தமிழகச் சட்டமன்றத் தேர்தல் 2026 முடிவுகளில் 108 இடங்களைப் பெற்றுத் தனிப்பெரும் கட்சியாக அவதரித்தாலும், கோட்டையில் ஆட்சி அமைக்கத் தேவையான 118 இடங்களை எட்ட முடியாமல் தவெக தலைவர் விஜய் பெரும் சவாலைச் சந்தித்து வருகிறார்.

இன்னும் 10-க்கும் மேற்பட்ட எம்.எல்.ஏ-க்களின் ஆதரவு இருந்தால் மட்டுமே கவர்னர் கொடுக்கும் காலக்கெடுவுக்குள் பெரும்பான்மையை நிரூபித்து விஜய்யால் முதலமைச்சர் நாற்காலியில் நீடிக்க முடியும் என்ற இக்கட்டான தொங்கு நாடாளுமன்றச் சூழல் நிலவுகிறது. தனித்துப் போட்டியிட்டதால் தவெக-வுக்கு என்று சொந்தமாக எந்தக் கூட்டணிக் கட்சிகளும் இல்லாத நிலையில், தவெக தரப்பிலிருந்து பின்னணியில் தீவிரப் பேச்சுவார்த்தைகள் முடுக்கிவிடப்பட்டுள்ளன.

காங்கிரஸ் கட்சி தவெக-வுக்கு ஆதரவளிக்கச் சாதகமாகப் பரிசீலித்து வரும் வேளையில், திமுக கூட்டணியில் அங்கம் வகிக்கும் மற்றொரு முக்கியக் கட்சியான இந்திய யூனியன் முஸ்லிம் லீக் (IUML), தவெக-வுக்குத் தங்களது ஆதரவு ஒருபோதும் கிடையாது என்பதைத் திட்டவட்டமாகத் தெரிவித்துள்ளது.

திமுக கூட்டணியை விட்டு விலகும் எண்ணம் தங்களுக்கு இல்லை என்பதைத் தெளிவுபடுத்தியுள்ள முஸ்லிம் லீக் கட்சியின் இந்த அதிரடி முடிவு, பெரும்பான்மையை நிரூபிக்கப் போராடி வரும் விஜய்யின் ஆட்சி அமைக்கும் முயற்சிக்கு மற்றுமொரு பலத்த பின்னடைவாகப் பார்க்கப்படுகிறது.