வங்கதேச பிரதமர் தாரிக் ரஹ்மான் ஜூன் 22-ஆம் தேதி தொடங்கிய நான்கு நாள் சீனப் பயணத்தின் போது இந்த திட்டம் மீண்டும் முக்கியத்துவம் பெற்றது.
பெய்ஜிங்கில் சீன அதிபர் ஷி ஜின்பிங்கை சந்தித்தபோது, இரு நாடுகளும் பிராந்திய இணைப்பை வலுப்படுத்தும் நோக்கில் இந்த பொருளாதார வழித்தடத் திட்டத்தை முன்னெடுப்பது குறித்து ஆலோசனை நடத்தின.
இதுகுறித்து வங்கதேசத்திற்கான சீன தூதர் யாவ் வென் கூறுகையில் சுமார் 15 ஆண்டுகளுக்கு முன்பு வங்கதேசம்-சீனா-இந்தியா-மியான்மர் பொருளாதார வழித்தடத் திட்டத்தை முன்மொழிந்தோம். சில முன்னேற்றங்கள் ஏற்பட்டாலும், பல்வேறு காரணங்களால் சீனா எதிர்பார்த்த அளவுக்கு அது செயல்படவில்லை" என்றார்.
இந்த வழித்தடத்தில் இந்தியாவும் இணையுமா என்ற கேள்விக்கு பதிலளித்த அவர் விருப்பமுள்ள எந்த நாடும் இதில் இணையலாம். இந்தத் திட்டத்தின் நோக்கம் பிராந்திய இணைப்பு மற்றும் பொருளாதார ஒத்துழைப்பை மேம்படுத்துவதுதான் என்று தெரிவித்தார்.
இந்த திட்டத்தின்படி சீனாவின் யுன்னான் மாகாண தலைநகரான குன்மிங்கில் இருந்து மியான்மரின் மாண்டலே வரை சாலை அமைக்கப்படும். அங்கிருந்து ஒரு பாதை யாங்கூன் நோக்கியும் மற்றொரு பாதை ரகைன் மாநிலத்தில் உள்ள கியாவ்க்பியூ ஆழ்கடல் துறைமுகம் நோக்கியும் பிரியும். பின்னர் அந்த வழித்தடத்தை ரகைன் வழியாக வங்கதேசத்தின் சிட்டகாங் மற்றும் காக்ஸ் பஜார் நகரங்களுடன் இணைத்து, வங்காள விரிகுடாவில் உள்ள சிட்டகாங் மற்றும் மொங்க்லா துறைமுகங்களை நேரடியாக அடையும் திட்டம் சீனாவிடம் உள்ளது.
உண்மையில், இது முற்றிலும் புதிய திட்டம் அல்ல. 1990-களில் வங்கதேசம்-சீனா-இந்தியா-மியான்மர் பொருளாதார வழித்தடம் என்ற பெயரில் குன்மிங்கிலிருந்து மாண்டலே, டாக்கா வழியாக கொல்கத்தா வரை இணைக்கும் திட்டம் முன்வைக்கப்பட்டது.
ஆனால், சீனாவின் 'பெல்ட் அண்ட் ரோடு' (BRI) திட்டம் தொடர்பாக இந்தியா எடுத்த எச்சரிக்கையான நிலைப்பாடு மற்றும் இரு நாடுகளுக்கிடையேயான உறவில் ஏற்பட்ட விரிசல் காரணமாக அந்தத் திட்டம் முன்னேறவில்லை. இறுதியில், 2019-ஆம் ஆண்டு BRI திட்டங்களின் அதிகாரப்பூர்வ பட்டியலிலிருந்தும் BCIM நீக்கப்பட்டது.
