2026-27 நிதியாண்டின் ஜூலை முதல் செப்டம்பர் வரையிலான இரண்டாவது காலாண்டுக்கு கிசான் விகாஸ் பத்ரா திட்டத்தின் வட்டி விகிதங்களில் எந்த மாற்றமும் செய்ய வேண்டாம் என்று நிதியமைச்சகம் முடிவு செய்துள்ளது. இந்தக் காலாண்டிலும் வட்டி விகிதம் 7.5 சதவீதமாகவே தொடரும் என்று அரசு அறிவித்துள்ளது. இது குறித்த அறிவிப்பை நிதியமைச்சகம் ஜூன் 30ஆம் தேதியன்று வெளியிட்டது.

இத்திட்டத்தின் வட்டி விகிதங்கள் தொடர்ந்து பல காலாண்டுகளாக மாற்றமின்றி நீடிக்கின்றன. இது சந்தை ஏற்ற இறக்கங்களுக்கு மத்தியிலும் முதலீட்டாளர்களுக்குப் பாதுகாப்பான மற்றும் நிலையான வருமானத்தை உறுதி செய்கிறது. எவ்வித அபாயமும் இல்லாமல் தங்கள் பணத்தை பெருக்க விரும்பும் முதலீட்டாளர்களுக்கு கிசான் விகாஸ் பத்ரா திட்டம் எப்போதும் ஒரு விருப்பமான தேர்வாக இருந்து வருகிறது. தற்போதுள்ள சிறப்பான 7.5 சதவீத வட்டி விகிதத்தில், இத்திட்டத்தில் முதலீடு செய்யப்படும் பணம் மொத்தம் 115 மாதங்களில் இரட்டிப்பாகிறது. அதாவது, நீங்கள் இன்று இத்திட்டத்தில் முதலீடு செய்தால் 9 ஆண்டுகள் மற்றும் 7 மாதங்களுக்குப் பிறகு உங்கள் பணம் முழுமையாக இரட்டிப்பாகும்.

முதிர்வு காலம் முடியும் வரை பணம் இத்திட்டத்தில் முடக்கப்பட்டிருந்தாலும், சில குறிப்பிட்ட சூழ்நிலைகளில் கணக்கை முன்கூட்டியே முடித்துக்கொள்ள அனுமதி உள்ளது. ஏப்ரல் - ஜூன் காலாண்டிலும் அரசு வட்டி விகிதத்தை 7.5 சதவீதமாகவே வைத்திருந்தது. கடந்த 2023ஆம் ஆண்டின் ஏப்ரல் 1ஆம் தேதி முதல் இத்திட்டத்தின் வட்டி விகிதங்கள் மாற்றம் இல்லாமல் நீடிக்கின்றன, இது முதலீட்டாளர்களுக்கு நிலையான வருமானத்தை வழங்குகிறது.

தபால் நிலையங்களில் செயல்படுத்தப்பட்டு வரும் இந்த திட்டத்தின் மூலம் நாட்டின் எந்தவொரு குடிமகனும் பயனடையலாம். இத்திட்டத்தின் கீழ், வயது வந்த ஒருவர் தனிப்பட்ட கணக்கைத் தொடங்கலாம். அதோடு, மூன்று பேர் வரை இணைந்து கூட்டுக் கணக்கைத் தொடங்கலாம். ஒரு பெற்றோர் அல்லது பாதுகாவலர், மைனர் குழந்தை அல்லது மனநலம் பாதிக்கப்பட்ட நபர் பெயரில் முதலீடு செய்ய விரும்பினால், அவர்கள் சார்பாகவும் கணக்கைத் தொடங்கலாம். 10 வயதுக்கு மேற்பட்ட மைனர் குழந்தைகளும் தங்கள் சொந்தப் பெயரில் இந்தக் கணக்கைத் தொடங்க அனுமதிக்கப்படுகிறார்கள்.

இத்திட்டத்தின் கீழ் குறைந்தபட்சம் 1,000 ரூபாயில் முதலீட்டைத் தொடங்கலாம். அதிகபட்ச முதலீட்டு வரம்பு எதுவும் இல்லை. அதாவது நீங்கள் விரும்பும் அளவுக்கு முதலீடு செய்யலாம். இருப்பினும், இத்திட்டத்தின் மூலம் ஈட்டப்படும் வட்டிக்கு முழுமையாக வரி விதிக்கப்படும். முதலீட்டாளர்கள் பழைய அல்லது புதிய வரி முறையின் கீழ் தங்கள் வரி வரம்பிற்கு ஏற்ப வரியைச் செலுத்த வேண்டும்.

