அவர் தாக்கல் செய்த வேட்புமனுவில் தனது மீது இரண்டு குற்ற வழக்குகள் நிலுவையில் இருப்பதாக குறிப்பிட்டுள்ளார். இதன் மூலம் சட்ட ரீதியான விவரங்களை வெளிப்படையாக வெளியிட்டு உள்ளார் என்றாலும், இதே தகவல்கள் முன்னதாக தாக்கல் செய்யப்பட்ட வேட்புமனுவில் இடம் பெறாதது கவனத்தை ஈர்த்து உள்ளது.

பெரம்பூர் வேட்புமனுவில் தகவல் இல்லை

2025 ஆம் ஆண்டிலேயே பதிவு செய்யப்பட்ட இந்த வழக்குகள், அவர் பெரம்பூர் தொகுதியில் தாக்கல் செய்த வேட்புமனுவில் குறிப்பிடப்படாதது தற்போது சர்ச்சைக்கு வழிவகுத்து உள்ளது. வேட்பாளர்கள் தங்கள் மீது உள்ள குற்ற வழக்குகளை முழுமையாக வெளியிடுவது கட்டாயமான நடைமுறை என்பதால், இந்த விவகாரம் தேர்தல் நெறிமுறைகள் தொடர்பான விவாதத்தையும் தூண்டியுள்ளது.

முதல் வழக்கு, பெரம்பூரில் வேட்புமனு தாக்கல் செய்த பின்னர் நடைபெற்ற தேர்தல் பரப்புரையைச் சார்ந்ததாக தகவல்கள் தெரிவிக்கின்றன. அந்த நிகழ்வில் ஏற்பட்ட குற்றச்சாட்டுகளை அடிப்படையாகக் கொண்டு வழக்கு பதிவு செய்யப்பட்டதாக கூறப்படுகிறது.

இரண்டாவது வழக்கு, 2025 ஆகஸ்ட் மாதத்தில் மதுரையில் நடைபெற்ற தவெக மாநாட்டின் போது ஏற்பட்ட சம்பவங்களுடன் தொடர்புடையதாகும். அந்த மாநாட்டின் போது ஏற்பட்ட பதற்ற நிலைமைகள் காரணமாக வழக்கு பதிவு செய்யப்பட்டதாக தகவல்கள் வெளியாகி உள்ளன.

அரசியல் தாக்கம் அதிகரிக்கும் வாய்ப்பு

இந்த விவகாரம் தேர்தல் சூழ்நிலையில் முக்கிய அம்சமாக மாறியுள்ளது. வேட்புமனுவில் தகவல் வெளியீடு தொடர்பான தெளிவுத் தன்மை குறித்து அரசியல் கட்சிகள் வலியுறுத்தும் நிலையில், விஜய் தரப்பில் இருந்து இதற்கு விளக்கம் அளிக்கப்படுமா என்ற எதிர்பார்ப்பு நிலவுகிறது. இதே நேரத்தில், இந்த சர்ச்சை தேர்தல் அரசியலில் மேலும் தாக்கத்தை ஏற்படுத்தும் வாய்ப்பு இருப்பதாக அரசியல் பார்வையாளர்கள் மதிப்பிடுகின்றனர்.

2 தொகுதியில் போட்டியிடும் விஜய்

தமிழக வெற்றிக் கழகத்தின் (தவெக) தலைவரான விஜய், வரும் 2026 தமிழ்நாடு சட்டமன்றத் தேர்தலில் பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிடுகிறார். மார்ச் 29 அன்று தனது கட்சியின் 234 வேட்பாளர் பட்டியலை வெளியிட்ட அவர், தானே இரண்டு இடங்களில் களம் காண்பதாக அறிவித்து அரசியல் களத்தில் பெரும் எதிர்பார்ப்பை ஏற்படுத்தினார்.

இதன்படி, கடந்த மார்ச் 30-ம் தேதி சென்னை பெரம்பூர் தொகுதியில் தனது முதல் வேட்புமனுவைத் தாக்கல் செய்தார். அதனைத் தொடர்ந்து, ஏப்ரல் 1-ம் தேதி மத்திய தமிழகத்தின் இதயப் பகுதியாகக் கருதப்படும் திருச்சி கிழக்கு தொகுதியிலும் தனது வேட்புமனுவை அவர் தாக்கல் செய்தார். ஒரே நேரத்தில் வட தமிழகம் மற்றும் மத்திய தமிழகம் என இருவேறு மண்டலங்களில் போட்டியிடுவதன் மூலம், மாநிலம் தழுவிய தனது செல்வாக்கை நிரூபிக்க விஜய் திட்டமிட்டுள்ளார்.

தமிழகத்தில் தேர்தல் தேதி அறிவிக்கப்பட்டதை அடுத்து, தவெக தலைவர் விஜய் தனது பிரச்சார பயணங்களை வகுத்து சுற்றுப்பயணம் மேற்கொண்டு வருகிறார் என்பது குறிப்பிடத்தக்கது.