வாடிக்கையாளர்களுக்கு வாகனங்களை உரிய நேரத்தில் வழங்க முடியாததற்கு ஷோரூம் உரிமையாளர்கள் (Dealers) காரணம் அல்ல என்றும், வட்டாரப் போக்குவரத்து அலுவலகங்களில் (RTO) பதிவு நடைமுறைகள் மிகவும் மெதுவாக நடைபெறுவதே இதற்கு முதன்மைச் காரணம் என்றும் தெரியவந்துள்ளது.

தொழில்நுட்பக் கோளாறு என்ற காரணம் - ஏற்க மறுக்கும் வர்த்தகர்கள்

மத்திய அரசின் 'வாஹன்' (Vahan) ஆன்லைன் தளத்தில் ஏற்பட்டுள்ள தொழில்நுட்பக் கோளாறுகள் மற்றும் சேவையகப் (Server) பிரச்சனை காரணமாகவே வாகனப் பதிவுகள் தாமதமாவதாக வட்டாரப் போக்குவரத்து அதிகாரிகள் தரப்பில் கூறப்படுகிறது.

ஆனால், இந்த சமாதானத்தை வாகன ஷோரூம் உரிமையாளர்கள் முற்றிலும் நிராகரிக்கின்றனர். தமிழகத்தின் பிற மாவட்டங்களில் உள்ள ஆர்.டி.ஓ அலுவலகங்களில் வாஹன் இணையதளம் தடையின்றி இயங்கி, வாகனப் பதிவுகள் சுமுகமாக நடைபெற்று வருகின்றன. அப்படியிருக்க, திருச்சி மண்டலத்தில் மட்டும் ஆன்லைன் கோளாறு எனக் கூறுவது எவ்விதத்திலும் ஏற்புடையதல்ல என்று வர்த்தகர்கள் சுட்டிக்காட்டுகின்றனர்.

கிராமப்புற அலுவலகங்களில் தேக்கமடையும் கோப்புகள்

திருச்சி நகரம், ஸ்ரீரங்கம் மற்றும் மணப்பாறை, துறையூர் போன்ற அலகு (Unit) ஆர்.டி.ஓ அலுவலகங்களில் கடந்த ஒரு வாரத்திற்கும் மேலாகப் பதிவு நடவடிக்கைகள் முடங்கியுள்ளன.

குறிப்பாக, கிராமப்புறப் பகுதி ஆர்.டி.ஓ அலுவலகங்களில் ஒரு ஷோரூமிற்கு நாளொன்றுக்கு அதிகபட்சமாக 5 வாகனங்கள் மட்டுமே பதிவு செய்யப்படுகின்றன. ஆனால், ஒவ்வொரு ஷோரூமிலும் தினமும் குறைந்தது 10 முதல் 15 வாகனங்கள் வரை விற்பனையாகின்றன. இதனால் பதிவு செய்யப்பட வேண்டிய வாகனங்களின் எண்ணிக்கை நாளுக்கு நாள் பெருமளவில் தேக்கமடைந்து (Backlog) வருகிறது.

தற்போதைய நிலவரப்படி திருச்சி, ஸ்ரீரங்கம், மணப்பாறை, துறையூர் மற்றும் பெரம்பலூர் பகுதிகளில் உள்ள ஒவ்வொரு விற்பனையாளரிடமும் சுமார் 50 முதல் 100 வாகனங்கள் வரை பதிவிற்காகக் காத்திருக்கின்றன.

வாரத்திற்கு 2 நாட்கள் மட்டுமே இயங்கும் நிலை

மணப்பாறை அலகு ஆர்.டி.ஓ அலுவலகம் வாரத்தில் இரண்டு நாட்கள் மட்டுமே செயல்படுவதால், அந்த குறிப்பிட்ட நாட்களில் பதிவு செய்யத் தவறினால் மேலும் ஒரு வாரம் காத்திருக்க வேண்டிய நிர்பந்தம் ஏற்படுகிறது.

மேலும் மணப்பாறை, துறையூர் போன்ற இடங்களுக்குப் பிற அலுவலகங்களில் இருந்து பொறுப்பு அதிகாரிகளாக நியமிக்கப்படுபவர்களே பதிவுகளை மேற்கொள்கின்றனர். இவர்களைச் சந்திக்க நாள் முழுவதும் ஷோரூம் பிரதிநிதிகள் காத்திருந்தாலும், மாலை வேளையில் "நாளை வாருங்கள்" என்று கூறி திருப்பி அனுப்பப்படுவதாக விற்பனையாளர்கள் வேதனை தெரிவிக்கின்றனர்.

நேரடி ஆன்லைன் பதிவுக்குக் கோரிக்கை

கர்நாடகா போன்ற பிற மாநிலங்களில் செயல்படுவது போல, அங்கீகரிக்கப்பட்ட ஷோரூம் உரிமையாளர்களே 'வாஹன்' இணையதளம் மூலம் நேரடியாகப் புதிய வாகனங்களைப் பதிவு செய்யும் நடைமுறையைத் தமிழகத்திலும் அமல்படுத்த வேண்டும் என வர்த்தகர்கள் கோரிக்கை விடுத்துள்ளனர். இதன் மூலம் பதிவு நடைமுறைகளில் ஏற்படும் காலதாமதம் தவிர்க்கப்படுவதோடு, வெளிப்படைத்தன்மையும் அதிகரிக்கும் என அவர்கள் கருதுகின்றனர்.

இதுகுறித்துத் திருச்சி மண்டல வட்டாரப் போக்குவரத்து மூத்த அதிகாரி ஒருவர் கூறுகையில், ஆன்லைன் அமைப்பில் ஏற்பட்ட தொழில்நுட்பச் சிக்கல்களே இதற்குக் காரணம் என்றும், இது தொடர்பாக உரிய ஆய்வு மேற்கொண்டு பிரச்சினை விரைவில் சரிசெய்யப்படும் என்றும் உறுதியளித்துள்ளார்.