இது சாதாரண வலிதான், தானாக சரியாகிவிடும் என்று அலட்சியப்படுத்தும் சில அறிகுறிகள், பிற்காலத்தில் தீவிர உடல்நலப் பிரச்சனைகளின் ஆரம்ப அறிகுறிகளாக இருக்கலாம். எச்சரிக்கை அறிகுறிகளை புரிந்துகொண்டு, ஆரம்பத்திலேயே கவனிப்பதுதான் புத்திசாலித்தனம்.

அந்த வகையில், ஆண்கள் தங்கள் வாழ்நாளில் ஒருபோதும் அலட்சியப்படுத்த கூடாத 8 எச்சரிக்கை அறிகுறிகளை இங்கு பார்க்கலாம்.

1. காரணமின்றி உடல் எடை குறைதல்

உடற்பயிற்சி செய்யாமல் அல்லது டயட் பின்பற்றாமல், உடல் எடை திடீரென குறைவது எச்சரிக்கை அறிகுறியாகும். அது ஹைப்பர் தைராய்டிசம், சர்க்கரை நோய் அல்லது ஹார்மோன் சமநிலையின்மையின் அறிகுறியாக இருக்கலாம். அரிதாக, சில புற்றுநோய்களின் ஆரம்ப அறிகுறியாகவும் இருக்கலாம்

2. வயிற்றுப் பிரச்சனைகள்

வயிற்றில் ஏற்படும் அசெளகரியங்களை ஒருபோதும் புறக்கணிக்கக்கூடாது. தொடர்ச்சியான வயிற்றுப்போக்கு, மலச்சிக்கல் மற்றும் மலத்தில் ரத்தம் வருதல் போன்றவை பெருங்குடல் புற்றுநோய் உள்ளிட்ட தீவிர செரிமான நோய்களின் அறிகுறிகளாக இருக்கலாம். அவற்றை முன்கூட்டியே கண்டறிந்து சரியான நேரத்தில் சிகிச்சை அளிப்பது அவசியம்.

3. தொடர்ச்சியான முதுகு வலி

முதுகுவலி பலருக்கும் ஏற்படும் பொதுவான பிரச்சனையாகும். இருப்பினும் நீண்ட நாட்கள் நீடித்தால் அல்லது பிற அறிகுறிகள் சேர்ந்து வந்தால் புறக்கணிக்கக்கூடாது. இவை தண்டுவடப் பிரச்சனை அல்லது சிறுநீரகம் தொடர்பான பிரச்சனையின் அறிகுறியாக இருக்க வாய்ப்புள்ளது.

4. மார்பு வலி அல்லது அசௌகரியம்

மார்பு வலி அல்லது அழுத்த உணர்வு இதயம் தொடர்பான பிரச்சனையின் முக்கிய அறிகுறியாக இருக்கலாம். இந்த அறிகுறியை புறக்கணிப்பது உயிருக்கு ஆபத்தாக மாறக்கூடும். நெஞ்சில் ஏதேனும் அசெளகரியம் ஏற்பட்டால், மருத்துவ உதவி நாடுங்கள்.

5. சிறுநீர் கழிப்பதில் ஏற்படும் மாற்றங்கள்

அடிக்கடி சிறுநீர் கழிப்பது, சிறுநீர் கழிக்கும் போது எரிச்சல் அல்லது சிரமம் ஏற்படுவது மற்றும் சிறுநீரின் அளவு குறைவது போன்ற அறிகுறிகளை உடனடியாக கவனிக்க வேண்டும். இவை புரோஸ்டேட் சுரப்பி வீக்கம் அல்லது அது தொடர்பான பாதிப்புகளின் எச்சரிக்கையாக இருக்கலாம். சிறுநீரக தொற்று அல்லது நீரிழிவு போன்ற பிரச்சனைகளாலும் இவ்வாறு ஏற்படலாம்.

6. சோர்வு அல்லது சோம்பல்

உடல் மிகவும் சோர்வாக அல்லது ஆற்றல் இல்லாமல் உணர்ந்தால், ஒருபோதும் புறக்கணிக்கக்கூடாது. அனீமியா, தூக்கமின்மை மற்றும் தைராய்டு பிரச்சனைகள் ஆகிய அனைத்தும் சோர்வை ஏற்படுத்தக்கூடும். சில சமயங்களில் நீரிழிவு அல்லது மனநலப் பிரச்சனைகளும் காரணமாக இருக்கலாம். சோர்வுக்கான காரணத்தை விரைவில் கண்டறிந்து தீர்வு காண்பது அவசியம்.

7. மூச்சுத்திணறல்

இது இதயம் அல்லது நுரையீரல் தொடர்பான பிரச்சனையின் அறிகுறியாக இருக்கலாம். படிக்கட்டுகளில் ஏறும்போதோ அல்லது நடக்கும்போதோ மூச்சுவிடுவதில் சிரமத்தை சந்தித்தால் மருத்துவரை சந்திப்பது நல்லது. மூச்சுத்திணறல் சில சமயங்களில் ஆஸ்துமா மற்றும் நாள்பட்ட நுரையீரல் அடைப்பு நோயின் அறிகுறியாகவும் இருக்கலாம்.

8. மனநிலை மாற்றங்கள்

குடும்ப பொறுப்பு, வேலை அழுத்தம் போன்ற காரணங்களால் மன அழுத்தத்திற்கு ஆளாக நேரிடுகிறது. நாள்பட்ட மன அழுத்தம், பதட்டம் அல்லது மனச்சோர்வு உடல் மற்றும் மன ஆரோக்கியத்தை பாதித்து, உயர் ரத்த அழுத்தம் மற்றும் இதய நோய் அபாயத்தை அதிகரிக்கலாம். எனவே, மனநிலை மாற்றங்களை எச்சரிக்கை அறிகுறியாக புரிந்துகொண்டு மருத்துவர் அல்லது மனநல நிபுணரை அணுகி ஆலோசனை பெறுவது நல்லது.

குறிப்பு: இந்த அறிகுறிகள் அனைத்தும் தீவிர நோயை குறிக்கும் என்று அர்த்தமல்ல. இருப்பினும் அவை நீடித்தால் அல்லது மோசமடைந்தால் மருத்துவரை அணுகி ஆலோசனை பெறுவது நல்லது.