2029 நாடாளுமன்றத் தேர்தலை குறிவைத்து, தமிழகத்தைத் தாண்டி பிற மாநிலங்களிலும் தனது அரசியல் செல்வாக்கை விரிவுபடுத்த தவெக தலைமை முயற்சிகளை மேற்கொண்டு வருவதாக கூறப்படுகிறது.

தமிழக முதலமைச்சர் விஜய்யின் சட்டப்பேரவை உரைகள், அரசு நலத்திட்ட தொடக்க விழா பேச்சுகள், முக்கிய அரசியல் கருத்துகள் உள்ளிட்டவை உடனுக்குடன் இந்தி, தெலுங்கு, கன்னடம், மலையாளம், மராத்தி உள்ளிட்ட பல்வேறு மொழிகளில் மொழிபெயர்க்கப்பட்டு சமூக வலைதளங்களில் பரப்பப்பட்டு வருவதாக தெரிகிறது.

இந்த டிஜிட்டல் பிரசாரத்தில் முக்கியமாக கவனம் பெறுவது, ஒவ்வொரு மாநிலத்திற்கும் தனித்தனியாக உருவாக்கப்பட்டு செயல்பட்டு வரும் தவெக ஆதரவு சமூக வலைதளப் பக்கங்கள் என கூறப்படுகிறது. உத்தரப்பிரதேசம், பிகார், மத்தியப் பிரதேசம், மகாராஷ்டிரா உள்ளிட்ட மாநிலங்களிலும், தென் மாநிலங்களிலும் விஜய்யை மையப்படுத்திய பல்வேறு இன்ஸ்டாகிராம் பக்கங்கள் செயல்பட்டு வருவதாக தகவல்கள் தெரிவிக்கின்றன. ஆரம்பத்தில் இவற்றில் பல பக்கங்கள் அதிகாரப்பூர்வமற்ற வகையில் இயங்கி வந்த நிலையில், தற்போது அதிகாரப்பூர்வ சமூக வலைதளப் பக்கங்களும் தொடங்கப்பட்டுள்ளதாக கூறப்படுகிறது.

அந்தந்த மாநில மக்களை சென்றடையும் வகையில் உள்ளூர் மொழிகளில் தினசரி பதிவுகள் வெளியிடப்படுவதாகவும் தெரிகிறது. தமிழக அரசின் முக்கிய அறிவிப்புகள், நிர்வாக நடவடிக்கைகள், நலத்திட்டங்கள் மற்றும் விஜய்யின் அரசியல் பேச்சுகள் ஆகியவை எளிமையான மொழியில் வீடியோ ரீல்ஸ், கிராபிக்ஸ் மற்றும் குறும்படங்களாக வடிவமைக்கப்பட்டு பகிரப்படுகின்றன.

பொதுவாக மாநிலக் கட்சிகள் தங்களது அரசியல் பிரசாரத்தை சொந்த மாநில எல்லைக்குள் மையப்படுத்துவது வழக்கம். ஆனால், தவெகவைப் பொறுத்தவரை தமிழகத்தைத் தாண்டி பல்வேறு மாநிலங்களிலும் பல மொழிகளில் டிஜிட்டல் கட்டமைப்பை உருவாக்கும் முயற்சி நடைபெறுவதாக கூறப்படுகிறது. இதன் நோக்கம் வெளிமாநிலங்களில் உள்ள விஜய் ரசிகர்களை மட்டும் ஈர்ப்பது அல்ல என்றும், 2029 தேர்தலை முன்னிட்டு விஜய்யை தேசிய அளவில் அறியப்படும் அரசியல் தலைவராக உருவாக்குவதே முக்கிய இலக்கு என்றும் அரசியல் வட்டாரங்களில் பேசப்படுகிறது.

குறிப்பாக, தென்னிந்தியாவில் இருந்து உருவாகும் ஒரு மாற்றுத் தேசிய தலைவராக விஜய்யை வட மாநில மக்களிடம் அறிமுகப்படுத்தும் முயற்சியாகவே இந்த டிஜிட்டல் விரிவாக்கம் பார்க்கப்படுகிறது.

இதனால், பாரம்பரிய அரசியலில் காணப்படும் வீடு வீடாகச் சென்று பிரசாரம் செய்வது, துண்டுப் பிரசுரங்கள் வழங்குவது போன்ற முறைகளுடன் சேர்த்து, சமூக வலைதளங்களை மையப்படுத்திய 'விர்ச்சுவல் வாரியர்ஸ்' எனப்படும் புதிய வகை அரசியல் ஆதரவாளர்கள் முக்கிய பங்கு வகிக்கத் தொடங்கியுள்ளனர். டிஜிட்டல் தளங்களில் ஒரே நேரத்தில் பல மொழிகளில் உள்ளடக்கங்களை உருவாக்கி பரப்புவதன் மூலம் தேசிய அளவில் ஒரு அரசியல் பிம்பத்தை கட்டமைக்கும் முயற்சியாக இது பார்க்கப்படுகிறது.

