'இது பழக்கடைதானா, நாவல் பழக் கிடங்கா?' என்று! கடந்த பல ஆண்டுகளில் இல்லாத அளவுக்கு நாவல் பழங்கள் குவியல் குவியலாக விற்பனைக்கு வந்துள்ளன. மரங்களும் 'இந்த ஆண்டாவது எல்லோரும் நாவல் பழம் சாப்பிடட்டும்' என்ற முடிவுக்கு வந்தது போல, கிளை கிளையாக பழங்களால் நிரம்பியுள்ளன.

இதையடுத்து சமூக வலைதளங்களில் ஒரு தகவல் வேகமாகப் பரவியது. நாவல் பழங்கள் அதிகமாகக் காய்த்தால் அந்த ஆண்டு அல்லது அடுத்த காலகட்டத்தில் கடுமையான வறட்சி ஏற்படும் என்பதே அந்த வாதம். சிலர் இதை இயற்கையின் 'எச்சரிக்கை மணி' என்றும் கூறினர்.

ஆனால் தாவரவியல் அறிவியல் இதை எப்படி பார்க்கிறது?

தாவரங்களில் 'ஸ்ட்ரெஸ் ஃப்ரூட்டிங்' (Stress Fruiting) என்ற ஒரு நிகழ்வு உள்ளது. அதாவது, கடுமையான வெப்பம், நீர் பற்றாக்குறை அல்லது சுற்றுச்சூழல் அழுத்தம் போன்ற சூழல்களில் சில மரங்கள் அதிக அளவில் பூத்து காய்க்கலாம். இது ஒரு வகையில், 'நாளை என்ன ஆகுமோ தெரியாது; முதலில் விதைகளை உருவாக்கிவிடலாம்' என்ற இயற்கையின் இனப்பெருக்க உத்தி.

அதேபோல் 'மாஸ்டிங்' (Masting) என்ற நிகழ்வும் உள்ளது. இதில் சில மரங்கள் இரண்டு முதல் ஐந்து ஆண்டுகளுக்கு ஒருமுறை திடீரென மிக அதிக அளவில் பூக்களையும் பழங்களையும் உற்பத்தி செய்கின்றன. இது மரங்களின் இயற்கையான வாழ்க்கைச் சுழற்சியின் ஒரு பகுதியாகும். எனவே அதிக விளைச்சல் என்பது கட்டாயமாக வரவிருக்கும் வறட்சிக்கான அறிவிப்பு அல்ல.

இந்த ஆண்டு நாவல் பழங்கள் அதிகமாகக் காய்த்ததற்கான காரணங்களில், கடந்த பருவமழையால் கிடைத்த மண் ஈரப்பதம், நிலத்தடி நீர் இருப்பு மற்றும் பூக்கும் காலத்தில் நிலவிய வறண்ட, வெப்பமான வானிலை ஆகியவை முக்கிய பங்காற்றியிருக்கலாம். நாவல் மரங்களுக்கு பூக்கும் நேரத்தில் அதிக மழை பெய்யாமல், வறண்ட வானிலை நிலவினால் பூக்கள் உதிராமல் காய்களாக மாறுவதற்கான வாய்ப்பு அதிகரிக்கும்.

'மரம் எதிர்கால வறட்சியை முன்கூட்டியே உணர்ந்து பழம் காய்க்கிறது' என்ற கருத்துக்கும் அறிவியல் ஆதாரம் குறைவு. தாவரங்கள் தற்போதைய சூழல் மாற்றங்களை உணர முடியும். ஆனால் மூன்று மாதங்கள் அல்லது ஒரு பருவம் கழித்து என்ன நடக்கும் என்பதை கணித்து அதற்கேற்ப பழம் காய்க்கும் திறன் அவற்றுக்கு இருப்பதாக உறுதியான ஆதாரங்கள் இல்லை.

ஒரு சுவாரசியமான கேள்வியும் இங்கே எழுகிறது. அதிக நாவல் பழம் காய்த்தால் வறட்சி வரும் என்றால், குறைவாகக் காய்த்த ஆண்டுகளில் அதிக மழை பெய்ய வேண்டும் அல்லவா? நடைமுறையில் அப்படி ஒரு நேரடி தொடர்பு தொடர்ந்து நிரூபிக்கப்படவில்லை.

உண்மையில் வறட்சிக்கான அறிகுறிகளை அறிய வேண்டுமெனில், நிலத்தடி நீர்மட்டம் குறைதல், குளங்கள் வற்றுதல், நீண்டகால மழைப் பற்றாக்குறை, வெப்பநிலை அதிகரிப்பு போன்ற காரணிகளே முக்கியமானவை. ஒரு மரத்தின் ஒரு பருவ விளைச்சலை மட்டும் வைத்து வானிலையைத் தீர்மானிப்பது சற்று அவசரமான முடிவாகிவிடும்.

எனவே, இந்த ஆண்டு நாவல் பழங்கள் அபரிமிதமாகக் கிடைப்பது இயற்கையின் ஒரு சுவாரசியமான நிகழ்வு. அதை வறட்சிக்கான உறுதியான எச்சரிக்கையாகக் கருத வேண்டிய அவசியமில்லை. அதே நேரத்தில், நீரைச் சிக்கனமாகப் பயன்படுத்த வேண்டும் என்ற நினைவூட்டலாக எடுத்துக்கொண்டால் அதில் தவறும் இல்லை.

ஆக, நாவல் பழம் நமக்குச் சொல்வது 'நாளை வறட்சி வரும்' என்பதல்ல; 'இன்று கிடைத்திருக்கிறேன், முதலில் என்னை சாப்பிட்டு மகிழுங்கள்!' என்பதுதான் என்று சொல்லலாம்!