மேலசெவல் காவல் நிலைய எல்லைக்குட்பட்ட கீழஓமநல்லூர் பேருந்து நிறுத்தம் அருகே, சப்-இன்ஸ்பெக்டர் வள்ளிநாயகம் தலைமையிலான காவலர்கள் வாகன தணிக்கையில் ஈடுபட்டு வந்தனர்.

அப்போது சந்தேகத்துக்கிடமாக வந்த நான்கு சக்கர வாகனத்தை நிறுத்தி சோதனை செய்தபோது, மூலக்கரைப்பட்டியைச் சேர்ந்த 35 வயதான சீனிகார்த்திக் என்பவர் அரசால் தடைசெய்யப்பட்ட புகையிலை பொருட்களை மறைத்து எடுத்துச் சென்றது வெளிச்சத்துக்கு வந்தது.

சுமார் 17 கிலோகிராம் அளவிலான இந்த பொருட்கள் விற்பனைக்காக பதுக்கி வைக்கப்பட்டிருந்தது விசாரணையில் உறுதி செய்யப்பட்டது.

இதையடுத்து, உடனடியாக வழக்குப்பதிவு செய்த காவலர்கள், சீனிகார்த்திக்கை கைது செய்து மேலதிக விசாரணை மேற்கொண்டு வருகின்றனர்.

மேலும், அவரிடமிருந்து பறிமுதல் செய்யப்பட்ட 17 கிலோ புகையிலை பொருட்களும், பயன்படுத்தப்பட்ட நான்கு சக்கர வாகனமும் கைப்பற்றப்பட்டு, சட்டப்படி நடவடிக்கைகள் தீவிரமாக முன்னெடுக்கப்பட்டு வருகின்றன.