இருவரும் விவாகரத்து பெற்றுவிட்ட நிலையில், மகளை இருவரும் இணைந்து 'கோ-பேரண்டிங்' முறையில் வளர்த்து வருவதாக ஜிவி பிரகாஷ் தெரிவித்துள்ளார்.

வசந்தபாலன் இயக்கத்தில் வெளியான 'வெயில்' திரைப்படத்தின் மூலம் இசையமைப்பாளராக அறிமுகமானவர் ஜிவி பிரகாஷ். முதல் படத்திலேயே தனது இசையால் ரசிகர்களின் கவனத்தை ஈர்த்த அவர், தொடர்ந்து முன்னணி நடிகர்களின் படங்களுக்கு இசையமைக்கும் வாய்ப்புகளைப் பெற்றார். அஜித்தின் 'கிரீடம்', ரஜினிகாந்தின் 'குசேலன்' உள்ளிட்ட பல படங்களுக்கு இசையமைத்து தனக்கென தனி இடத்தை உருவாக்கினார்.

'ஆயிரத்தில் ஒருவன்', 'மயக்கம் என்ன' உள்ளிட்ட திரைப்படங்களில் வித்தியாசமான இசையை வழங்கியதன் மூலம் தமிழ் சினிமாவில் தனித்துவமான இசையமைப்பாளராகவும் தன்னை நிலைநிறுத்திக் கொண்டார். பின்னர் நடிப்பின் மீதான ஆர்வம் காரணமாக கதாநாயகனாகவும் களமிறங்கினார். பாலா, ராஜீவ் மேனன், சசி உள்ளிட்ட இயக்குநர்களின் படங்களில் நடித்திருந்தாலும், நடிகராக அவர் எதிர்பார்த்த அளவிலான வெற்றியை தொடர்ந்து பெறவில்லை. தற்போது அவரது நடிப்பில் 'இம்மார்ட்டல்' திரைப்படம் வெளியாகவுள்ளது.

இதற்கிடையே, இசையமைப்பாளராக ஜிவி பிரகாஷின் திறமைக்கு தேசிய அளவில் அங்கீகாரம் கிடைக்க வேண்டும் என்ற எதிர்பார்ப்பு அவரது ரசிகர்கள் மத்தியில் இருந்து வந்தது. இந்த நிலையில், அவர் மூன்று முறை தேசிய விருது வென்றிருப்பது அவரது இசைப் பயணத்தில் முக்கிய சாதனையாக பார்க்கப்படுகிறது.

இந்நிலையில், ஜிவி பிரகாஷின் தனிப்பட்ட வாழ்க்கையும் கடந்த சில ஆண்டுகளாக கவனம் பெற்றது. பள்ளியில் படிக்கும் காலத்திலேயே தன்னைவிட இளையவரான சைந்தவியை காதலித்த ஜிவி பிரகாஷ், நீண்ட காலமாக அவருடன் காதல் உறவில் இருந்தார். பின்னர் இருவரது குடும்பத்தினரின் சம்மதத்துடன் திருமணம் செய்து கொண்டனர். இந்த தம்பதிக்கு அன்வி என்ற மகளும் உள்ளார்.

ஆனால், சில ஆண்டுகளுக்கு முன்பு ஜிவி பிரகாஷ் மற்றும் சைந்தவி இருவரும் சட்டப்பூர்வமாக விவாகரத்து பெற்றனர். இருவரும் பிரிந்தாலும், மகள் அன்வியின் நலனை கருத்தில் கொண்டு இணைந்து பெற்றோராக செயல்பட்டு வருவதாக தற்போது ஜிவி பிரகாஷ் தெரிவித்துள்ளார்.

சமீபத்திய பேட்டி ஒன்றில் சைந்தவி குறித்து பேசிய அவர், "சைந்தவியும், அன்வியும் எனது வாழ்க்கையில் ஸ்பெஷலானவர்கள். பள்ளியில் இருந்தே சைந்தவி எனக்கு தோழி. காதலித்தோம், திருமணம் செய்துகொண்டோம். தற்போது விவாகரத்து பெற்றுவிட்டோம். அன்வியை இப்போது கோ-பேரண்டிங் முறையில் நாங்கள் வளர்த்து வருகிறோம். நாங்கள் பிரிந்தாலும் சைந்தவியுடனான நட்பு எனக்கு முக்கியமானது" என தெரிவித்துள்ளார்.

ஜிவி பிரகாஷின் இந்தப் பேச்சு, விவாகரத்துக்குப் பிறகும் இருவரும் ஒருவரை ஒருவர் மதித்து, மகளை இணைந்து வளர்த்து வருவதை வெளிப்படுத்துவதாக அமைந்துள்ளது. குறிப்பாக, நீண்ட கால காதல் மற்றும் திருமண வாழ்க்கைக்குப் பிறகு பிரிந்தாலும், நட்பையும் பெற்றோர் என்ற பொறுப்பையும் தொடர்ந்து பேணி வருவதாக அவர் கூறியிருப்பது ரசிகர்கள் மத்தியில் கவனம் பெற்றுள்ளது.