிதத்தில் சரிதானே! நன்மைக்குத் தானே ! வருங்காலத்துக்கு வாகானது தானே !?

வெளிப்படையாகவே சொல்லி விடுகிறேனே…

கத்தரிக்காய் முற்றினால் கடைத்தெருவில்… பத்திரிக்கை முடிந்தால் கதவிடுக்கில்… சத்திரியன் விளைந்தால் சாவடியில்… அவ்வளவுதானே !

எங்களுக்கானதோர் சத்திரியன் விளைந்து விட்டான். அவனை இன்றைய வாக்குச் சாவடியில் முன் நிறுத்த விழைகிறோம். அவனை வாழ்த்துங்கள் என பாரிய கட்சி ஒன்று ஏகோபித்த அளவில் துணிந்து முன் மொழிவதில் என்ன தவறிருக்கிறது என்கிறேன்.

அப்படி என்றும் இப்படி என்றும் ஆளாளுக்கு ஒன்றை விளாசிக் களிக்கலாம். அதில் ஏதேனுமொரு அர்த்தம் இருக்கலாகுமா எனத்தான் கேட்கிறேன்.

*******

ஒரு குடும்பமே ஆட்சி செய்ய வேண்டுமா ? அது நியாயமாகுமா ? திராவிட அரசியலில் ஓடி உழைத்த மு. கருணாநிதி எனும் தாத்தன் சொத்தை , அந்த வீரிய தலைமையோடு போராடி தன் இளமை கடந்து தலைமை அடைந்த மு. க. ஸ்டாலின் எனும் அப்பன் அடைந்த சொத்தை, ஏதோ சினிமாவுக்குள் சுற்றி வந்த உதயநிதி எனும் பேரனுக்கு அள்ளிக் கொடுத்து விடுவதா?

திமுக என்ன கம்பெனியா? சங்கர மடமா? உதயநிதி என்ன அவரது பாட்டனார், தந்தையாரைப் போல பற்பல போராட்டங்களில் கலந்து கொண்டவரா? காராக்கிரகம் சென்றவரா? மிசா வாங்கியவரா? பொடா வாங்கியவரா என்றெல்லாம் கசகசப்பவர்கள் உண்டு.

கலகத் திரிகளை எதிரிக் கட்சிகள் கொளுத்திப் போடுவது வழக்கம்தான். அதில் ஆச்சரிப்படுவதற்கு ஏதொன்றும் இல்லை. அப்படித்தான் இருக்கும் அவர்களது வேலைத் திட்டம். ஆனால், திமுக எனும் அடர்ந்த கட்சியானது அப்படி நினைக்கவில்லை என்பதுதான் உதயநிதி ஸ்டாலின் என்பவருக்கான அமோகமான அங்கீகாரம். அதி முகாந்திரம்.

யார் என்ன நீட்டி முழக்கினாலும் உண்மை ஒன்றுதான். அது உதயநிதி ஸ்டாலின் என்பவர் தவிர்க்கவே முடியாத நாளைய தலைவர். அவ்வளவுதான்.

திமுக எனும் அகண்ட கட்சியினை தோளில் சுமப்பதே பெரும் பாரம்தான். அதை உதயநிதி ஸ்டாலின் திறம்பட கொண்டு செலுத்துகிறாரா என்பதை மட்டும்தான் பார்க்க வேண்டும்.

உதயநிதி ஸ்டாலினின் எழுச்சியை திமுகவின் கடைக்கோடி தொண்டர்கள் வரை உளமார ஏற்றுக் கொண்டார்கள் என்பதை அவரது ஆகப் பெரிய வெற்றி என சொல்வதை விட அவரது இளைய சிரத்தில் சூட்டப்பட்ட அகண்ட முள் மகுடம் என்பேன்.

அதனை சுமந்து கொண்டேற்றும் வலிமை உதயநிதி ஸ்டாலினுக்கு உண்டு என்பதை என்னளவில் ஆழ நம்புகிறேன்.

*******

ஆம், எல்லோராலும் ஏற்றுக்கொள்ளப்படக் கூடிய இளைய தலைமை ஒன்றை தேர்ந்தெடுக்க முடியாது போனால் ஒரு கட்சி என்னவாகும் என்பதற்கு இன்று இரண்டாக அல்ல மூன்றாக பிளவுபட்டிருக்கும் அதிமுகவே அருகாமை சாட்சியாகிறது !

குறித்துக் கொள்ளுங்கள்…

திராவிட சித்தாந்தத்தின் வருங்கால நம்பிக்கையாக நிற்கும் உதயநிதி எனும் அரசியல்வாதியின் வயது 46. அவருடைய சித்தாந்தத்துக்கு எதிர் சித்தாந்தத்தில் தலைமை ஏற்று நிற்கும் தமிழக பாஜகவின் தலைவர் அண்ணாமலை அவர்களுக்கோ 39 வயது.

ஒரு சித்தாந்த மோதலில் தலைமையேற்கும் தளபதிகள் சம வேகத்தில் இருப்பது போருக்கும் வெற்றிக்கும் நல்லது என திமுகவின் தலைமை முடிவெடுத்தால் அதில் குற்றம் கண்டுவிட முடியாது.

