மாத்ரே பயன்படுத்திய பேட்டை நடுவர் அபிஜித் பட்டாச்சார்யா சோதனை செய்தபோது, அது ஐபிஎல் விதிமுறைப்படி இல்லை எனக் கூறி நிராகரித்தார்.

இதனால் மாத்ரே வேறு பேட்டை வரவழைத்தார், ஆனால் அதுவும் சோதனையில் தோல்வியடைந்ததாக அறிவிக்கப்பட்டது. இறுதியில், நடுவர் தான் பேட்டை அளவிடும் கருவியைத் தவறாகப் பிடித்திருந்ததை உணர்ந்து, தனது தவறுக்காக மன்னிப்பு கேட்டு மாத்ரேவின் பேட் சரியானதுதான் என உறுதிசெய்து அவரை விளையாட அனுமதித்தார்.

இந்தத் தொடக்கக் குழப்பங்களால் சற்றும் மனம் தளராத ஆயுஷ் மாத்ரே, மைதானத்தில் சிக்ஸர் மழையைப் பொழிந்து அதிரடி காட்டினார். வெறும் 29 பந்துகளில் அரைசதம் கடந்த அவர், சேப்பாக்கம் மைதானத்தில் சிஎஸ்கே-வுக்காக இளம் வயதில் அரைசதம் அடித்த வீரர் என்ற சாதனையைப் படைத்தார்.

மொத்தம் 43 பந்துகளில் 73 ரன்கள் குவித்து, கேப்டன் ருதுராஜ் கெய்க்வாடுடன் இணைந்து 96 ரன்கள் பார்ட்னர்ஷிப் அமைத்தார். 18 வயதிலேயே ஐபிஎல் தொடரில் அதிக ரன்கள் குவித்த வீரர்கள் பட்டியலில் மாத்ரே முன்னிலை பெற்று, ரசிகர்களின் கவனத்தை ஈர்த்துள்ளார்.