போட்டியிட்ட இரண்டு தொகுதியிலும் வெற்றி பெற்றுவிட்டார். ஒருவர் இரண்டு தொகுதியில் சட்டமன்ற உறுப்பினராக இருக்க முடியாது என்ற காரணத்தால் ஒரு தொகுதியை ராஜினாமா செய்ய வேண்டும். விஜய் எந்த தொகுதியை ராஜினாமா செய்வார்?

தவெக 234 தொகுதிகளில் போட்டி

தமிழகம் முழுவதும் கடந்த ஏப்ரல் 23, 2026 அன்று தமிழகத்தின் 17வது சட்டமன்றத் தேர்தலுக்கான வாக்குப்பதிவு நடந்தது. தமிழகம் முழுவதும் உள்ள 234 தொகுதிகளிலும் ஒரே கட்டமாக நடந்த இந்த தேர்தலில், 233 தொகுதிகளில் தமிழக வெற்றிக் கழகம் முதல் முறையாக எந்தொரு கட்சிகளுடனும் கூட்டணி வைக்காமல் தனித்து போட்டியிட்டது. மேலும், சேலம் மாவட்டம் எடப்பாடி தொகுதியில் மட்டும் சுயேட்சி வேட்பாளர்களுக்கு தவெக ஆதரவு தெரிவித்து இருந்தது.

தவெக 108 தொகுதிகளில் வெற்றி

இந்நிலையில், தேர்தலில் பதிவான வாக்குகளை எண்ணும் பணி நேற்று (மே 04ந் தேதி) நடைபெற்றது. தபால் வாக்குகள் எண்ணும் போது பின்னடைவில் இருந்த தவெக, மின்னணு வாக்குப்பதிவு இயந்திரங்களில் பதிவான வாக்குகளை எண்ணும்போது தொடர்ந்து முன்னிலை வகித்து வந்தது.

இறுதியில், தவெக போட்டியிட்ட 234 தொகுதிகளில் 108 இடங்களைப் பிடித்து வெற்றி வாகை சூடியது. எந்தவொரு கட்சியுடனும் கூட்டணி வைக்காமல் தனித்து நின்ற தவெக கட்சி அதிக தனிப்பெரும்பான்மையை பெற்றது ஒட்டுமொத்த நாட்டையுமே திரும்பி பார்க்க வைத்துள்ளது

வியப்பை ஏற்படுத்தி வெற்றி

அதுமட்டுமல்லாமல், தொடங்கி இரண்டு வருடங்களே ஆன தவெக கட்சி தமிழ்நாட்டில் பல வருடங்கள் பழமையான இருபெரும் திராவிட கட்சிகளான திமுக மற்றும் அதிமுகவை தோற்கடித்து வெற்றி சரித்திரம் படைத்து வியப்பை ஏற்படுத்தி உள்ளது. இது தமிழக அரசியலிலேயே மிகப்பெரிய வெற்றியாக பார்க்கப்படுகிறது. அதேசமயம், மாற்றத்திற்கான வாய்ப்பாகவும் கூறப்படுகிறது.

விஜய் இரண்டு தொகுதிகளில் போட்டி

தவெக தலைவர் விஜய் சென்னையில் உள்ள பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிட்டார். மேலும், அந்த இரு தொகுதியுமே முதலமைச்சர் தொகுதியாக அறிவிக்கப்பட்டது. முதலமைச்சர் வேட்பாளர்களாக உள்ள மு.க.ஸ்டாலினோ, எடப்பாடி பழனிசாமியோ இரு தொகுதிகளில் போட்டியிடாத நிலையில், விஜய் இரு தொகுதிகளில் போட்டியிடுவது அரசியல் வட்டாரங்களில் பேசும்பொருளானது. மேலும், தோல்வி பயத்தில் தான் இரண்டு தொகுதிகளில் போட்டியிடுகிறார் என்று பல்வேறு விமர்சனங்களும் எழுந்தது.

விஜய் இரண்டு தொகுதிகளிலும் வெற்றி

இந்த நிலையில், தவெக தலைவர் விஜய் தான் போட்டியிட்ட இரண்டு தொகுதிகளான திருச்சி கிழக்கு மற்றும் பெரம்பூர் ஆகியவற்றில் அதிக வாக்கு வித்தியாசத்தில் அபார வெற்றிப் பெற்றார். அதன்படி, பெரம்பூரில் 1 லட்சத்து 19 ஆயிரத்து 454 வாக்குகள் பெற்று 53 ஆயிரத்து 532 வாக்குகள் வித்தியாசத்திலும், திருச்சி கிழக்கு தொகுதியில் 91 ஆயிரத்து 381 வாக்குகளை பெற்று சுமார் 27 ஆயிரத்து 416 வாக்குகள் வித்தியாசத்திலும் வெற்றியை குவித்துள்ளார்.

எம்.எல்.ஏ பதவியை ராஜினாமா செய்யும் விஜய்

இதையடுத்து திருச்சி கிழக்கு மற்றும் பெரம்பூர் ஆகிய இரண்டு தொகுதியிலும் சட்டமன்ற உறுப்பினராக தேர்ந்தெடுக்கப்பட்டுள்ளார். ஆனால், தமிழகத்தில் ஒருவர் இரு தொகுதிகளில் எம்.எல்.ஏவாக இருக்க முடியாது என்ற சட்டம் உள்ளது. அதனால், எந்த தொகுதியில் தனது எம்எல்ஏ பதவியை ராஜினாமா செய்வார் என்ற எதிர்பார்ப்பு ஏற்பட்டுள்ளது.

திருச்சி கிழக்கு VS பெரம்பூர்

சென்னையில் தவெக அதிக இடங்களை தக்கவைத்துள்ளதால், ஒட்டுமொத்த சென்னையும் தவெக வசம் உள்ளது. எனவே, சென்னையில் உள்ள பெரம்பூர் தொகுதியை ராஜினாமா செய்துவிட்டு, திருச்சி கிழக்கில் சட்டமன்ற உறுப்பினராக செயல்படுவார் என்று சொல்லப்படுகிறது.

இல்லையென்றால், பெரம்பூர் தொகுதியை தக்கவைத்துக் கொண்டு, திருச்சி கிழக்கை ராஜினாமா செய்வார். அப்படி செய்யும்போது, திருச்சி கிழக்கில் இடைத்தேர்தல் நடத்தப்படும். அதில் லால்குடி தொகுதியில் தோல்வியடைந்த கு.ப.கிருஷ்ணன் போட்டியிட வாய்ப்பு உள்ளதாக சொல்லப்படுகிறது.