இதற்கிடையே, விஜய்யின் தேசிய அரசியல் திட்டம் குறித்த விவாதத்திற்கு மேலும் வலுசேர்க்கும் வகையில், சமீபத்தில் வெளியான 'மூட் ஆஃப் தி நேஷன்' கருத்துக்கணிப்பு முடிவுகளும் கவனம் பெற்றுள்ளன.

இந்தியா டுடே - சி வோட்டர் இணைந்து நடத்தியதாக கூறப்படும் ஆகஸ்ட் 2026 'மூட் ஆஃப் தி நேஷன்' கருத்துக்கணிப்பில், அடுத்த பிரதமராக யாரை மக்கள் விரும்புகிறார்கள் என்ற பட்டியலில் விஜய் 9.2 சதவீத ஆதரவுடன் மூன்றாவது இடத்தைப் பிடித்துள்ளதாக தகவல்கள் வெளியாகியுள்ளன.

இந்த பட்டியலில் பிரதமர் நரேந்திர மோடி தொடர்ந்து முதலிடத்தில் இருப்பதாகவும், அவருக்கு 48.7 சதவீத ஆதரவு கிடைத்துள்ளதாகவும் கூறப்படுகிறது. கடந்த ஜனவரியில் 55 சதவீதமாக இருந்த மோடியின் ஆதரவு தற்போது குறைந்துள்ளதாக அந்த கருத்துக்கணிப்பு தெரிவிப்பதாக தகவல்கள் தெரிவிக்கின்றன.

மக்களவை எதிர்க்கட்சித் தலைவர் ராகுல் காந்தி 27.1 சதவீத ஆதரவுடன் இரண்டாவது இடத்தில் இருப்பதாகவும் கூறப்படுகிறது. கடந்த ஜனவரியில் அவருக்கு கிடைத்த ஆதரவு 27 சதவீதமாக இருந்த நிலையில், தற்போதைய கருத்துக்கணிப்பிலும் பெரிய மாற்றம் இல்லை என தெரிவிக்கப்பட்டுள்ளது.

இந்த சூழலில் 9.2 சதவீத ஆதரவுடன் விஜய் மூன்றாவது இடத்தைப் பிடித்திருப்பது அரசியல் வட்டாரங்களில் முக்கிய விவாதமாகியுள்ளது. மம்தா பானர்ஜி, அகிலேஷ் யாதவ், அரவிந்த் கெஜ்ரிவால் உள்ளிட்ட பல்வேறு தேசிய அரசியல் தலைவர்களை பின்னுக்குத் தள்ளி விஜய் இந்த இடத்தைப் பிடித்திருப்பதாக கூறப்படுகிறது.

குறிப்பாக, முதலமைச்சராக பொறுப்பேற்று சில மாதங்களிலேயே விஜய்க்கு தேசிய அளவில் இந்த அளவிலான ஆதரவு இருப்பதாக கருத்துக்கணிப்பு வெளியாகியிருப்பது, அவரது எதிர்கால அரசியல் நகர்வுகள் குறித்த எதிர்பார்ப்பை அதிகரித்துள்ளது. அவரது நிர்வாக நடவடிக்கைகள், வேகமான முடிவுகள், தவறுகளை திருத்திக்கொள்ளும் அணுகுமுறை மற்றும் ஊழலுக்கு எதிரான நிலைப்பாடு ஆகியவை வெளிமாநிலங்களிலும் கவனம் பெற்றுள்ளதாக தவெக தரப்பு கருதுவதாக கூறப்படுகிறது.

இதன் காரணமாகவே, தமிழகத்தில் கூட்டணி கட்சிகளுக்குள் எழும் அரசியல் சலசலப்புகளுக்கு மத்தியில், தேசிய அளவில் தனது டிஜிட்டல் பிரசாரத்தை தவெக மேலும் தீவிரப்படுத்தி வருவதாக அரசியல் வட்டாரங்களில் பேசப்படுகிறது.

2029 நாடாளுமன்றத் தேர்தலுக்கு இன்னும் கால அவகாசம் உள்ள நிலையில், அதற்குள் விஜய்யின் அரசியல் செல்வாக்கை தமிழக எல்லைகளைத் தாண்டி கொண்டு செல்வதற்கான முயற்சிகள் தொடர்ந்து முன்னெடுக்கப்பட்டால், அவரது தேசிய அரசியல் பிம்பம் மேலும் வலுப்பெற வாய்ப்புள்ளதாக அவரது ஆதரவாளர்கள் கருதுகின்றனர்.

ஒரு மாநிலக் கட்சியின் தலைவராக இருந்து தமிழக முதலமைச்சராக உயர்ந்த விஜய்யை, அடுத்தகட்டமாக நாடு தழுவிய அளவில் அறியப்படும் அரசியல் சக்தியாக மாற்றுவதற்கான நீண்டகால திட்டத்தின் ஒரு பகுதியாகவே இந்த டிஜிட்டல் விரிவாக்கம் பார்க்கப்படுகிறது. 2029 தேர்தல் நெருங்கும் நேரத்தில் இந்த முயற்சிகள் எந்த அளவுக்கு அரசியல் தாக்கத்தை ஏற்படுத்தும் என்பதே தற்போது தேசிய அரசியல் வட்டாரங்களின் முக்கிய எதிர்பார்ப்பாக மாறியுள்ளது.