தமிழக சட்டமன்றத் தேர்தல் கடந்த 23-ஆம் தேதி ஒரே கட்டமாகச் சீராக நடைபெற்றது. அதன் பின்னர், பதிவான வாக்குகளை எண்ணும் பணிகள் நேற்று தீவிரமாக முன்னெடுக்கப்பட்டன.

ஆரம்ப கட்டமாக தபால் வாக்குகள் திறந்து கணக்கிடப்பட்ட நிலையில், அதன் முதல்கட்ட முடிவுகளிலேயே விஜய் தலைமையிலான தமிழக வெற்றிக் கழகம் முன்னிலைப் பிடித்து அரசியல் கவனத்தை தன்னிடம் திரட்டியது.

இதைத் தொடர்ந்து நடைபெற்ற எண்ணிக்கையின் இறுதியில், த.வெ.க. 108 தொகுதிகளில் வெற்றி பெற்று சட்டமன்றத்தில் மிகப்பெரிய கட்சியாக உயர்ந்தது. எனினும், மொத்தம் 234 தொகுதிகள் கொண்ட அவையில் ஆட்சி அமைக்க தேவையான 118 இடங்களை எட்டாததால், முழுமையான பெரும்பான்மை எட்டப்படாத நிலை உருவாகியுள்ளது.

இந்நிலையில், ஆட்சியை அமைக்கும் உரிமையை கோரி விஜய் ஆளுநரை அணுகுவார் என அரசியல் வட்டாரங்களில் பரவலாக பேசப்படுகிறது. அதற்கான அனுமதி கிடைத்தால், அவர் முதல்வராக பதவி ஏற்ற பின்னர், குறிப்பிட்ட காலக்கெடுவுக்குள் சட்டமன்றத்தில் பெரும்பான்மையை நிரூபிக்க வேண்டிய அவசியம் ஏற்படும்.பெரும்பான்மை இலக்கை எட்ட த.வெ.க.க்கு மேலும் 12 இடங்கள் தேவைப்படுகிறது.

இதனால், தி.மு.க. கூட்டணியில் உள்ள காங்கிரஸ், கம்யூனிஸ்ட் கட்சிகள், மேலும் அ.தி.மு.க. அணியில் இருக்கும் பா.ம.க. போன்ற கட்சிகள் ஆதரவு வழங்கலாம் என அரசியல் ஆய்வுகளில் பேசப்பட்டு வருகிறது.இதற்கிடையில், கூட்டணி தொடர்பாக இதுவரை த.வெ.க. தரப்பிலிருந்து எந்த உத்தியோகபூர்வ அழைப்பும் வரவில்லை என கம்யூனிஸ்ட் கட்சிகள் தெரிவித்துள்ளன.

அழைப்பு வந்தால், மாநில செயற்குழு மற்றும் நிர்வாகக் குழுவை கூட்டி விரிவான ஆலோசனைக்குப் பிறகே இறுதி முடிவு எடுக்கப்படும் எனவும் தெரிவிக்கப்படுகின்றது. இத்தேர்தலில் சிபிஎம் மற்றும் சிபிஐ தலா ஒரு தொகுதியில் வெற்றி பெற்றுள்ளன.