2026 சட்டமன்றத் தேர்தலில் சொந்தக் கோட்டையான கொளத்தூரிலேயே தவெக வேட்பாளர் வி.எஸ்.பாபுவிடம் 8795 வாக்குகள் வித்தியாசத்தில் தோல்வியடைந்த மு.க.ஸ்டாலின், தன்னை ஆதரித்த 74 ஆயிரம் வாக்காளர்களை நேரில் சந்தித்து நன்றி தெரிவித்தார்.

ஸ்டாலினை பார்த்த திமுக தொண்டர்கள் கண்கலங்க, அவர்களுடன் இருந்த சேகர்பாபுவும் கண்ணீர்விட்டது அக்கட்சியின் வேதனையை வெளிப்படுத்தியது.

2026 தமிழ்நாடு சட்டமன்ற தேர்தலில் திராவிட முன்னேற்ற கழகத்தின் முதல்வர் வேட்பாளராக முக ஸ்டாலின் போட்டியிட்டார். இத்தேர்தலில் திமுக பெரும்பான்மையுடன் வெற்றிபெறும் என்ற எதிர்ப்பார்ப்பு இருந்த நிலையில், திமுக தோற்றதோடு கொளத்தூர் தொகுதியில் போட்டியிட்ட முதல்வர் முக ஸ்டாலினும் தோல்வியை தழுவினார். இதற்கு முன்பு 3 முறை வெற்றிபெற்ற சொந்தத் தொகுதியிலேயே தவெக வேட்பாளர் வி.எஸ்.பாபுவுக்கு எதிராக முக ஸ்டாலின் தோல்வியது திமுக கட்சியினரை மிகப்பெரிய அதிர்ச்சியில் ஆழ்த்தியது.

திமுகவின் முன்னாள் சட்டமன்ற உறுப்பினரிடமே திமுக தலைவர் ஸ்டாலின் 8795 வாக்குகள் வித்தியாசத்தில் தோல்வியை சந்தித்தார். முதலமைச்சராக இருந்த ஸ்டாலின், இம்முறை சட்டமன்றம் கூட செல்லமுடியாத சூழல் ஏற்பட்டிருப்பது அக்கட்சியினரை மிகுந்த வேதனைக்குள் தள்ளியுள்ளது.

கொளத்தூர் உள்ளிட்ட சில தொகுதிகளின் தேர்தல் பணிகள் சேகர்பாபுவிடமே ஒப்படைக்கப்பட்டிருந்த நிலையில், முதல்வர் ஸ்டாலினின் தோல்விக்கு சேகர்பாபுவே பொறுப்பேற்க வேண்டும் என திமுகவின் முன்னாள் எம்எல்ஏ பரந்தாமன் பதிவொன்றை பதிவிட்டுள்ளார்.