சேலம் மாவட்டம் நீதிக்கட்சி, திராவிடர் கழகம், மூன்று முதல்வர்கள், மாடர்ன் தியேட்டர்ஸ் என அரசியல்-கலாசார வரலாற்றில் தனித்த இடம் பெற்றது.

11 தொகுதிகளில் எடப்பாடி, ஓமலூர், சங்ககிரி, ஏற்காடு உள்ளிட்ட பகுதிகளில் அதிமுக நீண்டகால ஆதிக்கம் செலுத்துகிறது. வன்னியர், பட்டியலின, பழங்குடியினர், சிறுபான்மையினர் வாக்குச்சூழலை யார் கையாள்கிறார்களோ அவர்களுக்கே அடுத்த தேர்தலில் முன்னிலை வாய்ப்பு அதிகம் என மதிப்பிடப்படுகிறது.

நீதிக்கட்சி திராவிடர் கழகமாக உருவெடுத்ததும், புகழ்பெற்ற 'மாடர்ன் தியேட்டர்ஸ்' இயங்கியதும் இந்த மண்ணில்தான். சுப்பராயன், ராஜாஜி, எடப்பாடி பழனிசாமி என மூன்று முதல்வர்களை தந்த பெருமையும் உண்டு. மாங்கனி, வெள்ளிக்கொலுசு, இளம்பிள்ளை சேலைகள் எனப் புவிசார் அடையாளங்களுடன், மேட்டூர் அணை மற்றும் ஏற்காடு போன்ற சுற்றுலாத் தலங்களும் இங்குப் பிரபலம். சென்னைக்கு அடுத்தபடியாக அதிக தொகுதிகளை கெண்டுள்ளது சேலம். 3 தனித்தொகுதிகள் உட்பட 11 தொகுதிகள் சேலம் மாவட்டத்தில் உள்ளன.

எடப்பாடி தொகுதி: முன்னாள் முதல்வர் பழனிசாமியின் சொந்தத் தொகுதி என்பதையும் தாண்டி, கடந்த ஐந்து தேர்தல்களில் நான்கு முறை அதிமுகவை வெற்றிபெறச் செய்து அக்கட்சியின் இதயத்துடிப்பாகத் திகழ்கிறது எடப்பாடி ். அதேபோல், மாவட்டத்திலேயே அதிகபட்சமாக 2.91 லட்சம் வாக்காளர்களைக் கொண்ட ஓமலூர் தொகுதியில் அதிமுக 8 முறை வெற்றி பெற்று தனது பலத்தை நிரூபித்துள்ளது.

மலைப்பிரதேசமான ஏற்காடு தொகுதியிலும், கடந்த ஐந்து தேர்தல்களில் நான்கு முறை அதிமுகவே வெற்றி வாகை சூடியுள்ளது.

ஆத்தூர் தொகுதி: தனித்தொகுதியான ஆத்தூரில் ஒரு காலத்தில் காங்கிரஸ் மற்றும் அதிமுக இடையே சமபலப் போட்டி நிலவியது. ஆனால், கடந்த ஐந்து தேர்தல்களில் நான்கு முறை அதிமுக வெற்றி பெற்று அத்தொகுதியைத் தனது கட்டுப்பாட்டிற்குள் கொண்டு வந்துள்ளது.

கெங்கவல்லி தொகுதி: புதிதாக உருவாக்கப்பட்ட தனித்தொகுதியான கெங்கவல்லி தொகுதியிலும் அதிமுக இரண்டு முறை வென்றுள்ளது. தொழிலாளர்கள் அதிகம் நிறைந்த மேட்டூர் தொகுதியில் மட்டும் அதிமுக, பாமக மற்றும் தேமுதிக ஆகிய கட்சிகளிடையே வெற்றி வாய்ப்புகள் மாறி மாறிப் பகிர்ந்துகொள்ளப்பட்டுள்ளன. கடந்த ஐந்து தேர்தல்களில் அதிமுகவும் பாமகவும் தலா இரண்டு முறை இங்கு வெற்றி பெற்றுள்ளன.

சங்ககிரி தொகுதி: சங்ககிரி தொகுதியைப் பொறுத்தவரை, அதிமுக 8 முறை வென்று தனது கோட்டையாக மாற்றியுள்ளது. மாநகரப் பகுதிகளான சேலம் மேற்கு மற்றும் சேலம் தெற்கு தொகுதிகளிலும் அதிமுகவின் ஆதிக்கமே மேலோங்கி நிற்கிறது. குறிப்பாக, சேலம் தெற்கு தொகுதியில் உருவானது முதல் அதிமுகவே தொடர் வெற்றிகளைப் பெற்று வருகிறது.