கிசான் விகாஸ் பத்ரா திட்டம் 1988ஆம் ஆண்டில் இந்திய அஞ்சல் துறையால் தொடங்கப்பட்டது. ஆரம்பத்தில் விவசாயிகளிடையே நீண்ட கால சேமிப்பை ஊக்குவிக்கும் நோக்கில் இத்திட்டம் அறிமுகப்படுத்தப்பட்டது. அதனால்தான் கிசான் என்ற பெயரில் தொடங்கப்பட்டது. ஆனால், காலப்போக்கில் நாடு முழுவதும் உள்ள அனைத்து முதலீட்டாளர்களுக்கும் இத்திட்டம் விரிவுபடுத்தப்பட்டது. அரசு உத்தரவாதம் இருப்பதால் இதில் முதலீடு செய்யப்படும் பணத்தை இழக்கும் அபாயம் இல்லை.

சந்தையில் பணமோசடி மற்றும் முறைகேடான நடவடிக்கைகளைத் தடுக்கும் வகையில், இத்திட்டத்தில் முதலீடு செய்வதற்கு அரசு கடுமையான விதிமுறைகளை வகுத்துள்ளது. 50,000 ரூபாய்க்கு மேல் முதலீடு செய்ய விரும்பும் முதலீட்டாளர்கள் பான் கார்டை சமர்ப்பிப்பது கட்டாயமாகும். அதேபோல, ரூ. 10 லட்சம் அல்லது அதற்கு மேற்பட்ட தொகையை முதலீடு செய்ய விரும்புவோர் தங்கள் வருமானத்திற்கான ஆதாரத்தையும் சமர்ப்பிக்க வேண்டும். இதற்காகச் சம்பள சீட்டு, வங்கி அறிக்கை அல்லது வருமான வரி தாக்கல் செய்ததற்கான ஆவணம் ஆகியவற்றில் ஏதேனும் ஒன்றை வழங்க வேண்டும். மேலும், கணக்கைத் தொடங்க அடையாளச் சான்றாக ஆதார் கார்டை சமர்ப்பிப்பதும் அவசியமாகும்.

தபால் நிலையத்தில் கிசான் விகாஸ் பத்ரா கணக்கைத் தொடங்குவது மிகவும் எளிமையான மற்றும் நேரடியான செயல்முறையாகும். முதலில், நீங்கள் அஞ்சல் அலுவலகத்திலிருந்து 'படிவம் A'-ஐப் (Form A) பெற வேண்டும். அல்லது அதை இணையத்திலிருந்தே பதிவிறக்கம் செய்து கொள்ளலாம். இந்தப் படிவத்தை முழுமையாகப் பூர்த்தி செய்து அதனுடன் ஆதார் அட்டை, பான் கார்டு மற்றும் முகவரிச் சான்று போன்ற உங்கள் KYC ஆவணங்களின் நகல்களை இணைக்க வேண்டும். பின்னர், ரொக்கம், காசோலை, டிமாண்ட் டிராஃப்ட் (DD) அல்லது பே ஆர்டர் (pay order) ஆகியவற்றின் மூலம் உங்கள் முதலீட்டுத் தொகையைச் செலுத்தலாம்.

உங்கள் ஆவணங்கள் அனைத்தும் சரிபார்க்கப்பட்ட பிறகு, உங்கள் முதலீடு மற்றும் முதிர்வு விவரங்களைக் கொண்ட கிசான் விகாஸ் பத்ரா சான்றிதழை தபால் நிலையம் வழங்கும். கணக்கைத் தொடங்கும்போதே வாரிசுதாரரை (நாமினி) நியமிக்கும் வசதியும் இதில் உள்ளது. இது எதிர்பாராத சூழல்கள் ஏற்படும்போது நிதியை எளிதாக மாற்றிக்கொள்ள வழிவகுக்கிறது. இதுபோன்ற பல நன்மைகள் இத்திட்டத்தில் உள்ளன.