இந்த புதிய வழித்தடத் திட்டத்தில் மிகப்பெரிய சவாலாக இருப்பது, அது மியான்மரின் உள்நாட்டுப் போர் தீவிரமாக நடைபெற்று வரும் ரகைன் மாநிலம் வழியாகச் செல்வதுதான். ஐ.நா. பாதுகாப்பு கவுன்சிலின் 2026 அறிக்கையின்படி, மியான்மர் ராணுவ ஆட்சி தற்போது நாட்டின் சுமார் 20 சதவீதப் பகுதிகளை மட்டுமே கட்டுப்பாட்டில் வைத்துள்ளது. மீதமுள்ள பகுதிகள் ஆயுதக் குழுக்கள் அல்லது எதிர்ப்புப் படைகளின் கட்டுப்பாட்டில் உள்ளன.
மேலும், மாண்டலே-கியாவ்க்பியூ ரயில் பாதை அமைப்பதற்காக 2021-ஆம் ஆண்டு சீனாவும் மியான்மரும் புரிந்துணர்வு ஒப்பந்தம் செய்திருந்தாலும், இதுவரை அந்தத் திட்டத்தில் குறிப்பிடத்தக்க முன்னேற்றம் ஏற்படவில்லை.
இந்த திட்டத்தில் வங்கதேசமும் இன்னும் இறுதி முடிவு எடுக்கவில்லை. ஜூன் 27-ஆம் தேதி செய்தியாளர்களிடம் பேசிய வங்கதேச வெளியுறவுத்துறை அமைச்சர் கலிலுர் ரஹ்மான் இந்த முன்மொழிவை தற்போது ஆய்வு செய்து வருகிறோம். ரகைன் மாநிலத்தில் அமைதி திரும்பிய பிறகே மியான்மர் வழியாக நிலப்பாதை அமைப்பது குறித்து முடிவு எடுக்கப்படும் என்று தெரிவித்தார்.
இந்தியாவைப் பொறுத்தவரை, இந்த திட்டம் முக்கியமான புவிசார் அரசியல் தாக்கத்தை ஏற்படுத்தக்கூடும் என கருதப்படுகிறது. ஏற்கனவே மேற்குப் பகுதியில் சீனா-பாகிஸ்தான் பொருளாதார வழித்தடம் மூலம் அரபிக்கடலுக்கு சீனா அணுகலைப் பெற்றுள்ளது. ஆனால் அந்தத் திட்டம் பாகிஸ்தான் ஆக்கிரமிப்பு காஷ்மீரின் கில்கித்-பால்டிஸ்தான் பகுதி வழியாகச் செல்வதால் இந்தியா தொடர்ந்து எதிர்ப்பு தெரிவித்து வருகிறது.
தற்போது இந்தியாவின் கிழக்குப் பகுதியில் வங்காள விரிகுடாவை நோக்கியும் புதிய வழித்தடத்தை உருவாக்க சீனா முயற்சிப்பது, இந்தியாவை இரு பக்கங்களிலும் மூலோபாய ரீதியாகச் சூழும் நடவடிக்கையாக பார்க்கப்படுகிறது. சமீபத்தில் சீன அதிபர் ஷி ஜின்பிங்கும் பாகிஸ்தான் பிரதமர் ஷெஹ்பாஸ் ஷெரீப்பும் CPEC திட்டத்தை மேலும் விரிவுபடுத்தி, குவாதர் துறைமுகத்தை பிராந்திய வர்த்தக மையமாக மாற்றுவது குறித்து உடன்பாடு எட்டிய நிலையில் கிழக்கில் CMBC திட்டத்தையும் வேகப்படுத்துவது சீனாவின் நீண்டகால திட்டத்தின் ஒரு பகுதியாகவே கருதப்படுகிறது.
மேலும், தாரிக் ரஹ்மான் - ஷி ஜின்பிங் சந்திப்பின் போது, தீஸ்தா நதி மேலாண்மை, வெள்ளத் தடுப்பு, பாசன வசதிகள், பசுமை பொருளாதாரம், டிஜிட்டல் தொழில்நுட்ப ஒத்துழைப்பு உள்ளிட்ட பல துறைகளில் இரு நாடுகளும் புரிந்துணர்வை ஏற்படுத்திக் கொண்டன. அதே நேரத்தில் ஒரே சீனா கொள்கைக்கு வங்கதேசம் மீண்டும் தனது ஆதரவை உறுதிப்படுத்தியது.