ஆன்லைன் டெலிவரி தளமான பிளிங்கிட் (Blinkit) நிறுவனத்தின் புதிய ஆம்புலன்ஸ் சேவை குறித்து, பெண் ஒருவர் இணையத்தில் பகிர்ந்துள்ள பதிவு பெரும் வரவேற்பைப் பெற்று வருகிறது.
அவசர மருத்துவ உதவி தேவைப்படுபவர்களுக்கு இந்த சேவை ஒரு "உயிர் காப்பான்" (Lifesaver) என்று அவர் மனதாரப் பாராட்டியுள்ளார். ஆபத்தான தறுவாயில் சரியான நேரத்தில் கிடைக்கும் அவசர முதலுதவி மற்றும் மருத்துவ உதவிகளின் உண்மையான மதிப்பை, அதை அனுபவித்தவர்கள் மட்டுமே முழுமையாகப் புரிந்து கொள்ள முடியும் என்றும் அவர் தனது பதிவில் நெகிழ்ச்சியுடன் குறிப்பிட்டுள்ளார்.
இந்தச் சேவை குறித்து பிளிங்கிட் நிறுவனம் விளக்குகையில், தங்களின் ஆம்புலன்ஸ் சேவை தற்சமயம் 10 நிமிடங்களுக்குள் சம்பவ இடத்திற்கு ஆம்புலன்ஸ் சென்றடையக்கூடிய குறிப்பிட்ட பகுதிகளில் மட்டுமே தற்காலிகமாகக் கிடைப்பதாகத் தெரிவித்துள்ளது. எனினும், சாலை போக்குவரத்து மற்றும் வானிலை மாற்றங்களைப் பொறுத்து ஆம்புலன்ஸ் வந்து சேரும் நேரம் மாறுபடலாம் என்றும் கூறப்பட்டுள்ளது. இந்த அவசர ஆம்புலன்ஸ் வண்டியில் ஒரே நேரத்தில் ஒரு நோயாளி, ஆம்புலன்ஸ் மருத்துவ ஊழியர்கள் மற்றும் அவருடன் அதிகபட்சமாக இரண்டு உதவியாளர்கள் வரை பயணிக்க அனுமதி உண்டு என்றும் அந்த நிறுவனம் தெளிவுபடுத்தியுள்ளது.