வாழ்க்கையில் அனைத்து நாட்களும் அமைதி, செழிப்பு, வெற்றி ஆகியவை உங்களை தேடி வந்து கொண்டே இருப்பதற்கு வாரத்தின் ஏழு நாட்களும் என்ன மந்திரம் சொல்ல வேண்டும் என்பதை தெரிந்து கொள்ளலாம். ஒவ்வொரு நாளும் அந்த நாளுக்குரிய மந்திரத்தை முறையாக உச்சரிப்பதால் நேர்மறை ஆற்றல்கள், அமைதி, வெற்றி, செல்வ வளம் ஆகியவை தேடி வந்து கொண்டே இருக்கும் என நம்பப்படுகிறது.

ஒவ்வொரு நாளுக்குரிய தெய்வத்துடனும் நாம் தொடர்பை ஏற்படுத்திக் கொள்ளும் போது, ஜாதகத்தில் கிரகங்களின் இயக்கத்தை சீராக்கும் என நம்பப்படுகிறது. மந்திரங்களை தொடர்ந்து உச்சரிப்பதால் அந்த கிரகத்தால் ஏற்படும் தீய விளைவுகளை குறைந்து, ஜாதகத்தில் சமநிலை ஏற்பட துவங்கும். எந்த நாளில் என்ன மந்திரத்தை சொன்னால் நம்முடைய வாழ்க்கையில் மாற்றம் ஏற்படும் என்பதை தெரிந்து கொள்ளலாம்.

தினசரி சொல்ல வேண்டிய மந்திரங்களும், பலன்களும் :

திங்கட்கிழமை :

சிவபெருமானை வழிபடுவதற்குரிய இந்த நாள் சந்திரனுக்குரியதாகும். அதனால் இது மனம், உணர்ச்சி ஆகியவற்றுடன் தொடர்புடைய நாளாக கருதப்படுகிறது. இந்த நாளில் சிவனுக்குரிய

"ஓம் நம சிவாய"

மந்திரத்தை உச்சரிக்க வேண்டும். இதனால் சிவபெருமானின் ஆசியுடன் மனஅமைதி கிடைக்கும். உறவுகள் பலப்படும். நலமான வாழ்க்கை அமையும்.

செவ்வாய்கிழமை:

செவ்வாய்கிழமை ராம பக்தர்கள் அனுமனுக்கும், தமிழ் கடவுளான முருகப் பெருமானுக்கும் உரிய வழிபாட்டு நாளாகும். இது செவ்வாய் கிரகத்திற்குரிய நாளாகும். ஆக்ரோஷம், செயல், ஆற்றல் ஆகியவற்றிற்கு காரணமான கிரகம் செவ்வாய் என்பதால் இந்த நாளில்,

"ஓம் ஹம் ஹனுமதே நமஹ"

என்ற மந்திரத்தை பக்தியுடன் சொல்ல வேண்டும்.இதனால் தைரியம், வலிமை, பாதுகாப்பு, வெற்றி ஆகியவை கிடைக்கும். செவ்வாய் தோஷத்தி இருந்து விடுபட முடியும்.

புதன்கிழமை :

புதன்கிழமை, அறிவு மற்றும் தகவல் தொடர்பிற்கு அதிபதியான புதன் பகவானால் ஆளப்படும் நாளாகும். இவரே தடைகளை நீக்கி, ஞானத்தை அருளக் கூடியவர் என்பதால் இந்த நாளில் விநாயகப் பெருமானை வழிபடுவது சிறப்பு. இந்த நாளில்,

"ஓம் கம் கணபதயே நமஹ"

என்ற மந்திரத்தை சொல்ல வேண்டும். இதனால் அறிவுத்திறன், நினைவாற்றல், பேச்சாற்றல், விநாயகரின் அருள் கிடைக்கும். தடைகள் விலகி, வெற்றி கிடைக்கும்.

வியாழக்கிழமை :

வியாழக்கிழமை என்பது மங்களகாரகனான குரு பகவானுக்கும், காக்கும் கடவுளான பெருமாளுக்கும் உரியதாகும். ஆன்மீக குரு வழிபாட்டிற்கும் ஏற்ற நாளாகும். இந்த நாளில்,

"ஓம் நமோ பகவதே வாசுதேவாய"

என்ற மந்திரத்தை உச்சரிக்க வேண்டும். இந்த மந்திரத்தை உச்சரிப்பதால் ஞானம், கல்வி, செழிப்பு ஏற்படும். அதிர்ஷ்டம், வளர்ச்சி ஆகியவை கிடைக்கும்.

வெள்ளிக்கிழமை:

வெள்ளிக்கிழமை, சுக்கிர பகவானுக்குரிய நாளாகும். இவர் காதல், அழகு, கலைகள் மற்றும் சுகபோகமான வாழ்க்கை ஆகியவற்றிற்கு காரணமான கிரகமாக நம்பப்படுகிறது. மேலும் இது செல்வத்திற்கு அதிபதியான மகாலட்சுமிக்கும், சுகங்களை தந்து துன்பங்களை போக்கும் அம்பிகைக்கும் உரிய நாளாகும். இந்த நாளில்,

" ஓம் ஸ்ரீம் மகாலட்சுமியை நமஹ"

என்ற மந்திரத்தை சொல்லலாம். இந்த மந்திரத்தை சொல்லுவதால் செல்வம், ஒற்றுமை, சுப நிகழ்ச்சிகள் நடைபெறும். லட்சுமி தேவியின் அருளும் அளவில்லாத செல்வ வளம், மகிழ்ச்சியான வாழ்க்கை அமையும்.

சனிக்கிழமை :

சனிக்கிழமை என்பது கர்மம், ஒழுக்கம், நீதி ஆகியவற்றிற்குரிய கிரகமான சனியால் ஆளப்படுகிறது. இது சனி பகவானுக்கும், ஆஞ்சநேயர் வழிபாட்டிற்கும் உரிய நாளாகும். இந்த நாளில்,

"ஓம் ஷாம் ஷனைச்சராய நமஹ"

என்ற மந்திரத்தை சொல்லலாம். இந்த மந்திரத்தை சொல்லுவதால் ஏழரை சனியின் தாக்கம், சனி பகவானின் தீய பார்வையால் ஏற்படும் கெடுபலன்கள் குறையும். ஒழுக்கம், பொறுமை கிடைக்கும். கவனம் மேம்படும்.

ஞாயிற்றுக்கிழமை :

ஞாயிற்றுக்கிழமை, சூரிய பகவானுக்குரிய நாளாகும். இவரே ஆரோக்கியம், தலைமை பதவி, அரசு தொடர்பான காரியங்களுக்கு காரணமான கிரகம் ஆவார். இந்த நாளில்,

"ஓம் க்ரிணி சூர்யாய நமஹ"

என்ற மந்திரத்தை சொல்லலாம். இந்த மந்திரத்தை சொல்லுவதால் செழிப்பு, ஆரோக்கியம், சூரிய பகவானின் அருள் கிடைக்கும். வாழ்க்கையில் நேர்மறை ஆற்றல்கள் அதிகரிக்கும், வளர்ச்சி அதிகரிக்கும்.