மீண்டும் குறித்துக் கொள்ளுங்கள்…

திமுக எனும் கட்சி தோன்றி 75 ஆண்டுகள்தான் ஆகிறது. ஆனால் அதன் எதிர் சித்தாந்தத்தின் ஆணி வேரான ஆர்.எஸ்.எஸ் தோன்றி 99 ஆண்டுகள் ஆகிறது. அடுத்த வருடம் அது தனது நூற்றாண்டை கொண்டாடப் போகிறது.

இந்தியத்தின் பெரும்பாலான மாநிலங்கள் அவர்களின் பிடியில்தான் இருக்கிறது. இந்த முறையும் அவர்கள் வென்று விட்டால் அது இன்னுமின்னும் வலுப்பெறக் கூடும். ஆர்.எஸ்.எஸின் எதிர்பாராத அர்பணிப்பு உணர்வை ஈடு செய்ய முடியாது போனால் எந்த மாநிலக் கட்சியும் நிலை குலைந்துதான் போகும் என்பதற்கான எண்ணற்ற உதாரணங்கள் தேசமெங்கும் கொட்டிக் கிடக்கின்றன.

வெறும் வியூகங்களையும் பணத்தையும் வைத்துக் கொண்டு இனி தேர்தலை சந்தித்துவிட முடியாது என்றே தோன்றுகிறது. காரணம், சாதியும் மதமும் அதன் பாற்பட்ட உணர்வெழுச்சியும் பண வியூகங்களைக் காட்டிலும் வீரியமானது என்பது வெளிப்படையாகி நிற்கிறது.

*******

எதிர் வரும் நாடாளுமன்றத் தேர்தல் திமுகவுக்கு ஒரு சவாலே அல்ல. மிக எளிதில் வென்றுவிடக் கூடிய வாகான நிலையில்தான் எதிரிகளற்ற களத்தில் திமுக இன்று இருக்கிறது. ஆனால், அடுத்து வரக்கூடிய 2026 தேர்தல் அப்படியாக இருக்காது. மிக மிக சவாலானதாக இருக்கும் என்பதை மறுத்துவிட முடியாது.

திராவிட சித்தாந்தத்தின் அவசியத்தை இன்றைய இளைய வாக்காளர்களுக்கு ஏற்றாற்போல புனரமைத்த பின், அதனை பட்டி தொட்டியெங்கும் கொண்டு சேர்த்தாக வேண்டிய காலம் இது. அதற்கு நாடறிந்த நம்பிக்கையான இளைய முகம் ஒன்று அவசியப்படுகிறது. அந்த நம்பிக்கையான முகம்தான் உதயநிதி ஸ்டாலின்.

அவரை எல்லோரும் மனமுவந்து ஏற்றுக் கொண்டால், அவரது கரத்தை பலப்படுத்த ஓயாது உழைத்தால் அது திராவிட சித்தாந்தத்துக்கு நல்லது.

போலவே, முன்பே சொன்னது போல அவர் இன்னுமின்னும் ஓடியாக வேண்டும். அவருக்குண்டான பக்க பலத்தை அவரோடு அணிவகுத்திருக்கும் இளைய தலைவர்கள் அள்ளிக் கொடுத்தாக வேண்டும். மூத்த தலைவர்களின் வழி காட்டுதலோடு சித்தாந்தப் போரில் நின்று ஜெயித்தாக வேண்டும்.

*******

மூத்த பத்திரிக்கையாளர் மணி அவர்கள் "அண்ணாமலையை குறைத்து எடை போட்டு விடாதீர்கள்" என அவ்வப்போது சொல்லக் கேட்டிருக்கிறேன்.

என்னளவில் இன்று நான் துணிந்து சொல்கிறேன், "உதயநிதி ஸ்டாலினை யாரும் குறைத்து எடை போட்டு விடாதீர்கள்".

கவனியுங்கள்…

அன்றொரு நாள் மாமழை ஒன்று சென்னையை புரட்டிப் போட்ட தினத்தில் முதலமைச்சரின் தொகுதியை குறிவைத்து ஓடிய அன்றைய பாஜகவின் புதிய அண்ணாமலை ஆங்கிருந்த முழங்கால் மழை நீரில் அப்பாவியாக 'போட்' ஏறி ஓட்டிக் காட்டிய காட்சியை கிண்டலடித்து எழுதியிருக்கிறேன்.

அதன் பிறகு, 18.4.2023 தேதியிட்ட எனது எண்ணித் துணிக கருமம் எனும் மின்னம்பலக் கட்டுரை ஒன்றில் அண்ணாமலை அவர்களின் முதிர்ச்சியற்ற அரசியல் அணுகுமுறையை கடுமையாக சாடி, "முதலில் மக்களை சென்று சந்தியுங்கள். உழையுங்கள். அதன் பிறகு வந்து உங்கள் ஆரவாரத்தை காண்பியுங்கள்" என ஏளனமாக அலசி எழுதியிருக்கிறேன். அது பழைய கதையானது.