தமிழக சட்டசபைத் தேர்தல் முடிவுகள் வெளியாகிய பின்னரும் அரசியல் பரபரப்பு அடங்காத நிலையில், நடிகர் விஜய் தலைமையிலான தமிழக வெற்றிக் கழகம் (தவெக) 107 தொகுதிகளில் வெற்றி பெற்று மிகப்பெரிய அரசியல் சக்தியாக உருவெடுத்துள்ளது.

ஆனால் ஆட்சியை அமைக்க தேவையான 118 உறுப்பினர்கள் என்ற பெரும்பான்மை எண்ணிக்கையை எட்ட இன்னும் 11 எம்எல்ஏக்கள் தேவைப்படும் சூழல் உருவாகியுள்ளது.

இந்த நிலையில், தவெக தரப்பு கூட்டணி ஆதரவைப் பெறுவதற்கான அரசியல் நகர்வுகளைத் தொடங்கியுள்ளதாக தகவல்கள் வெளியாகியுள்ளன. குறிப்பாக திமுக கூட்டணியில் போட்டியிட்ட காங்கிரஸ் கட்சி 5 தொகுதிகளில் வெற்றி பெற்றிருப்பது கவனத்தை ஈர்த்துள்ளது. காங்கிரஸின் ஆதரவு கிடைத்தால் தவெக வலிமை 112 ஆக உயரும் என்பதால், அந்தக் கட்சியின் முடிவு முக்கியமாக பார்க்கப்படுகிறது.

தமிழ்நாடு காங்கிரஸ் மேலிட பொறுப்பாளர் கிரிஷ் சோடங்கர், தேர்தல் முடிவுகள் குறித்து தேசிய தலைவர் மல்லிகார்ஜுன கார்கே மற்றும் ராகுல் காந்திக்கு விரிவான அறிக்கை அளித்திருப்பதாக தெரிவித்துள்ளார். மேலும், இளைஞர்கள் மற்றும் பெண்களின் ஆதரவே தவெகவின் எழுச்சிக்கு முக்கிய காரணம் என அவர் குறிப்பிட்டுள்ளார்.

இதற்கிடையே காங்கிரஸ் முன்னாள் தலைவர் ராகுல் காந்தி, விஜயை தொலைபேசியில் தொடர்புகொண்டு அவரது வெற்றிக்கு வாழ்த்து தெரிவித்ததாக உறுதி செய்யப்பட்டுள்ளது. தனது சமூக வலைதள பதிவிலும் இதை ராகுல் பகிர்ந்து, "மக்களின் தீர்ப்பு புதிய தலைமுறை அரசியல் எழுச்சியை வெளிப்படுத்துகிறது" என்று குறிப்பிட்டுள்ளார்.

இந்த உரையாடலில் அரசியல் நிலவரம் பற்றியும் பேசப்பட்டதாகக் கூறப்படுகின்றது. தவெக தரப்பில் இருந்து காங்கிரஸ் ஆதரவு தொடர்பாக அணுகல் நடந்திருக்கலாம் என்ற அரசியல் வட்டார தகவல்கள் வெளியாகியுள்ளன. இருப்பினும், இதுகுறித்து காங்கிரஸ் மேலிடம் இதுவரை எந்த அதிகாரப்பூர்வ நிலைப்பாடும் அறிவிக்கவில்லை.