'வெல்லும் தமிழ்ப் பெண்கள்' என நடத்தப்பட்ட நிகழ்ச்சியில் சாதனை பெண்கள் கௌரவிக்கப்பட்டனர்.

மகளிர் உரிமைத் தொகைக்கான பட்டியலில் விடுபட்டவர்களான கூடுதல் 17 லட்சம் மகளிருக்கு உரிமைத் தொகை கிடைக்கும் வகையிலான 2ஆம் கட்ட விரிவாக்க திட்டத்தை முதல்வர் முக ஸ்டாலின் நேற்று தொடங்கிவைத்தார்.

'வெல்லும் தமிழ்ப்பெண்கள்' என்ற பெயரில் சென்னை நேரு உள் விளையாட்டு அரங்கில் நடைபெற்ற நிகழ்ச்சியில், தமிழ்நாட்டின் பல்வேறு துறைகளில் சாதனை படைத்த பெண்கள் ஒன்றிணைந்து, தங்களின் வெற்றிக்கதைகளையும் பெண்கள் முன்னேற்றத்திற்காக தமிழ்நாடு அரசு செய்துவரும் முன்னெடுப்புகள் குறித்தும் புகழ்ந்து பேசினர்.

கௌரவிக்கப்பட்ட சாதனை பெண்கள்..

வெல்லும் தமிழ்ப் பெண்கள் நிகழ்ச்சியில் ஐபிஎஸ், ஐஏஎஸ், ஐஎஃஎஸ் அதிகாரிகள், காவலர்கள், மருத்துவர்கள் உள்ளிட்ட பல்வேறு பெண்கள் மேடையில் ஏற்றி கவுரவிக்கப்பட்டனர். மேலும் அரசின் திட்டத்தால் பயனடைந்த பெண்கள் தங்களது அனுபவங்களை பகிர்ந்துகொண்டனர்.

அப்போது வாய் பேச இயலாத பெண் ஒருவர் சைகை மொழியில் தனது கருத்துகளை கூறினார். தொடர்ந்து நிகழ்ச்சியில் திருப்பரங்குன்றத்தை சேர்ந்த பெண் ஒருவர் பேசுகையில், "திருப்பரங்குன்றம் மலை மேல நின்னு ஜெய்ச்சுட்டேன் முருகா-னு கத்திட்டு வந்திருக்கேன்" என்று கூறி தமிழக அரசுக்கு நன்றி தெரிவித்தார்.