இதற்கு உணவுப் பழக்கம் மட்டுமே காரணமாக இருக்க வேண்டிய அவசியமில்லை. நீண்ட கால மன அழுத்தம், தூக்கமின்மை மற்றும் ஹார்மோன் மாற்றங்களும் வயிற்றுப் பகுதியில் கொழுப்பு சேர்வதற்கு காரணமாக இருக்கலாம்.

மன அழுத்தத்தால் உருவாகும் தொப்பை எப்படி இருக்கும்?

வேலைப்பளு, பணப் பிரச்சினை, பயம், பதற்றம் போன்ற காரணங்களால் தொடர்ந்து மன அழுத்தம் ஏற்படும்போது உடலில் கார்டிசோல் என்ற ஹார்மோன் அதிகரிக்கலாம். இதனால் பசியும் அதிகரித்து, அதிக கலோரி கொண்ட இனிப்பு மற்றும் நொறுக்குத் தீனிகளை சாப்பிடும் பழக்கம் உருவாக வாய்ப்புள்ளது.

வயிற்றின் மேற்பகுதி மற்றும் தொப்புளைச் சுற்றி கொழுப்பு சேர்வது, தூக்கக் கோளாறு, பகல் நேர சோர்வு, செரிமானப் பிரச்சினைகள் போன்றவை இதனுடன் காணப்படலாம்.

ஹார்மோன் தொப்பைக்கு என்ன காரணம்?

இன்சுலின் எதிர்ப்பு, தைராய்டு செயல்பாடு குறைதல் உள்ளிட்ட பிரச்சினைகள் உடல் எடை அதிகரிப்பில் தாக்கத்தை ஏற்படுத்தலாம். பெண்களுக்கு பிரசவத்திற்குப் பிந்தைய காலம், மாதவிடாய் நிற்கும் காலம் போன்ற ஹார்மோன் மாற்றங்களும் உடலில் கொழுப்பு சேரும் விதத்தை மாற்றக்கூடும்.

அடிவயிறு, இடுப்பு, தொடைப் பகுதிகளில் கொழுப்பு அதிகரிப்பது மற்றும் எடையை குறைப்பது சிரமமாக இருப்பது போன்ற அறிகுறிகள் இருக்கலாம்.

தொப்பை குறைக்க என்ன செய்யலாம்?

மன அழுத்தம் காரணமாக தொப்பை அதிகரித்திருந்தால் தினமும் 7 முதல் 8 மணி நேரம் சீரான தூக்கம் பெறுவது முக்கியம். நடைப்பயிற்சி, யோகா, மூச்சுப்பயிற்சி, தியானம் போன்றவற்றையும் வழக்கத்தில் சேர்க்கலாம். டீ, காபி, எனர்ஜி பானங்களின் அளவையும் குறைக்கலாம்.

ஹார்மோன் தொடர்பான காரணங்கள் இருந்தால் சர்க்கரை, மைதா மற்றும் பதப்படுத்தப்பட்ட உணவுகளை குறைத்து, புரதம் மற்றும் நார்ச்சத்து நிறைந்த உணவுகளை அதிகம் சேர்ப்பது உதவியாக இருக்கும். தைராய்டு, இன்சுலின் அல்லது பிற ஹார்மோன் பிரச்சினைகள் இருப்பதாக சந்தேகம் இருந்தால், பரிசோதனை செய்து மருத்துவரின் ஆலோசனை பெறுவது அவசியம்.

உடல் சொல்லும் அறிகுறிகளை கவனியுங்கள்!

வயிற்றில் கொழுப்பு சேர்வதற்கான காரணம் அனைவருக்கும் ஒரே மாதிரியாக இருக்காது. மன அழுத்தமும் ஹார்மோன் மாற்றங்களும் ஒரே நேரத்தில் இருக்கவும் வாய்ப்புள்ளது. எனவே, கடுமையான உணவுக் கட்டுப்பாடுகளை மட்டும் பின்பற்றுவதற்குப் பதிலாக தூக்கம், உணவு, உடற்பயிற்சி மற்றும் மனநிலையை ஒருங்கிணைத்து கவனிப்பதே நீடித்த பலனைத் தரும்.