பெரும் எதிர்பார்ப்புகளுக்கு மத்தியில் நடந்து முடிந்திருக்கிறது 2024 டி20 உலகக் கோப்பை தொடர். இந்திய அணி இரண்டாவது முறையாக சாம்பியன் பட்டம் வென்று அசத்தியிருக்கிறது.

இந்த ஐபிஎல் சீசனுக்குப் பிறகு சிக்ஸர்களும் ஃபோர்களும் நிறைந்த ஒரு உலகக் கோப்பையாக இது இருக்குமென்று எதிர்பார்த்திருக்க, பௌலர்கள் பெரும் ஆதிக்கம் செலுத்தினார்கள். விக்கெட் மழை பொழிந்த இந்தத் தொடரில் அதிக விக்கெட்டுகள் எடுத்த டாப் 10 பௌலர்கள் யார்?

ஃபசல்ஹக் ஃபரூக்கி, ஆப்கானிஸ்தான்

போட்டிகள் - 8
விக்கெட்டுகள் - 17
இந்த உலகக் கோப்பையின் தொடக்க போட்டிகளில் விக்கெட்டுகளை அள்ளிக்கொண்டே இருந்தார் ஃபரூக்கி. பவர்பிளே ஓவர்களில் அவரின் பந்துவீச்சு ஆப்கானிஸ்தானுக்கு மிகப் பெரிய பலமாக இருந்தது. உகாண்டாவுக்கு எதிராக 5 விக்கெட்டுகள் கைப்பற்றிய அவர், அடுத்த போட்டியிலேயே 4 விக்கெட்டுகள் எடுத்து அந்த அணி நியூசிலானதி வீழ்த்தவும், சூப்பர் 8 சுற்றுக்குள் நுழையவும் காரணமாக அமைந்தார். இவரது 9.41 என்ற சராசரி பும்ராவுகு அடுத்த சிறப்பு என்பது இவரது செயல்பாட்டை உணர்த்தும்.

ஆர்ஷ்தீப் சிங், இந்தியா

போட்டிகள் - 8
விக்கெட்டுகள் - 17
இந்த உலகக் கோப்பை தொடங்கும்போது அவர் அணியில் இருக்கவேண்டுமா என்ற கேள்விகள் இருந்தன. ஆனால், வேகப்பந்துவீச்சுக்கு சாதகமான ஆடுகளங்களில் தன் திறமையை நிரூபித்து பெரும் தாக்கம் ஏற்படுத்தியிருக்கிறார் ஆர்ஷ்தீப். பவர்பிளே, டெத் என இரு கட்டத்திலும் விக்கெட்டுகள் வீழ்த்தி அசத்தியிருக்கிறார். இறுதிப் போட்டியில் அவர் வீசிய அந்த அற்புதமான 19வது ஓவர் அந்த 17 விக்கெட்டுகளை விடவும் முக்கியமானது.

ஜஸ்ப்ரித் பும்ரா, இந்தியா

போட்டிகள் - 8
விக்கெட்டுகள் - 15
யார்க்கர்கள், இன்ஸ்விங்கர்கள், அவுட் ஸ்விங்கர்கள், பௌன்சர்கள், ஸ்லோ பால்கள், டாட் பால்கள், விக்கெட்டுகள்... என்ன இல்லை பும்ராவின் பந்துவீச்சில். இந்த உலகக் கோப்பையின் தொடர் நாயகன் ஒவ்விரு போட்டியிலும் இந்திய அணிக்குப் பெரும் தாக்கம் ஏற்படுத்திக் கொடுத்திருக்கிறார். வீசிய 178 பந்துகளில் 110 பந்துகளை டாட் பாலாக வீசியிருக்கிறார் இந்த மாயப் பந்துவீச்சாளர்.

ஆன்ரிக் நார்கியா, தென்னாப்பிரிக்கா

போட்டிகள் - 9
விக்கெட்டுகள் - 15
காயம், ஃபார்ம் அவுட் என கடந்த சில மாதங்களாகவே நார்கியாவுக்கு எதுவும் சரியாகப் போகவில்லை. ஆனால், அமெரிக்காவில் கால் வைத்ததும் எல்லாம் மாறிவிட்டது. வெறித்தனமாகப் பந்துவீசிய அவர், தன் வேகத்தால் விக்கெட் மேல் விக்கெட் எடுத்தார். மிடில் ஓவர்களில் தென்னாப்பிரிக்க அணி ஆதிக்கம் செலுத்த மிகமுக்கியக் காரணமாக விளங்கிய அவர், ஆறுக்கும் குறைவான எகானமியில் பந்துவீசியது குறிப்பிடத்தக்கது.

ரஷீத் கான், ஆப்கானிஸ்தான்

போட்டிகள் - 8
விக்கெட்டுகள் - 14
ரஷீத் கானின் 14 விக்கெட்டுகளை கூறு போட்டுப் பார்த்தால், அவர் எப்படிப்பட்ட அஸ்திரமாக ஆப்கானிஸ்தான் அணிக்கு இருந்திருக்கிறார் என்பது புரியும். நியூசிலாந்துக்கு எதிரான முக்கிய போட்டியில் 3 விக்கெட்டுகள், இந்தியாவுக்கு எதிராக 3 விக்கெட்டுகள், வங்கதேசத்துக்கு எதிரான அதிமுக்கிய சூப்பர் 8 போட்டியில் 4 விக்கெட்டுகள்... இதுவே ரஷீத் கான்! உலகக் கொப்பையில் பெரிய போட்டிகளில் தன் திறனை நிரூபித்திருக்கிறார் ரஷீத்.

ரிஷாத் ஹொசைன், வங்கதேசம்

போட்டிகள் - 7
விக்கெட்டுகள் - 14
ஷகிப் அல் ஹசன் போன்ற ஒரு சீனியர் பௌலர் பெரிய தாக்கம் ஏற்படுத்தத் தடுமாறியபோது, தன் முதல் உலகக் கோப்பை தொடரில் சிறப்பாக செயல்பட்டிருக்கிறார். வங்கதேச கிரிக்கெட்டில் லெக் ஸ்பின்னும் இருக்கிறது என்பதையும் உலகக் கோப்பை அரங்கில் நிரூபித்திருக்கிறார் ரிஷாத். விளையாடிய 8 போட்டிகளில் ஏழில் விக்கெட்டுகள் வீழ்த்தியிருக்கிறார் என்பது சாதாரண விஷயம் அல்ல.

நவீன் உல்-ஹக், ஆப்கானிஸ்தான்

போட்டிகள் - 8
விக்கெட்டுகள் - 13
இந்தப் பட்டியலில் மூன்றாவது ஆப்கானிஸ்தான் வீரர். தன்னால் பவர்பிளேவில் புதிய பந்தை வைத்தும் மாயம் நிகழ்த்த முடியும் என்பதை இந்த உலகக் கோப்பையில் நிரூபித்திருக்கிறார் நவீன். ஸ்லோ பால்களை மிகவும் சாமர்த்தியமாகப் பயன்படுத்தும் அவர் ஆடுகளத்தின் தன்மை அறிந்து பௌன்ஸையும், ஸ்விங்கையும் தன்னுடைய ஆயுதமாகப் பயன்படுத்தினார். இந்த பவர்பிளே அவதாரம் அவரது ஐபிஎல் மதிப்பையும் இன்னும் உயர்த்தும்.