ஆங்கிலேயர் ஆட்சிக்கு எதிராகப் போராடிய தமிழ் பாளையக்காரர் பூலித்தேவரின் நினைவு தினம் இன்று மதுரையில் அனுசரிக்கப்பட்டது.
இந்த நிகழ்வில் பங்கேற்று உரையாற்றிய நாம் தமிழர் கட்சியின் ஒருங்கிணைப்பாளர் சீமான், தமிழக முதல்வர் விஜய் தலைமையிலான அரசை கடுமையாக விமர்சித்தார்.
"பட போஸ்டர் தான் சர்வதேச பிரச்சனையா?" - சீமான் கேள்வி
தொடர்ந்து விழா மேடையில் பேசிய சீமான், அமைச்சர் ஆனந்த் சட்டப்பேரவையில் பேசிய கருத்தைச் சுட்டிக்காட்டி தமிழக அரசை விமர்சித்தார். அவர் பேசுகையில்,"சர்க்கார் பட போஸ்டர் கிடைத்ததுதான் சர்வதேச பிரச்சனை என்கிறார்கள். மீனவர் பாதுகாப்பு, காவிரி நீர் பிரச்சினை எல்லாம் இவர்களின் கண்களுக்குத் தெரியவில்லை"என அமைச்சர் ஆனந்த் சட்டப்பேரவையில் பேசியதை குறிப்பிட்டு கடுமையான விமர்சனங்களை முன்வைத்தார்.
சில தினங்களுக்கு முன்பு தமிழக சட்டப்பேரவையில் பேசிய அமைச்சர் என் ஆனந்த் திமுகவை பார்த்து சர்க்கார் பட போஸ்டரை கிழித்ததன் விளைவாகத்தான் நீங்கள் இன்று எதிர்க்கட்சியாக மாறி இருக்கிறீர்கள். இல்லை எனில் நீங்கள் ஆளும் கட்சி ஆகவே இருந்திருப்பீர்கள். தளபதியின்மக்கள் செல்வாக்கு இதுதான் என்று பொருள்படும்படி அவர் பேசியிருந்ததை குறிப்பிட்டு தான் சீமான் இவ்வாறு சாடியிருக்கிறார்.
"இவருக்கு பூலித்தேவர் யார் என்றே தெரியாது" - சீமான் விமர்சனம்
மேலும், அமைச்சர் ஆனந்தையும் சீமான் கடுமையாக விமர்சித்தார். அவருக்கு பூலித்தேவர் யார் என்பதே தெரியாது எனக் குறிப்பிட்ட சீமான், பூலித்தேவர் நினைவு தின நிகழ்வின் மேடையில் அரசின் செயல்பாடுகள் குறித்து தனது விமர்சனங்களை முன்வைத்தார்.
"இனிமேல் மேட்டூர் அணை திறப்பு ரிலீஸ்தான் ஓடும்"
தொடர்ந்து பேசிய சீமான், தமிழக அரசின் தற்போதைய செயல்பாடுகளை விமர்சிக்கும் வகையில், "இனிமேல் மேட்டூர் அணை திறப்பு ரிலீஸ்தான் ஓடும்"என்றும் கூறினார்.முதல்வர் விஜயின் அரசியல் செயல்பாடுகளையும், அரசின் முன்னுரிமைகளையும் விமர்சிக்கும் வகையில் சீமான் தெரிவித்த இந்தக் கருத்துகள் தற்போது தமிழக அரசியல் வட்டாரத்தில் கவனம் பெற்றுள்ளன.
சீமான் கூறியது போலையே இன்று முழுக்க முழுக்க இணையத்தை விஜய்தான் ஆக்கிரமித்திருக்கிறார். அதிலும் குறிப்பாக விவசாயக் குடும்பங்களை சேர்ந்த முதியவர்களுடன் விஜய் பேசி கலந்துரையாடிய காணொளிகள் இணையத்தில் அனைவராலும் விரும்பப்பட்டு வருகின்றன.
விஜய் - சீமான் அரசியல் விமர்சனம் மீண்டும் கவனம்
ஏற்கனவே தமிழக வெற்றிக் கழகத்திற்கும் நாம் தமிழர் கட்சிக்கும் இடையே அரசியல் ரீதியாக பல்வேறு கருத்து வேறுபாடுகள் நிலவி வரும் நிலையில், முதல்வர் விஜய் மற்றும் அவரது அரசை சீமான்கடுமையாக விமர்சித்திருப்பது அரசியல் களத்தில் மீண்டும் பேசுபொருளாகியுள்ளது.
மேலும் அமைச்சர்களின் செயல்பாடுகளை குறித்து விமர்சித்த நாம் தமிழர் கட்சியின் ஒருங்கிணைப்பாளர் சீமான், பார்த்து படித்தே தமிழில் பிழை செய்கின்றனர் எனவும் குறிப்பிட்டிருந்தார். அதற்கு வலு சேர்க்கும் வகையில் இன்றைய தினம் கள்ளக்குறிச்சி எம்எல்ஏ அருள் விக்னேஷ் மனமார்ந்த நன்றிக்கு மன்மதநன்றி எனக் கூறி இருந்ததும் குறிப்பிடத்தக்கது. ஒருபுறம், விஜயின் மேட்டூர் அணை நிகழ்வும் விவசாய குடும்பங்களுடனான சந்திப்பும் சமூக வலைதளங்களில் கவனம் பெற்று வரும் நிலையில், மறுபுறம் தவெக அமைச்சர்கள் மற்றும் எம்.எல்.ஏக்களின் பேச்சுகள் தொடர்பான விமர்சனங்களும் தொடர்ந்து எழுந்து வருகின்றன. இதனால், விஜய் - சீமான் இடையிலான அரசியல் விமர்சனங்கள் தமிழக அரசியல் களத்தில் தொடர்ந்து கவனம் பெறும் சூழல் உருவாகியுள்ளது.