செப்டம்பர் 5ஆம் தேதி வெளியாகும் என ஏற்கனவே அறிவிக்கப்பட்டிருந்த நிலையில், தற்போது படத்தின் ரிலீஸ் தேதி திடீரென மாற்றப்பட்டுள்ளது.

ராகுல் சங்க்ரித்யன் இயக்கத்தில் உருவாகியுள்ள 'ரணபலி' திரைப்படம், தசரா பண்டிகையை முன்னிட்டு அக்டோபர் 16ஆம் தேதி திரையரங்குகளில் வெளியாகும் என படக்குழு அதிகாரப்பூர்வமாக அறிவித்துள்ளது. தொடர் விடுமுறை நாட்கள் இருப்பதால் பண்டிகை கால வெளியீடு படத்தின் வசூலுக்கு சாதகமாக அமையும் என எதிர்பார்க்கப்படுகிறது.

'டியர் காம்ரேட்' படத்திற்குப் பிறகு விஜய் தேவரகொண்டா-ராஷ்மிகா மந்தனா இணையும் திரைப்படம் என்பதால், இருவரது ரசிகர்கள் மத்தியில் படத்திற்கான எதிர்பார்ப்பு ஏற்கனவே அதிகமாக உள்ளது. புதிய ரிலீஸ் தேதியை அறிவித்து வெளியிடப்பட்ட போஸ்டரில், விஜய் தேவரகொண்டா கையில் பெரிய அரிவாளுடன் ஆக்ரோஷமாக காட்சியளிப்பது ரசிகர்களின் கவனத்தை ஈர்த்துள்ளது.

முக்கியமாக, 'ரணபலி' வெளியாகும் அதே அக்டோபர் 16ஆம் தேதிதான் சூப்பர்ஸ்டார் ரஜினிகாந்த் நடிப்பில் உருவாகியுள்ள 'ஜெயிலர் 2' திரைப்படமும் வெளியாக உள்ளது. இரண்டு படங்களுமே பான் இந்தியா அளவில் வெளியிடப்பட உள்ளதால், தசரா பண்டிகை காலத்தில் மிகப்பெரிய வசூல் போட்டி உருவாகும் சூழல் ஏற்பட்டுள்ளது.

குறிப்பாக தெலுங்கு மாநிலங்கள் மற்றும் வடமாநிலங்களில் விஜய் தேவரகொண்டாவுக்கு இருக்கும் ரசிகர் பட்டாளம் காரணமாக 'ரணபலி' படத்திற்கு நல்ல வரவேற்பு கிடைத்தால், அது 'ஜெயிலர் 2' படத்தின் வசூலில் தாக்கத்தை ஏற்படுத்துமா என்ற விவாதமும் இப்போதே தொடங்கியுள்ளது.

19ஆம் நூற்றாண்டின் பின்னணியில் உருவாகும் 'ரணபலி', 1854 முதல் 1878 வரையிலான காலகட்டத்தில் நடைபெற்றதாக கூறப்படும் உண்மைச் சம்பவங்களை அடிப்படையாகக் கொண்டதாக உருவாகியுள்ளது. குறிப்பாக 1878ஆம் ஆண்டைச் சுற்றியுள்ள சம்பவங்களை மையமாக வைத்து, பிரிட்டிஷ் ஆட்சிக் காலத்தில் இந்திய மக்கள் எதிர்கொண்ட சுரண்டல் மற்றும் கொடுமைகளைப் படத்தில் பதிவு செய்ய முயற்சித்துள்ளதாக இயக்குநர் தெரிவித்துள்ளார்.

அந்த காலகட்டத்தில் நடைபெற்றதாக கூறப்படும் வரலாற்று நிகழ்வுகளையும், சுதந்திரப் போராட்டத்திற்கு முந்தைய இந்தியாவின் இருண்ட வரலாற்றையும் பிரம்மாண்டமான காட்சிகளுடன் படமாக்கியுள்ளதாக கூறப்படுகிறது. பிரிட்டிஷ் ஆட்சிக்கு எதிராக போராடும் கதாநாயகனின் பயணமே படத்தின் மையக்கருவாக அமைந்துள்ளதாக தகவல் வெளியாகியுள்ளது.

படத்தில் விஜய் தேவரகொண்டா 'ரணபலி' என்ற கதாபாத்திரத்திலும், ராஷ்மிகா மந்தனா 'ஜெயம்மா' என்ற கதாபாத்திரத்திலும் நடித்துள்ளனர். ஏற்கனவே வெளியான டைட்டில் கிளிம்ப்ஸில், விஜய் குதிரையில் வந்து பிரிட்டிஷ் அதிகாரி ஒருவரை ரயில் தண்டவாளத்தில் இழுத்துச் செல்லும் காட்சி ரசிகர்கள் மத்தியில் பெரும் வரவேற்பைப் பெற்றது.

இந்நிலையில், ஒரே நாளில் இரண்டு பிரம்மாண்ட பான் இந்தியா திரைப்படங்கள் வெளியாக உள்ளதால், அக்டோபர் 16ஆம் தேதி தென்னிந்திய சினிமா ரசிகர்களுக்கு மிகப்பெரிய திருவிழாவாக அமைய உள்ளது. 'ரணபலி' மற்றும் 'ஜெயிலர் 2' ஆகிய இரண்டு படங்களில் பாக்ஸ் ஆபிஸில் யார் ஆதிக்கம் செலுத்தப் போகிறார்கள் என்பதே தற்போது ரசிகர்கள் மத்தியில் மிகப்பெரிய எதிர்பார்ப்பாக உருவாகியுள்ளது.