கடந்த பிப்ரவரி மாத இறுதியில் ஈரான் மீது அமெரிக்கா மற்றும் இஸ்ரேல் நடத்திய கூட்டுத் தாக்குதலின் முதல் நாளிலேயே காமேனி கொல்லப்பட்டார்.

கட்டுப்பாடான கூட்டம்

கடந்த 1989-ல் ஈரானின் முந்தைய உச்ச தலைவர் ருஹொல்லா கொமேனியின் இறுதிச்சடங்கின் போது ஏற்பட்ட பெரும் குழப்பத்தோடு ஒப்பிடுகையில், இந்த ஊர்வலம் மிகவும் கட்டுப்பாட்டுடன் நடத்தப்பட்டது.

அன்று கொமேனியின் இறுதிச்சடங்கில் 1 கோடியே 10 லட்சத்திற்கும் அதிகமான மக்கள் கலந்து கொண்டனர். இது அன்றைய ஈரானின் மக்கள் தொகையில் ஆறில் ஒரு பங்காகும். நாட்டின் இவ்வளவு பெரிய சதவீத மக்கள் ஒரு இறுதிச்சடங்கில் பங்கேற்றது கின்னஸ் சாதனையாகவும் பதிவானது. அப்போது கொமேனியின் உடலை ஏற்றிச் சென்ற வாகனத்தை நோக்கி மக்கள் முண்டியடித்ததால் ஏற்பட்ட நெரிசலில் சிக்கி 8 பேர் உயிரிழந்தனர். 10,000-க்கும் மேற்பட்டோர் காயமடைந்தனர்.

ஆனால், தற்போதைய காமேனியின் இறுதி ஊர்வலத்தை ஈரான் அரசு முழுமையாகக் கட்டுப்படுத்தியுள்ளது. போர்ச் சூழல் மற்றும் ஆறு மாதங்களுக்கு முன்பு ஈரானில் வெடித்த கடுமையான அரசுக்கு எதிரானப் போராட்டங்களுக்குப் பிறகு, நாடு இன்னும் வலிமையோடும் ஒற்றுமையோடும் இருக்கிறது என்பதைக் காட்டவே அரசு இந்த ஏற்பாடுகளைச் செய்துள்ளது. இதற்கு முந்தைய நாள் தலைநகர் டெஹ்ரானில் நடந்த இறுதி ஊர்வலத்திலும் கொமேனியின் இறுதிச்சடங்கிற்கு நிகராக மக்கள் கூட்டம் அலைமோதியது.

வராத வாரிசு மொஜ்தபா

• இந்த இறுதிச்சடங்கு நிகழ்வுகளில் இதுவரை காமேனியின் வாரிசும் அவரது மகனுமான மொஜ்தபா காமேனி எங்கும் தென்படவில்லை. மார்ச் மாத தொடக்கத்தில் அவர் புதிய உச்ச தலைவராகப் பொறுப்பேற்றதில் இருந்து பொதுவெளியில் வரவில்லை.
• அவரது தந்தை கொல்லப்பட்ட அதே வான்வழித் தாக்குதலில் மொஜ்தபாவும் காயமடைந்ததாக ஈரான் அதிகாரிகள் தரப்பில் கூறப்படுகிறது.
• எனவே, வரும் நாட்களில் நடக்கும் சடங்குகளிலாவது அவர் பங்கேற்பாரா என்பது இன்னும் கேள்விக்குறியாகவே உள்ளது.
• அடுத்த கட்டமாக ஷியா மக்கள் அதிகம் வாழும் அண்டை நாடான ஈராக்கில் புதன்கிழமை அன்று இறுதி ஊர்வலம் நடைபெறவுள்ளது.
• ஈரானை 30 ஆண்டுகளுக்கும் மேலாக ஆட்சி செய்து, தனது 86-வது வயதில் மறைந்த காமேனியின் உடல் வரும் வியாழக்கிழமை அன்று அவரது சொந்த ஊரும், வடகிழக்கு ஈரானின் புனித நகரமுமான மஷாத் (Mashhad) பகுதியில் நல்லடக்கம் செய்யப்படவுள்ளது.