குறிப்பாக, அதிமுக தலைமையிலான தேசிய ஜனநாயகக் கூட்டணி வேட்பாளர்களை ஆதரித்து, வட மாநிலங்களில் இருந்து 6 முக்கிய முதலமைச்சர்கள் தமிழகத்தில் வாக்கு சேகரிக்க உள்ளனர்.

தமிழகம் வரும் ஸ்டார் முதலமைச்சர்கள்

• யோகி ஆதித்யநாத் (உத்தரப் பிரதேசம்)
• மோகன் யாதவ் (மத்தியப் பிரதேசம்)
• தேவேந்திர பட்னாவிஸ் (மகாராஷ்டிரா துணை முதல்வர்)
• பஜன்லால் சர்மா (ராஜஸ்தான்)
• ஹிமந்த் பிஸ்வ சர்மா (அசாம்)
• ரேகா குப்தா (டெல்லி)

டபுள் என்ஜின் அரசு முழக்கம்

தமிழகத்தில் உள்ள 27 தொகுதிகளிலும் வெற்றி பெறுவதை இலக்காகக் கொண்டுள்ள பாஜக, இந்த முதலமைச்சர்களைக் கொண்டு மத்திய - மாநில அரசுகளின் ஒருங்கிணைந்த வளர்ச்சி (Double Engine Growth) என்ற கருத்தாக்கத்தை முன்வைக்க உள்ளது. திமுக அரசின் திராவிட மாடல் அரசியலுக்குப் போட்டியாக, தங்களது மாநிலங்களின் வளர்ச்சித் திட்டங்களை இவர்கள் மக்களிடம் விளக்க உள்ளனர்.

பாஜக வலுவாக உள்ள கன்னியாகுமரி, திருநெல்வேலி மற்றும் கோவை ஆகிய மண்டலங்களில் இந்த முதலமைச்சர்களின் பொதுக்கூட்டங்கள் பிரம்மாண்டமாக நடத்தத் திட்டமிடப்பட்டுள்ளது. குறிப்பாக, யோகி ஆதித்யநாத்தின் வருகை இந்துத்துவ வாக்கு ஒருங்கிணைப்பிற்கு உதவும் என கட்சி மேலிடம் எதிர்பார்க்கிறது.

திமுக - அதிமுகவின் எதிர்வினை

வெளிமாநில முதலமைச்சர்களின் வருகை தமிழக அரசியலில் எந்தத் தாக்கத்தையும் ஏற்படுத்தாது என திமுக விமர்சித்துள்ளது. அதேவேளையில், அதிமுக தலைமையிலான கூட்டணியில் இவர்களின் வருகை தொண்டர்களிடையே பெரும் உற்சாகத்தை ஏற்படுத்தியுள்ளது. பிரதமர் நரேந்திர மோடி மற்றும் மத்திய அமைச்சர் அமித் ஷா ஆகியோரும் அடுத்த வாரம் தமிழகம் வரவுள்ளதால், தேர்தல் களம் இன்னும் சூடுபிடிக்கும் என எதிர் பார்க்கப்படுகிறது.

என்டிஏ கூட்டணி - தமிழ்நாடு

அதிமுக தலைமையிலான தேசிய ஜனநாயகக் கூட்டணியில் பாமக, அமமுக உள்ளிட்ட முக்கியக் கட்சிகள் கைகோர்த்துள்ளன. இதில் பாஜகவிற்கு 27 தொகுதிகள் ஒதுக்கப்பட்டு, அக்கட்சியின் மாநிலத் தலைவர் நயினார் நாகேந்திரன் தலைமையில் வேட்பாளர்கள் தீவிரமாகப் பணியாற்றி வருகின்றனர். இந்தக் கூட்டணியின் பிரதான முழக்கமாக ஊழலற்ற நிர்வாகம் மற்றும் மாநில வளர்ச்சி முன் வைக்கப்படுகிறது. திமுகவின் திராவிட மாடல் ஆட்சிக்கு மாற்றாக, மத்திய - மாநில அரசுகளின் ஒருங்கிணைந்த டபுள் என்ஜின் வளர்ச்சியை மக்களிடம் கொண்டு செல்ல இக்கூட்டணி திட்டமிட்டுள்ளது. இதனை வலுப்படுத்த, பிரதமர் நரேந்திர மோடி, அமித் ஷா மற்றும் 6 மாநில பாஜக முதலமைச்சர்கள் தமிழகத்தில் சூறாவளிப் பிரச்சாரம் மேற்கொள்ள உள்ளனர். குறிப்பாக, எடப்பாடி பழனிசாமி மற்றும் அண்ணாமலை ஆகியோரின் பிரச்சாரம் தொண்டர்களிடையே பெரும் உற்சாகத்தை ஏற்படுத்தி உள்ளது.

ஏப்ரல் 23 அன்று நடைபெறும் இந்தத் தேர்தலில், ஆளுங்கட்சியான திமுகவிற்கு கடும் சவால் அளிக்கும் வகையில் அதிமுக - பாஜக கூட்டணி தனது தேர்தல் வியூகங்களை வகுத்துள்ளது. இந்த தேசிய ஜனநாயக கூட்டணி 2026 சட்டமன்ற தேர்தலில் வெற்றியை பெற்று ஆட்சியை பிடிக்குமா என்ற கேள்விக்கான பதில் விரைவில் தெரிய வரும்.