அனைத்து கட்சிகளும் விறுவிறுப்பாக தேர்தல் பிரச்சாரத்தில் ஈடுபட்டு வருகின்றன. இந்த நிலையில், தமிழக வெற்றி கழகத்தின் தலைவர் விஜய் தனது கட்சியின் சின்னமான விசில் சின்னத்தை மக்கள் மனதில் ஆழமாகப் பதிய வைப்பதற்காக, தங்கள் வீடுகளின் வாசலில் விசில் சின்னத்தை கொண்டு கோலமிடும்படி கேட்டுக் கொண்டார்.

விஜய்யின் இந்த நூதன கோரிக்கையை ஏற்று தவெக பெண் தொண்டர்களும், ஆதரவாளர்களும் தங்கள் வீட்டு வாசலில் வண்ணமயமான கோலப்பொடிகளால் விசில் சின்னத்தை கோலமிட்டு தங்களது பெரும் ஆதரவை வெளிப்படுத்தி வருகின்றனர். வழக்கமான தெருமுனை பிரச்சாரங்கள் மற்றும் போஸ்டர்களை நம்பியிருக்கும் அரசியலில் இருந்து விலகி, ஒவ்வொரு வீட்டிற்குள்ளேயும் தனது கட்சியின் அடையாளத்தை கொண்டு சேர்த்து இருக்கிறார் விஜய்.

அனைத்து தொகுதிகளிலும் ஒரே சின்னத்தில் போட்டி

தமிழக வெற்றிக் கழகம் அங்கீகரிக்கப்படாத கட்சியாகவே இருந்தாலும், கணக்குகளைச் சரியாகத் தாக்கல் செய்ததால் தேர்தல் ஆணையம் தவெகவுக்கு விசில் சின்னத்தை பொதுச் சின்னமாக வழங்கியுள்ளது. இதையடுத்து, வரும் 2026 தமிழ்நாடு சட்டமன்றத் தேர்தலில் 233 தொகுதிகளிலும் தவெக வேட்பாளர்கள் விசில் சின்னத்தில் போட்டியிடுகின்றனர். தமிழகத்தில் முதல் முறையாக அரசியல் களம் காணும் தவெகவின் இந்த விசில் சின்னம் ஒரு முக்கிய அரசியல் வெற்றியாகப் பார்க்கப்படுகிறது.

விஜய்யின் நூதன கோரிக்கை

இந்த நிலையில், கடந்த ஏப்.16ந் தேதி சென்னையில் தவெகவின் தேர்தல் வாக்குறுதிகள் அறிவிப்பு நிகழ்ச்சி நடைபெற்றது. அந்த நிகழ்ச்சியில் அக்கட்சியின் தலைவர் விஜய் கலந்துக்கொண்டு தேர்தல் வாக்குறுதிகளை வெளியிட்டார். அப்போது, பேசிய அவர் தேர்தலுக்கு இன்னும் சில நாட்களே இருக்கும் நிலையில், வீட்டு வாசல்களில் விசில் சின்னத்தை கோலமாக போடுமாறு நூதன வேண்டுகோளை முன்வைத்தார்.

விஜய்யின் இந்த வேண்டுகோள் வெளியான சில மணி நேரங்களிலேயே தமிழகம் முழுவதும் உள்ள தவெக தொண்டர்கள் உற்சாகத்துடன் தங்கள் வீட்டு வாசலில் விசில் சின்னத்தை வண்ண கோலமாக வரைந்தனர். அந்த கோலங்கள் வெறும் ஓவியங்களாக மட்டுமல்லாமல் "நமது சின்னம் விசில்", "விசில் போடு.. வெற்றி நமதே" போன்ற வாசங்களையும் எழுதி தங்கள் ஆதரவை வெளிப்படுத்தி வருகின்றனர். இதோடு மட்டுமல்லாமல், அந்த கோலங்களை புகைப்படம் எடுத்து சமுக வலைத்தளங்களிலும் பதிவிட்டு வருகின்றனர். இது இந்திய அளவில் ட்ரெண்டாகி வருகிறது.

விஜய்யின் மாஸ்டர் பிளான்

பொதுவாக, கட்சி தலைவர்களின் பிறந்தநாளான்று ஒவ்வொரு தொகுதியிலும் அக்கட்சியை சேர்ந்த நிர்வாகிகள் அந்த பகுதிகளில் உள்ள பெண்களுக்கு கோலப்போட்டி வைப்பது வழக்கமான ஒன்று. அப்போது, பலர் கோலத்துடன் அக்கட்சியின் சின்னத்தையும் சேர்த்து வரைவார்கள். அதேசமயம், அரசியல் கட்சிகள் வழக்கமான சுவர் விளம்பரங்கள் மற்றும் போஸ்ட்டர்கள் மூலம் தங்கள் கட்சியின் அடையாளத்தை பொதுமக்களிடம் பதிப்பார்கள்.

ஆனால், தேர்தல் சமயத்தின் போது போஸ்ட்டர்கள், பேனர்கள், சுவர் விளம்பரங்களுக்கு எந்தவொரு அரசியல் கட்சியும் பயன்படுத்தக் கூடாது என்பதே தேர்தல் ஆணையத்தின் நடத்தை விதியாகும். இந்த நிலையில், தேர்தல் ஆணையத்தின் விதிகளை மீறாமலும், சுவர் விளம்பரங்கள், போஸ்ட்டர், பேனர்கள் என்று எதுவும் அமைக்காமல், மிகவும் புத்திசாலித்தனமாக யோசித்து தன் கட்சியின் அடையாளச் சின்னத்தை மக்கள் மனதில் எளிமையான முறையில் பதிய வைத்து இருக்கிறார்.