ஐந்து மாநில தேர்தல்களில் பதிவான வாக்குகள் எண்ணும் பணிகள் துவங்கி நடந்து கொண்டிருக்கிறது. இந்த தேர்தல் முடிவுகளை அரசியல் கட்சியினர், பொதுமக்கள் ஆர்வமுடன் உற்றுநோக்கி வருகின்றனர்.

இதனிடையில் புதுச்சேரியில் வாக்கு எண்ணிக்கைக்கான வேலைகள் தீவிரமாக நடந்து வருகிறது. மொத்தமுள்ள 30 தொகுதிகளில் பெரும்பான்மையான இடங்களை யார் கைப்பற்றி ஆட்சியை பிடிக்க போகிறார்கள் என்ற எதிர்பார்ப்பு எழுந்துள்ளது.

புதுச்சேரியில் உள்ள லாஸ்பேட்டை பகுதியில் வாக்கு எண்ணும் பணிகள் நடந்து கொண்டிருக்கிறது. வாக்கு எண்ணிக்கை மையம் இந்த பகுதி முழுவதும் போலீஸ் கட்டுப்பாட்டில் உள்ள நிலையில், வாகனங்கள் எதுவும் உள்ளே அனுமதிக்கப்படவில்லை. மூன்று கட்ட சோதனைக்கு பின்னரே வாக்கு எண்ணும் முகவர்கள் உள்ளே அனுமதிக்கப்பட்டனர்.

புதுச்சேரியில் தேசிய ஜனநாயக கூட்டணி ஆட்சி நடந்து வரும் நிலையில் ரங்கசாமி முதல்வராக உள்ளார். 2026 தேர்தலிலும் இந்த கூட்டணி இணைந்துள்ள நிலையில் அவர்களுடன் லட்சிய ஜனநாயக கட்சியும் அங்கம் வகிக்கிறது. மற்றொரு பக்கம் இந்தியா கூட்டணியில் திமுக, காங்கிரஸ், விசிக ஆகிய கட்சிகள் போட்டியிட்டுள்ளன. மேலும் விஜய்யின் தமிழக வெற்றி கழகமும் புதுச்சேரியில் தனித்து போட்டியிட்டுள்ளது. இதனையடுத்து இந்த தேர்தலில் ரங்கசாமி ஆட்சியை தக்க வைப்பாரா அல்லது இந்த கூட்டணி ஆட்சியை பிடிக்குமா என்ற எதிர்பார்ப்பு எழுந்துள்ளது.

மற்றொரு பக்கம் தமிழக வெற்றி கழகம் இந்த தேர்தலில் என்ன மாதிரியான தாக்கத்தை ஏற்படுத்தும் என்பதும் அரசியல் களத்தில் கவனம் ஈர்த்து கொண்டிருக்கிறது. இந்நிலையில் முதல்கட்டமாக தபால் வாக்குகள் எண்ணப்படும் பணிகள் துவங்கிய நிலையில் இதில் என்டிஏ கூட்டணி முன்னிலை வகித்து வருகிறது. 13 இடங்களில் வெற்றி பெற்று இந்த கூட்டணி தற்போது முன்னிலை வகித்து கொண்டிருக்கிறது. பெரும்பான்மைக்கு 16 தொகுதிகளில் வெற்றி பெற வேண்டிய நிலையில், அடுத்தடுத்த வாக்கு சுற்றுகளில் இந்த நிலை மாறுமா என்பதை பொறுத்திருந்து பார்க்கலாம்.

என்.ஆர். காங்கிரஸ் 16, பாஜக 10 மற்றும் அதிமுக ஜோஸ் சார்லஸ் மார்ட்டினின் ல.ஜ.க தலா இரண்டு தொகுதிகளில் தேசிய ஜனநாயக கூட்டணியில் போட்டியிடுகின்றனர். இந்தியா கூட்டணியில் காங்கிரஸ் கட்சிக்கு 17, திமுகவுக்கு 13 மற்றும் விசிகவுக்கு இரண்டு தொகுதிகள் ஒதுக்கப்பட்டுள்ளன. அதோடு சில தொகுதிகள் காங்கிரஸ் கட்சி வேட்பாளர்கள் தனியாகவும் களம் இறங்கியுள்ளன. நேரடியாக சில இடங்களில் திமுகவுடன் காங்கிரஸ் மோதுகிறது.

இதனிடையில் என்டிஏ கூட்டணி வேட்பாளரான ரங்கசாமி தட்டாஞ்சாவடி தொகுதியில் வெற்றியை பதிவு செய்துள்ளார். 4,441 வாக்குகள் வித்தியாசத்தில் அவர் வெற்றி பெற்றுள்ள நிலையில், இரண்டாம் இடத்தில் தமிழக வெற்றி கழகம் உள்ளது. அதே நேரம் ரங்கசாமியை எதிர்த்து போட்டியிட்ட காங்கிரஸ் மாநில தலைவரான வைத்திலிங்கம் நான்காம் இடத்துக்கு சென்றுள்ளார். இது காங்கிரஸ் தொண்டர்கள் மத்தியில் கடும் அதிர்ச்சியை ஏற்படுத்தியுள்ளது குறிப்பிடத்தக்கது.